21°C , Partly cloudy | Kigali-Rwanda

“U Rwanda rwasogongeye ku ngaruka z’imihindagurikire y’ikirere”

Yanditswe na NTAWITONDA JEAN CLAUDE

Ku ya 22-05-2020 saa 08:22:19

U Rwanda rwabaye Igihugu cya mbere cy’Afurika gishyikirije Umuryango w’Abibumbye ingamba rwafashe mu kugabanya ibyuka bihumanya ikirere no guhangana n’imihindagurikire y’ibihe muri rusange, rukaba ari na kimwe  mu bihugu 9 gusa bimaze kugaragaza ingamba byafashe mu guhangana n’imihindagurikire y’ibihe.

Muri izo ngamba harimo ko ruzagabanya ibyuka bihumanya ikirere byibuze ku kigero cya 16% bitarenze mu mwaka wa 2030 rutabangamiye ibindi bikorwa by’iterambere .

Muri izo ngamba u Rwanda rwagaragaje ko niruramuka rubonye ingengo y’imari ikenewe ruzabasha kugabanya ibyuka bihumanya ikirere ku kigero cya 38% muri iyo myaka 10.

Impuguke zagaragaje ko bitewe n’ubwiyongere bw’ikoreshwa ry’ibikomoka kuri Peteroli, ingufu ndetse n’ubwikorezi, ibyuka bihumanya u Rwanda rwohereza mu kirere bishobora kuziyongera bikava kuri toni miriyoni 5.2 bikagera kuri toni miriyoni 12.1 hagati y’umwaka wa 2015 na 2013.

Leta y’u Rwanda yatangaje ko kugira ngo ibashe kugabanya imyuka ihumaya ku kigero cya 38%, hakenewe miriyari 11 z’amadilari y’Amadolari y’Amerika bityo bikazafasha kubabanya ibyo byuka bikagera kuri toni miriyoni 4.6.

Muri iyo ngengo y’imari biteganyijwe ko harimo miriyari 5.7 z’amadorari y’Amerika zizifashishwa mu kugabanya imyuka ihumanya (C02 ), izindi miriyari 5.3 zikifashishwa mu kwisuganya no kujyana n’imiterere y’iibihe.

Izo ngamba zizagerwaho ku bufatanye n’Umuryango Mpuzamahanga witezweho kugira uruhare rwa 60% by’iyo ngengo y’imari. U Rwanda ruvuga ko hakenewe ubufatanye ku rwego mpuzamahanga kuko ibihugu byose bisangiye ikirere kimwe, ku buryo ingufu z’umwe zidashobora gutanga umusaruro mu gihe Isi yose idashyize hamwe.

Minisiteri y’u Ibidukikije yashimangiye ko u Rwanda rwiyemeje gushyira mu bikorwa amasezerano y’i Paris yerekeye imihindagurikire y’ibihe, cyane ko ruri mu bihugu bikomeje kubona ingaruka z’imihindagurikire y’ikirere binyuze mu biza biterwa n’imvura idasanzwe.

Ubwiyongere bw’ibinyabiziga bujyana n’ubwiyongere bw’ikoreshwa ry’ibikomoka kuri peteroli bibonwa nk’imwe mu mpamvu zongera ibyuka bihumanya ikirere

Minisitiri  muri Minisiteri y’Ibidukikije Mujawamariya Jeanne d’Arc , yabwiye itangazamakuru ati: “Igihugu cyacu kirabara ibihombo biterwa n’imihindagurikire y’ikirere. Kuva uyu mwaka watangira, tumaze kubura ubuzima bw’abaturage 140, ibikorwa remezo bitandukanye, birimo inzu zirenga 3,000, bimaze gusenywa n’imyuzure ndetse n’inkangu.”

Nubwo imvura yagiye ibura mu myaka yashize, u Rwanda ruvuga ko imvura idasanzwe izakomeza kwiyongera hagati ya 5 na 10%.

Ubuyobozi Mukuru wungirije w’Ikigo k’Igihugu gishinzwe kwita no kurengera ibidukikije (REMA) buvuga ko ku bihugu bikiri mu nzira y’amajyambere usanga akenshi guharanira iterambere no guhangana n’imihindagurikire y’ikirere bigoye cyane, bityo ubufatanye bw’ibihugu byose bukaba ari ingenzi kugira ngo ingamba zashyiriweho kurinda ikirere zigerweho 100%.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.