26°C , Partly sunny | Kigali-Rwanda
Bamwe mu bitabiriye kwizihiza umunsi wo kwibohora kw'Afurika, biganjemo abagize Ihuriro riharanira kwigenga kw'Afurika (Foto Gisubizo G.)

U Rwanda rwifatanyije n’Afurika kwizihiza kwibohora kwayo

Yanditswe na MUGISHA BENIGNE

Ku ya 26-05-2018 saa 11:30:31

U Rwanda rwifatanyije n’Afurika kwizihiza umunsi wo kwibohora k’uyu mugabane kimwe n’ibindi bihugu, Insanganyamatsiko yawo ikaba yagarutse ku ruhare rw’imiyoborere, ubucuruzi, itangazamakuru n’ihangwa ry’inganda nko kwibohora kuzuye kw’Afurika.

Bamwe mu bitabiriye kwizihiza umunsi wo kwibohora kw’Afurika, biganjemo abagize Ihuriro riharanira kwigenga kw’Afurika (Foto Gisubizo G.)

Umuhango wo kwizihiza uyu munsi nyafurika wo kwibohora wahurije hamwe impuguke n’abayobozi banyuranye b’Ihuriro rigamije kwigenga kw’Afurika (Pan-African Movement) ishami ry’u Rwanda. Baganiriye ku cyateza imbere Afurika n’Abanyafurika, bibanda cyane ku bunyafurika, nk’ingengabitekerezo ikwiye kubahuza bagakorera hamwe mu rwego rwo kuzahura uyu mugabane.

Afungura ku mugaragaro ibi biganiro, Minisitiri w’Ubutegetsi bw’igihugu Kaboneka Francis, yabanje gushima igitekerezo cyo kwihuza kw’Afurika cyabayeho, aho ibihugu bigize uyu mugabane byihaye intego yo kwishyira hamwe no gukorera hamwe.

Ati: “Afurika yagize igihe cy’ubukoloni igira n’igihe cy’ubwigenge, kuri ubu irashyira hamwe ngo ishakishe icyayiteza imbere, ubunyafurika bukwiye guhuza abaturage b’Afurika mu kuzahura uyu mugabane.”

Musoni Protais uyobora Ihuriro rigamije kwigenga kw’Afurika ishami ry’u Rwanda, yagarutse ku kwigira kw’Afurika kimwe mu biranga kwibohora kwayo, asaba Abanyafurika gushyira hamwe no kuzahura umugabane wabo kuko ufite ubukungu n’abahanga babasha kububyaza umusaruro.

Yagarutse ku mpamvu kwibohora kw’Afurika kwatumye hashingwa umuryango w’Ubumwe bw’Afurika (OUA) wabonye izuba taliki ya 25 Gicurasi 1963 ari nayo tariki yashingiweho mu kwizihiza uyu munsi mu bihugu by’Afurika hibukwa ko Afurika yarwanye inkubiri yo kubona ubwigenge bikarangira bubonetse.

Ati “Kwizihiza uyu munsi ngarukamwaka byerekana intambwe iterwa n’abaturage b’Afurika mu bikorwa byo kwibohora kandi byerekana intego y’abaturage b’Afurika iganisha ku kwishyira ukizana.”

Kuri uyu munsi wo kwizihiza kwibohora kw’Afurika hatanzwe ibiganiro binyuranye bijyanye n’uburyo Afurika yakwibohora byuzuye.

Ikiganiro cya mbere cyavugaga ku Ndangagaciro y’ubunyafurika nk’inkingi ya mwamba y’imiyoborere myiza, kerekana uburyo Afurika ikwiye kwimakaza imiyoborere myiza ituma Abanyafurika batera imbere bakanagira umuco w’ubufatanye muri byose.

Ikiganiro cya kabiri cyagarutse ku buryo bwakoreshwa mu gushyira mu bikorwa amasezerano y’ubucuruzi bwambukiranya imipaka yasinywe hagati y’ibihugu by’Afurika, ahagarutswe ku miryango y’ubukungu mu turere tunyuranye tw’Afurika nka COMESA, SADC, EAC, AKOAS n’indi ko ikwiye gushyira hamwe igahuza Afurika yose, bityo ibihugu bikagira ubuhahirane hagati yabyo.

Ikiganiro cya gatatu cyo cyagarutse ku kugira itangazamakuru no guhanga inganda nk’umurongo ngenderwaho w’ubunyafurika.

Abafashe amagambo bose bahurije ku kintu kimwe cyo guhuza imbaraga, kwishyira hamwe kw’Abanyafurika bagamije kuzahura umugabane wabo no kwigenga mu buryo bwuzuye.

TANGA IGITEKEREZO

Leave a Reply

Be the First to Comment!

avatar