17°C , Partly cloudy | Kigali-Rwanda
Rwamuganza Caleb, Umunyamabanga uhoraho muri MINECOFIN( Foto Munyantwali)

U Rwanda rwifuza ubwizigame bw’abaturage bungana na 20%

Yanditswe na Sezibera Anselme

Ku ya 26-02-2019 saa 08:28:14

Umunyamabanga Uhoraho muri Minisiteri y’Imari n’Igenamigambi MINECOFIN, Rwamuganza Caleb, agaragaza ko u Rwanda rukeneye ubwizigame bw’abaturage bungana na 20% by’umusaruro mbumbe w’igihugu (DGP) rukazabigeraho rushishikariza abaturage barwo kwizigama no gushyigikira gahunda yiswe “Ejo Heza”.

Rwamuganza atangaza ko kwizigama kw’abaturage byitezweho uruhare mu kongera ingengo y’imari y’igihugu mu bihe biri imbere kandi bizagerwaho hifashishijwe gahunda yatangijwe mu bihe bishize yiswe “Ejo Heza”.

Avuga ko hashize igihe gito MINECOFIN itangije ku mugaragaro gahunda nshya yo kwizigama yiswe “Ejo Heza”, kugira ngo hongerwe ubwizigame bw’abaturage mu Rwanda bitewe n’umuvuduko w’iterambere igihugu kifuza, ukanareba umubare w’Abanyarwanda n’ubwizigame bafite usanga bukiri hasi cyane.

Rwamuganza agira ati: “Hagendewe ku bwizigame bw’Abanyarwanda, imibare ya 2017 igaragaza ko ubwizigame buri hafi 10.6% bw’umusaruro mbumbe w’igihugu (DGP). Kandi nyamara usanga iterambere twifuza kuba twageraho nk’igihugu bwagombye kuba buri kuri 20%”.

Akomeza avuga ko iyo gahunda ya Ejo Heza yaje yunganira izindi zari zihari zo kongera ubwizigame mu gihugu. Avuga ko za SACCO zitangizwa byari bigamije kongera ubwizigame bw’Abanyarwanda.

Avuga ko ubusanzwe ubwizigame bumenyerewe ari ubutangwa n’Ikigo cy’ubwiteganyirize butangwa na RSSB bugakorwa hagati y’umukozi n’umukoresha ariko haba hatekerezwa ubundi buryo bwagera kuri buri wese.

Uretse ubwizigamire bw’iyo gahunda, Rwamuganza asobanura ko bunafite akamaro ko kugira ubwishingizi mu gihugu nk’uko Leta yabyiyemeje yemera ko uzayitabira izamufatira ubwishingizi bityo uwagira impanuka cyangwa agatakaza ubuzima umuryango we wagira icyo uhabwa.

Rwamuganza avuga ko iyo ubwishingizi bugeze mu baturage bigaruka bigakusanya amafaranga menshi aza gufasha mu iterambere ry’igihugu.

Agira ati: “Tumaze kugenzura tugasanga ubwo bwishingizi na bwo buri hasi, ni bwo twiyemeje gutangiza ibintu 2 birimo ubwizigame mu baturage n’ubwishingizi bubashe kuba bwazamuka. Ibyo iyo tubikoze usanga ku bwishingizi mu gihe k’imyaka hafi 3 usanga amafaranga Leta itanze n’ayo abaturage batanze bizaba bigera nko muri miliyoni 20 kandi zose ntizihita zitangwa ku bantu bitabye Imana ahubwo zijya mu bubiko bufasha mu iterambere ry’igihugu.”

Avuga ko amafaranga nk’ayo agira impinduka nziza ku mabanki kuko ziyacuruza agakorwamo imishinga iremereye ifitiye abaturage akamaro bityo Leta ntigumye gusohora amafaranga yinjira mu bikorwa.

Abadepite bifuje kumenya ingamba MINECOFIN ifite mu gukangurira abaturage kurangwa n’umuco w’ubwizigame, Rwamuganza avuga ko MINECOFIN yabashije gushyira abakozi bayo ku rwego rw’akarere kugira ngo babashe kwegera abaturage banabashishikariza.

Akomeza avuga ko hakorwa ibiganiro ku bitangazamakuru binyuranye mu rwego rwo kwereka abaturage akamaro ko kwizigama.

MINECOFIN isanga abaturage bakwiye ingamba zitandukanye zunganira izihari kandi izihari zikabyazwa umusaruro urenze uko uyu munsi ziwutanga mu rwego rwo kunganira ingengo y’imari.

TANGA IGITEKEREZO

One Comment on “U Rwanda rwifuza ubwizigame bw’abaturage bungana na 20%”

  1. Ariko c mwebwe ntanubwo mubwira abanyarwanda inyungu muzabaha mugihe bizigamiye muri ejo heza? Niba cash zacu mugiye kuzicuruza muma bank , mwagombye kuduha inyungu bikadutera akanyabugabo kokuyazigama…..Naho ubundi muzategereza he mubure……ESE ubundi ko nshimye nafunguye account ya Ejo heza ,ubundi mwebwe abayobozi mwafashe iyambere mukuzifungura? ko ari named muyafite

Leave a Reply

Your email address will not be published. Required fields are marked *