22°C , Mostly sunny | Kigali-Rwanda
Perezida Kagame ageza ijambo ku bitabiriye umuhango wo Kwibohora ku nshuro ya 25

U Rwanda rwasize amateka ntiruzongera kuyoba – Kagame

Yanditswe na Twagira Wilson

Ku ya 04-07-2019 saa 14:54:08

Perezida Kagame yashimye ubutwari budasanzwe bw’abagize uruhare mu kubohora igihugu mu myaka 25 ishize, avuga ko u Rwanda rwasize amateka, ku buryo rutazongera kuyoba.

Yavuze ko Abanyarwanda bashishikajwe no gutegura ejo heza nk’umuryango umwe uhuje indangagaciro, ndetse zigatozwa n’abakiri bato.

Yabivugiye kuri Stade Amahoro mu muhango wo kwizihiza isabukuru y’imyaka 25 u Rwanda rwibohoye, mu muhango witabiriye n’abakuru b’ibihugu birindwi byo ku Mugabane w’Afurika.

Perezida Kagame muri uwo muhango yagarutse ku zari ingabo za RPA zari zaroherejwe mu Nteko Ishinga Amategeko zagaragaje ubutwari budasanzwe ubwo zagabwagaho ibitero bikomeye mu gihe cy’urugamba rwo kubohora igihugu kandi ziri kure ya bagenzi babo, ariko zikabasha kwitwara neza.

Ati “Ubu zimwe muri izo ngabo zari zirimo abasore n’inkumi ni bo babashije kurinda no guha umutekano Abanyarwanda barimo n’abacitse ku icumu, zimwe muri izo ngabo zitangiye igihugu zaharaniye kukibohora baba abariho n’abatakiriho, abandi bakagipfira, hari abandi bakiriho bagikomeje kugikorera n’ubwitange n’ubu, rero abo bose turabashimira cyane. Ntabwo u Rwanda ruzongera kuyoba rwasize amateka mureke turebe ejo hazaza twese nk’umuryango umwe usangiye indangagaciro kandi tuzishyigire tuzazitoze n’abana bacu bazadukonokaho.”

Perezida Kagame yavuze ko Ukwibohora nyakuri ari uko abaturage bagira uburenganzira mu gihugu, ubumwe, umutekano n’iterambere mu byo bifuza byose.

Yakomeje agira ati, “Abenshi mu bagize uruhare mu bikorwa byo kubohora iki gihugu barimo abagize ubutwari bwo kwitanga, nta handi bavanaga ubwo butwari, ni uko bari bazi uburenganzira bwabo n’agaciro kabo nk’Abanyarwanda ari na byo byabaye intandaro n’imbarutso yo gutangiza urugamba rwo kwibohora hagamijwe intego y’uko abantu baharanira kugira uburengznzira bumwe kandi bungana, kuko mu binyejana byashize, mu myaka myinshi yashize, Abanyarwanda bari barabaye nk’ibikoresho by’uwo ari we wese, by’umwihariko abakomeye bafite imbaraga, ibyo Ntabwo bizongera kubaho ukundi’’..

Minisitiri w’Ububanyi n’amahanga, Dr Richard Sezibera, yavuze ko nyuma y’urugamba rwo kubohora u Rwanda, ubu ari igihugu cyiyubashye, kandi gifite ubuzima bwiza gifite ubuzima kandi gitunze, kubera ubwitange bw’ingabo zitangiye ubuzima bwazo ziharanira amahoro. Ati “Abo bose hamwe n’abafafatanyabikorwa bacu mu rugamba rwo kwibohora na bo gushimwa’’.

Isabukuru yo kwibohora ku nshuro ya 25, yitabiriwe n’abakuru b’ibihugu barimo Faure Gnassingbé wa Togo na Hage Geingob wa Namibia, Perezida Faustin-Archange Touadéra wa Centrafrique, Perezida Emmerson Mnangagwa wa Zimbabwe, Perezida Mokgweetsi Masisi wa Botswana na Julius Maada Bio wa Sierra Leone, nabandi bahagarariye ibihugu byabo.

Inkuru yabanje: Kwibohora 25: Abakuru b’ibihugu barindwi bategerejwe mu Rwanda

TANGA IGITEKEREZO

Leave a Reply

Your email address will not be published. Required fields are marked *