28°C , Mostly cloudy | Kigali-Rwanda

U Rwanda rwiteguye kwakira izindi ndege nshya 4 uyu mwaka

Yanditswe na Twagira Wilson

Ku ya 28-02-2019 saa 13:15:49
RwandAir yemerewe gukoresha ikirere cya Angola, sosiyete y'indege ya Angola izwi nka TAAG Angola Airlines na yo yemerewe gukoresha ikirere cy'u Rwanda, hashingiwe ku masezerano yasinywe hagati y'ibihugu byombi.

Minisitiri w’Ibikorwaremezo Amb. Gatete Claver, aravuga ko u Rwanda uyu mwaka ruzakira indege 4 nshya ziziyongera ku zindi zari zisanzwe zihari za kompanyi ya RwandAir.

Ambasaderi Gatete ashimangira ko gutwara abantu mu kirere, ari rumwe mu nzego zitezweho gufasha Leta mu kerekezo cyayo cyo guteza imbere ubukungu bw’igihugu.

Yabitangarije i Kigali mu butumwa yahaye abayobozi batandukanye basaga 800 barimo abashinzwe gutanga serivise zo gutwara abantu mu kirere, ibigo bicuruza indege zaba iza gisivire n’iza gisirikare, abayobozi b’ibibuga by’indege n’abandi, mu nama mpuzamahanga y’iminsi ibiri yasojwe ejo hashize ku wa Kane.

Magingo aya Sosiyete ya RwandAir ifite indege 12 nk’uko byemezwa na Minisiteri y’ibikorwaremezo, uyu mwaka ukazasiga yungutse izindi ndege enye.

Minisitiri Gatete Ati “Muri uyu mwaka 2019, u Rwanda rwiteze kwakira izindi ndege nshya, kugeza ubu indege y’u Rwanda ya RwandAir ikora ingendo zijya ku migabane itandukanye yaba iyo muri Afurika, u Burayi, Aziya n’ahandi.

Naho umuyobozi w’Inama y’ubutegetsi y’Umuryango IATA, ikigo gishinzwe gukurikirana no gufasha ubwikorezi bwo mu kirere bwujuje ubuziranenge, Akber Al Baker avuga ko urwego rwo gutwara abantu rumaze kugira uruhare mu iterambere ry’ubukungu bw’ibihugu by’Umugabane w’Afurika, aho rumaze gutanga 4% ku musaruro mbumbe GDP w’ibihugu biwugize.

Umunyamabanga wa Leta ushinzwe gutwara abantu n’ibintu muri Minisiteri y’Ibikorwa Remezo, Eng. Uwihanganye Jean de Dieu yijeje ko u Rwanda rushobora kuba igicumbi k’ibijyanye n’ingendo zo mu kirere muri Afurika, ari na bimwe mu byatumye iyi nama ibera muri Afurika.

Yagize ati “Bakoresheje ubushishozi ndetse n’ibiganiro bitandukanye hamwe n’inzego zifite aho zihuriye n’ubwikorezi bwo mu kirere, tubasha kumvikana ko inama ireba Afurika igomba kubera kuri uyu mugabane kandi twizera ko bizakomeza.”

Yakomeje avuga ko “twifuza ko u Rwanda rwazajya ruyakira n’ikindi gihe byose bizagerwaho biturutse ku mbaraga igihugu cyatangiye gushyira mu kubaka ibikorwa remezo n’ibindi.”

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.