17°C , Mostly cloudy | Kigali-Rwanda

U Rwanda rweretse Afurika ko guhashya ruswa bishoboka

Yanditswe na Ntawitonda Jean Claude

Ku ya Dec 24, 2018 saa 6:37

U Rwego rw’Umuvunyi rugaragaza ko ari intambwe ikomeye kuba ibihugu by’Afurika bikomeje kwigira ku Rwanda imikoranire myiza ya Leta, abikorera na Sosiyete Sivile mu rugamba rwo guhashya ruswa.

Ikegeranyo giherutse gukorwa n’umuryango Transparency Internatinal kerekana ko u Rwanda ruri ku mwanya wa 48 ku Isi n’amanota 55%, rukaba urwa gatatu muri Afurika, mu Karere k’Ibiyaga Bigari n’Afurika y’Iburasirazuba rukaza ku mwanya wa mbere.

Mu myaka igera kuri 20 ishize, u Rwanda rwongereye amanota arenga 30 mu kurwanya ruswa, gusa Urwego rw’Umuvunyi ruhamya ko hakiri urugendo runini kuko bishoboka kuba intangarugero ku Isi.

Urwego rw’Umuvunyi rufatanya n’izindi nzego nka Polisi y’Igihugu, Ubushinjacyaha Bukuru, Urugaga rw’Abikorera, Transparency International Rwanda mu gukumira no kurwanya ruswa.

Uru rwego ruba no mu mashyirahamwe mpuzamahanga arimo Ishyirahamwe ry’inzego zishinzwe kurwanya ruswa mu Burasirazuba bw’Afurika (East African Association of Anti-Corruption Authorities/ EAAACA), iryo mu muryango w’ibihugu bivuga Icyongereza (Association of Anti-Corruption Agencies in Commonwealth Africa/AAACA), Ihuriro Nyafurika ry’Abavunyi (African Ombudsman and Mediators Association/AOMA) n’andi.

Mu kwezi k’Ugushyingo, u Rwanda rwakiriye inama zateguwe n’iyi miryango ziga ku ngamba zo kurwanya ruswa muri Afurika, abahagarariye ibihugu byabo banyurwa n’ubunararibonye bigiye ku Rwanda.

Inama yateguwe n’Ihuriro Nyafurika ry’Abavunyi yahurije ibihugu 40 bya Afurika i Kigali tariki 27-30 Ugushyingo 2018, byiga ku ruhare rw’Abavunyi bo mu bihugu by’Afurika mu guteza imbere imiyoborere myiza, gukorera mu mucyo no kubaka ubunyangamugayo mu nzego z’ubuyobozi.

Rumaziminsi Ntagwabira Seraphin, Umuyobozi w’ishami rishinzwe gukumira no kurwanya akarengane mu Rwego rw’Umuvunyi, yashimangiye ko abahagarariye ibihugu byabo bitabiriye inama bakuye amasomo menshi ku Rwanda.

Yagize ati “Twabasangije ku bunararibonye bw’u Rwanda aho Leta idakora yonyine ahubwo ifatanya n’izindi nzego zaba izigenga, na Sosiyete Sivile mu kugenzura uko igihugu kiyobowe n’uko inzego zifatanya mu kurwanya ruswa.”

Yakomeje avuga ko iyi nama yaje ikurikiye iya EAAACA yabaye tariki 19 kugeza kuri 23 Ugushyingo 2018, yitabiriwe n’abahagarariye ibihugu 7 mu munani bigize uwo muryango.

Gashumba Jeanne Pauline Umuyobozi w’Ishami rishinzwe Gukumira Ruswa yasobanuye ko iyi nama yize ku nsanganyamatsiko igira iti “Gutsinda urugamba rwo kurwanya ruswa mu Burasirazuba bw’Afurika, ibyo twakwigiraho n’imbogamizi zigihari.”

U Rwanda na rwo rwungukiye byinshi ku buhamya bw’ibindi bihugu byitabiriye izi nama, rwiyemeza gukomeza guteza imbere ubufatanye mu kurwanya ruswa n’ibindi byaha ku mugabane w’Afurika.

IBIKORWA BY’ICYUMWERU CYAHARIWE KURWANYA RUSWA

Urwego rw’Umuvunyi rwafatanyije n’inzego zitandukanye mu gutegura Icyumweru cyahariwe kurwanya ruswa cyatangiye tariki ya 4 kugeza ku ya 9 Ukuboza 2018, ahizihizwa Umunsi Mpuzamahanga wahariwe kurwanya ruswa.

Insanganyamatsiko y’u Rwanda muri uyu mwaka iragira iti “Gutsinda urugamba rwo kurwanya ruswa, iterambere rirambye ry’u Rwanda.”

Gashumba Jeanne Pauline yagize ati “Nitubasha gutsinda ruswa tuzagera ku iterambere rirambye Igihugu cyifuza. Igihugu kirimo ruswa nticyagera ku iterambere kuko usanga amafaranga yakagombye gukoreshwa mu iterambere ajya mu mifuka ya bamwe.”

Muri iki cyumweru Abanyarwanda bagenewe ubutumwa burushaho kubasobanurira ingaruka za ruswa banakangurirwa kugira uruhare mu kuyirandura. Ubutumwa bwatanzwe mu Nteko z’Abaturage mu gihugu hose ariko by’umwihariko mu Turere twa Kicukiro, Nyarugenge na Gasabo abakozi b’Urwego rw’Umuvunyi bitabiriye Inteko z’Abaturage banatanga ubutumwa bwo kurwanya ruswa.

Hateguwe kandi Umunsi w’Abagore mu kurwanya ruswa wabaye ku itariki ya 5 Ukuboza 2018 ku rwego rw’Intara n’Umujyi wa Kigali. Uyu munsi wateguwe mu rwego rwo kuzirakana uruhare rw’umugore mu iterambere ndetse no kongera kubashishikariza gushyira imbaraga mu kurwanya ruswa batoza abana uburere bwiza bityo bagakura banga ruswa. Ku rwego rw’Igihugu, uyu munsi wabereye mu Turere twa Kicukiro, Karongi, Rwamagana na Musanze.

Abanyarwanda barasabwa kuzirikana ko ruswa ari umwanzi w’ibyiza idindiza iterambere kandi ikamunga ubukungu bw’Igihugu.

Barahamagarirwa kumva ko kurwanya ruswa ari inshingano za buri wese bityo twese dukwiye gufatanyiriza hamwe tukayirwanya.

Abahagarariye ibihugu byabo bishimiye ubunararibonye bigiye ku Rwanda mu kurwanya ruswa

Abitabiriye inama bishimiye uburyo bakiriwe, biyemeza kuba b’Ambasaderi b’u Rwanda rwiza biboneye

Ambasaderi w’u Budage mu Rwanda, Perezida wa EAAACA, Umuvunyi Mukuru, Chairperson wa Komisiyo Nyafurika ishinzwe kurwanya ruswa na Minisitiri muri Perezidansi afungura inama ku mugaragaro

Bamwe mu bitabiriye inama rusange ya AOMA

Umuvunyi Mukuru Anastase Murekezi mu nama rusange ya EAAACA