18°C , Mostly cloudy | Kigali-Rwanda
Anaclet Kalibata uyobora Urwego rw'Igihugu rw'Abinjira n'Abasohoka ashyikiriza impunzi urwandiko rw'inzira ruyemerera kujya hanze y'u Rwanda

U Rwanda rwatangiye guha inzandiko z’inzira impunzi zaruhungiyemo

Yanditswe na TWAGIRA WILSON

Ku ya 10-10-2018 saa 16:17:46

Umuyobozi w’Urwego rw’Igihugu rushinzwe abinjira n’abasohoka, Anaclet Kalibata, aravuga ko hari inzandiko z’inzira ibihumbi 20 zagenewe impunzi.

Hari paseporo nk’izi ibihumbi 20 mu bubiko, ku ikubitiro kuri uyu wa Gatatu hakaba hatanzwe paseporo eshanu

Impunzi yahawe urwo rwandiko ishobora kuva mu Rwanda ikajya hanze nko kwiga, kwivuza, gusura imiryango, cyangwa mu bikorwa by’ubucuruzi, uretse igihugu yahunze.

Ku ikubitiro impunzi eshanu bacumbitse mu Mujyi wa Kigali ni zo zahawe izi nzandiko z’inzira, kuri uyu wa 10 Ukwakira 2018.

Minisitiri ushinzwe imicungire y’ibiza n’ibibazo by’impunzi, Debhoneur Jeanne D’arc, yavuze ko gutanga iki cyangombwa ari umuhigo u Rwanda rwesheje.

Yagize ati, “Ubusanzwe kubona icyangombwa nk’iki byajyaga binyura mu nzira ndende, ndetse bigasaba ko dosiye ibanza kunyura i Geneve.”

Minisitiri w’Imicungire y’Ibiza n’Impunzi, Madame De Bonheur Jeanne d’Arc ashyikiriza impunzi paseporo

Yizera ko uru rwandiko rw’inzira ruzafasha impunzi kujya hanze y’u Rwanda mu gihe hari serivisi baba bakeneyeyo.

Ibi bishimangirwa na Ahmed Baba Fall wari uhagarariye Ishami ry’Umuryango w’Abibumbye ryita ku mpunzi (UNHCR), ushima intambwe u Rwanda ruteye.

Ati “Icyangombwa impunzi zihawe, ni imwe muri gahunda enye u Rwanda rwari rwaremeye gufasha impunzi kuzishyira mu bikorwa none turishimira ko bishobotse.”

Yunzemo ati “Turizera ko n’ikibazo impunzi zifite cy’uko bafashwa kubona ubwishingizi bwo kwivuza, tugiye kuganira na MIDAMAR, hamwe n’izindi nzego kandi turizeza ko bizakemuka vuba.’’

Uru rwandiko rw’inzira, rukoranywe ikoranabuhanga kandi rusomwa n’imashini buri wese adashobora kwigana, nk’uko byasobanuwe na Anaclet Kalibata.

Rugomba kumara imyaka itanu mu gihe urwari rusanzwe rwamaraga imyaka ibiri, kurubona bikaba bisaba amafaranga ibihumbi 10.

Anaclet Kalibata yavuze ko impunzi zose zizahabwa izi nzandiko z’inzira, ati “n’abari mu nkambi bemerewe gusaba bakazihabwa”

Anaclet Kalibata uyobora Urwego rw’Igihugu rw’Abinjira n’Abasohoka ashyikiriza impunzi urwandiko rw’inzira ruyemerera kujya hanze y’u Rwanda

Yunzemo ati “Ikiza cy’uru rwandiko rwagenewe impunzi ni uko rwemewe n’umuryango mpuzamahanga rwa ICAO, kandi rukaba rwujuje ubuziranenge.’’

Avuga ko kubera uru rwandiko, ubu agiye kwisanzura akajya no guhahirana n’abandi bantu mu rwego rw’Akarere n’Afurika.

Icyangombwa k’inzira gihawe impunzi kigenwa n’amasezerano yo ku wa 28 Nyakanga 1951.

TANGA IGITEKEREZO

Leave a Reply

Your email address will not be published. Required fields are marked *