18°C , Showers | Kigali-Rwanda
Minisitiri w'Intebe azimukira muri iyi nyubako muri Kamena 2019

U Rwanda rwashyikirijwe ibiro bishya bya Minisitiri w’Intebe

Yanditswe na Mutungirehe Samuel

Ku ya 22-04-2019 saa 12:55:09

Minisitiri w’Intebe Dr. Ngirente Edouard yatashye ku mugaragaro ibiro bishya by’iyo minisiteri byatanzwe na Guverininoma y’Abaturage b’u Bushinwa ku buntu.

Ibi biro byuzuye bitwaye miliyoni 27 z’Amadolari y’Amerika, bikazatumu Rwanda rugabanya amafaranga rwakodeshaga aho zimwe muri minisiteri zikorera n’ibigo bya Leta.

Ni inyubako nini igezweho, yuzuye mu mezi 33 imaze yubakwa n’u Bushinwa, iherereye i Kigali, Kimihurura iruhande rw’aho ibiro bya Minisitiri w’Intebe bisanzwe bikorera.

Iyi nyubako izakorerwamo ibiro bya Minisitiri w’Intebe n’izindi minisiteri n’ibigo bizamenyekana mu minsi iri imbere, izatangira gukorerwamo muri Kamena 2019.

Minisitiri w’Intebe azimukira muri iyi nyubako muri Kamena 2019

Minisitiri w’intebe Dr. ngirente Edouard, wakiriye iyo nyubako tariki ya 22 Mata 2019, yabanje gushimira u Bushinwa kuri iyo mpano itagereranywa, ashimangira ko ari ikimenyetso cy’uburyo umubano ku mpande zombi ugenda ukomera mu myaka 48 ishize.

Ati “Iyi nyubako y’ubuyobozi izakomeza gushimangira umubano mwiza hagati y’u Bushinwa n’u Rwanda. Reka nshimire ubushinwa guha u Rwanda ino nyubako nziza igezweho; izafasha abakozi bo mu biro bya Minisitiri w’Intebe n’abandi bazaturuka mu bigo bwite bya Leta gutanga serivisi nziza zujuje ireme kandi zihuse. U Rwanda ruzakomeza gukoresha ano mahirwe mu kugaragaza ubushake bwarwo umubano usanzwe uriho hagati y’u Bushinwa n’u Rwanda mu nyungu z’impande zombi.”

Visi-Perezida wa Sena y’u Bushinwa Zheng Jianbang, yavuze ko ashimishijwe n’uburyo umubano uri hagati y’ibihugu byombi ugenda ukura mu isura nziza.

Yavuze ko hari indi mishinga u Bushinwa buri kubaka mu Rwanda irimo ikibuga k’indege cya Bugesera, umuhanda wa Huye-Kibeho, kwagura imihanda mu Mujyi wa Kigali iri ku birometero 54, kwagura ibitaro bya Masaka n’indi mishinga itandukanye igera kuri 88 iri mu Rwanda.

Ati “Guverinoma y’u Bushinwa n’abaturage bayo biyemeje gufasha abaturage b’u Rwanda nk’abifasha kuko turi abavandimwe. Ndizera ko iyi nyubako izafasha Guverinoma y’u Rwanda.”

Si iyi nyubako gusa u Bushinwa buhaye u Rwanda ku buntu, hari n’ikoreramo Minisiteri y’ububanyi n’Amahanda n’iy’Ubucuruzi n’Inganda na yo yatanzwe n’u Bushinwa.

Iyi nyubako kimwe n’indi mishinga u Bushinwa bufite mu Rwanda ije nyuma y’ingendo abakuru b’igihugu byombi, Paul Kagame na Xi Jinping w’u Bushinwa baherutse kugira ku mpande zombi umwaka ushize 2018, aho hasinywe amasezerano atandukanye agamije gushimangira umubano.

Minisitiri w’Intebe Edouard Ngirente ageza ijambo ku bitabiriye umuhango wo gutaha ku mugaragaro inyubako nshya izakoreramo ibiro bya Misitiri w’intebe bishya Ifoto (Gentil)

Minsitiri w’Intebe Edouard Ngirente na Visi perezida wa Sena y’u Bushinwa bafungura inzu y’ibiro bishya bya minisitiri w’intebe Ifoto(Gentil G)

Amafoto yafashwe na Gisubizo Gentil

TANGA IGITEKEREZO

Leave a Reply

Your email address will not be published. Required fields are marked *