18°C , Showers | Kigali-Rwanda
Minisitiri w'Imari n'Igenamigambi Dr Ndagijimana Uzziel, na Visi Perezida wa Banki y'Isi, Hafez Ghanem, bashyira umukono kuri aya masezerano. Ifoto.James.

U Rwanda rwemerewe miliyari 54 zo kwita ku mpunzi n’abaturanyi bazo

Yanditswe na Nshimyumukiza Janvier Popote

Ku ya 16-05-2019 saa 10:51:06

Banki y’Isi yemereye u Rwanda miliyoni 60 z’Amadolari (hafi miliyari 64 z’Amafaranga y’u Rwanda), agenewe kwita ku mpunzi ibihumbi 136 zicumbikiwe n’u Rwanda, n’abaturanyi bazo.

Ni ubufasha bwitezweho kugira uruhare rukomeye mu gukemura ibibazo by’impunzi birimo inzara n’imibereho mibi ishingiye ku bukene kuko inkunga zagenerwaga yagabanutse.

Aya masezerano yashyizweho umukono na Minisitiri w’Imari n’Igenamigambi, Dr Ndagijimana na Visi Perezida wa Banki y’Isi ushinzwe Afurika, Hafez Ghanem, kuri uyu wa 16 Gicurasi.

Minisitiri w’Imari n’Igenamigambi Dr Ndagijimana Uzziel, na Visi Perezida wa Banki y’Isi, Hafez Ghanem, bashyira umukono kuri aya masezerano. Ifoto.James.

Agabanyijemo ibice bibiri birimo impano ya miliyon 35 z’Amadolari, n’inguzanyo ya miliyoni 25 z’Amadolari izishyurwa ku nyungu ya 0,75% mu gihe cy’imyaka 38.

Minisitiri Ndagijimana avuga ko aya mafaranga “agenewe guteza imbere imibereho y’impunzi n’abaturage baturiye inkambi z’impunzi babarirwa muri miliyoni ebyiri, hibandwa ku bikorwa remezo by’ibanze nk’amashuri n’amavuriro ahuriweho n’ibyo bice byombi.”

Biteganyijwe kandi ko “hazashyirwaho ibikorwaremezo by’imihanda, n’amazi, hanashyirwa ingufu mu bijyanye no kwihangira imirimo ndetse no kubungabunga ibidukukije”, nk’uko Minisitiri Ndagijimana abihamya.

Iyi nkunga ya Banki y’Isi ije gushyigikira gahunda zisanzwe zihuriweho na Leta y’u Rwanda n’Umuryango w’Abibumbye mu nkambi z’impunzi ziri mu turere dutandatu tw’u Rwanda.

Mu mwaka ushinze impunzi zatangiye guhabwa amakarita ndangampunzi azifasha kubona imirimo, gufunguza amakonti muri banki n’ibindi bikorwa biziteza imbere mu gihugu.

Minisitiri ushinzwe Ibikorwa by’Ubutabazi, Eng. Kamayirese Germaine, avuga ko 80% by’impunzi zimaze guhabwa indangampunzi, mu gihe abasigaye bakigenzurwa.

Ati, “U Rwanda rucukumbikiye impunzi hafi ibihumbi 150, u Rwanda rwiyemeje kuziha indangampunzi zose uko zingana, ariko hagomba kubaho kureba niba ari impunzi, tumaze gutanga indangampunzi hafi 80%, abandi tutaraha indangampunzi turacyasuzuma niba koko ari impunzi.”

Gutanga indangampunzi byakurikiwe, umwaka ushize, n’igikorwa na cyo kiri mu rwego rwo gufasha impunzi gutembera no gushaka imibereho, cyo kuziha paseporo z’ikoranabuhanga.

Ibi byose ariko byaje bikurikiye igabanuka ry’ubufasha Ishami rya Loni rishinzwe kwita ku Mpunzi (UNHCR) ryageneraga impunzi, ndetse zitangira gufashishwa amafaranga aho guhabwa ibiribwa.

Igabanuka ry’ubufasha izi mpunzi zahabwaga, Minisitiri w’Ubutabazi, Eng Kamayirese Germaine, arihuza n’impamvu u Rwanda rwasabye inguzanyo muri Banki y’Isi.

Ati, “Inkunga yavaga muri humanitarian aids (imiryango ifasha imbabare) yagiye igabanuka, ni yo mpamvu u Rwanda rwafashe iyi nguzanyo (muri Banki y’Isi) ngo rubashe gufasha impunzi n’abaturage baturanye, babana umunsi ku munsi, muri za Gisagara dufite imirima myinshi ihingwa n’impunzi zifatanyije n’abaturage b’Abanyarwanda, bizafasha gukemura ibibazo by’inzara…”

Ibumoso ni Minisitiri ushinzwe Ibikorwa by’Ubutabazi, Eng Kamayirese Germaine, mu muhango wo gushyira umukono ku masezerano y’inkunga ya Banki y’Isi igenewe kwita ku mpunzi

Visi Perezida wa Banki y’Isi ushinzwe Afurika, Hafez Gahnem, yashimiye u Rwanda uko rwita ku mpunzi, avuga ko bigaragaza ukuntu u Rwanda rushyigikiye ubumwe bw’Abanyafurika.

Usibye izi miliyari 60 z’Amadolari agenewe gufasha impunzi n’abaturiye inkambi z’impunzi, Banki y’Isi yasinyanye nanone amasezerano n’u Rwanda ya miliyari 71 agamije guteza imbere urwego rw’ubuhinzi n’ubworozi mu Rwanda.

Bitaganyijwe ko miliyoni 17 z’Amadolari zitangwa muri uyu mwaka w’ingengo y’imari (2018/2019), andi akazatangwa mu byiciro bibiri mu myaka ibiri itaha, nk’uko byemejwe n’impande zombie zayashyizeho umukono kuri uyu wa 16 Kamena 2019.

Iburyo ni Minisitiri w’Imari n’Igenamigambi Dr Ndagijimana Uzziel, ahererekanya amasezerano y’inkunga na Visi Perezida wa Banki y’Isi, Hafez Ghanem. Ifoto.James.

Isinywa ry’aya masezerano ryitabiriwe n’abayobozi batandukanye ndetse n’abanyamakuru

TANGA IGITEKEREZO

Leave a Reply

Your email address will not be published. Required fields are marked *