21°C , Partly sunny | Kigali-Rwanda
Minisitiri w'Uburezi Dr. Mutimura Eugene asobanurirwa uko umushinga wo gupima imyuka ihumanya ikirere ingana mu Rwanda no ku isi (Foto Samuel M)

U Rwanda rwatangije ikigo mpuzamahanga gipima imyuka ihumanya ikirere

Yanditswe na Mutungirehe Samuel

Ku ya 11-01-2019 saa 15:50:52

U Rwanda rwatangije ikigo mpuzamahanga gifite laboratwari ipima imyuka itera imihindagurikire y’ikirere (Greenhouses).

Icyo kigo cyitezweho gutuma u Rwanda rugira uruhare mu gufata ibyemezo mpuzamahanga mu kurengera imihindagurikire y’ibihe biturutse ku bipimo bitangwa n’iyo laboratwari y’ikitegererezo.

Ni ikigo k’ikitegererezo kiri muri Kaminuza y’u Rwanda mu ishami ry’Ubumenyi n’Ikoranabuhanga Nyarugenge, ahari laboratwari y’umushinga “Rwanda Climate Observatory Project”.

Iyo laboratwari ifite icyuma kitwa Medusa n’ibindi bitandukanye gipima ingano y’imyuka myinshi igera kuri 50 iri mu kirere isohorwa n’ibindi bitandukanye, kikerekana n’aho ari ho hose ku Isi iyo myuka irimo guturuka.

Minisitiri w’Uburezi, Dr. Mutimura Eugene, watashye iyo laboratwari y’ikitegererezo iri muri icyo kigo, yavuze ko hashize imyaka igera kuri itanu icyo kigo kigwaho, habanza gushakwa abanyeshuri b’u Rwanda bajya kwiga ibijyanye no kugikoresha muri Kaminuza ya Massachusetts muri Leta Zunze Ubumwe z’Amerika ku busabe bwa Perezida Paul Kagame.

Ati: “Ni igikorwa gikomeye cyane kuko bidufasha kugira ngo tumenye icyo twakora hakurikijwe ingamba Leta yafashe zitandukanye zo kugira ngo imyuka ihumanya ikirere igabanuke. Urugero, mujya mubona ko imodoka bazibuza ko zigira imyuka myinshi kuko imyuka myinshi mibi ituma ikirere cyangirika. Uburyo bwa kabiri ni ugutera amashyamba, bituma ikirere cy’u Rwanda n’Isi kigira imyuka myiza hakaza n’uburyo bwo kubuza Abanyarwanda ko bacana ibiti kuko bituma ya myuka iba myinshi cyane.”’

Minisitiri w’Uburezi Dr. Mutimura Eugene asobanurirwa uko umushinga wo gupima imyuka ihumanya ikirere ingana mu Rwanda no ku isi (Foto Samuel M)

Minisitiri yakomeje avuga ko kandi gushyiraho icyo kigo bijyana n’uko u Rwanda rwiyemeje gushyira umukono ku masezerano y’i Paris mu Bufaransa aherutse kuvugururirwa mu Rwanda mu Kwakira 2016, aho ibihugu by’Isi byiyemeje kugabanya ubushyuhe bw’Isi nibura dogere imwe mu myaka iri imbere.

Ati: “Muri Afurika iki kigo ni cyo cya mbere ndetse ibyuma bikoreshwamo nibishyirwa ku kirunga cya Kalisimbi bizatuma dushobora gupima imyuka y’ikirere iva hirya no hino ku Isi, cyane cyane mu bihugu byo ku mugabane w’Aziya, Afurika y’Iburasirazuba n’ahandi kugeza muri Amerika y’Epfo.”

Dr. Gasore Jimmy, Umunyarwanda umwe kugeza ubu wakuye impamyabumenyi y’ikirenga muri Kaminuza ya Massachusetts, mu byo gupima imyuka ihumanya ikirere, akaba n’umwarimu wigisha ubumenyi bw’ikirere, ukuriye iyo laboratwari yasobanuye ko uwo mushinga watangiye mu 2011 ibikoresho bitangira kuboneka mu 2013.

Yavuze ko icyo gikoresho, Medusa, gipima imyuka yose yangiza akayunguruzo k’izuba, kuva cyatangira gukoreshwa ku Isi mu 1979 hapimwa imyuka ya (CFCs) yangiza akayunguruzo k’izuba igengwa n’amasezerano ya Montreal (Montreal Protocol) kigenda kivugururwa kugeza ku kiri mu Rwanda kigezweho.

Dr. Gasore Jimmy asobanurira itangazamakuru uko icyuma cya Medusa gipima uko imyuka ingana, kuva ku yo mu gikoni kugeza kw’iva hanze y’u Rwanda kiri ahantu hamwe (Foto Samuel M) (1)

Yasobanuye ko baje kubona ko iyo myuka igenda yangiza akayunguruzo k’izuba (Ozone); mu 1989 amasezerano ya Montreal yabereye muri Canada yatumye iyo myuka bayisimbuza (HCFCs) bituma iyo myuka igabanuka ubu akayunguruzo k’izuba kakaba kameze neza.

Yongeyeho ko abahanga bakomeje gupima ahantu hageze kuri 12 ku Isi bakoresheje ibyo bikoresho bya Medusa uko byavugururwaga; mu 2016 basanga ya myuka ya HCFCs nubwo yafashije mu kurema akayunguruzo ka Ozone ariko itera imihindagurikire y’ikirere.

Ati: “Ni yo mpamvu bongeye guterana, baravuga ngo ya masezerano yo mu 1989 tuyahindure, bayahindurira hano i Kigali baravuga ngo na za HCFCs dushake uburyo twagenda tuzisimbuza indi myuka mizima idatera imihindagurikire y’ikirere.

Uyu munsi turimo kwishimira ko n’iki gikoresho twacyakiriye, turakomeza dupime, tuge tuvuga ngo mbese ko twasinye amasezerano ya hano i Kigali ya myuka koko irimo kugabanuka, nitagabanuka n’ubundi bazasaba ko habaho ibindi byemezo.”

Icyo gikoresho Medusa, ni cyo gikoresho cya mbere kigeze muri Afurika, ibindi biri ahandi 12 ku Isi mu bigo by’ubushakashatsi na kaminuza.

TANGA IGITEKEREZO

Leave a Reply

Your email address will not be published. Required fields are marked *