U Rwanda rwashimiwe ubwitange mu itangizwa ry’Isoko rusange ry’Afurika

Yanditswe na Imvaho Nshya

Ku ya 15-01-2021 saa 17:31:43

Kuri uyu wa Gatanu tariki ya 15 Mutarama 2021, u Rwanda rwafunguye ku mugaragaro Isoko Rusange ry’Afurika (African Continental Free Trade Area/AfCFTA) ryatangiye gushyirwa mu bikorwa guhera tariki ya 1 Mutarama uyu mwaka. 

Mu muhango witabiriye n’inzego zitandukanye zo mu Rwanda no ku mugabane w’Afurika, zirimo na Komisiyo y’Ubukungu y’Umuryango w’Abibumbye muri Afurika (UNECA), u Rwanda rwashimiwe uruhare rwagize mu guharanira ko iri soko ryari inzozi z’igihe kinini rishyirwa mu ngiro.

Ubuyobozi bwa UNECA bwagaragaje ko Leta y’u Rwanda yitanze bishoboka mu rugendo rutoroshye rwo gutangiza iryo soko, by’umwihariko Perezida wa Repubulika y’u Rwanda Paul Kagame wakoze ibikorwa bitandukanye mu bukangurambaga bw’itangizwa ry’iryo soko ribaye irya mbere ku Isi rihuje ibihugu byinshi.

Minisiteri y’Ubucuruzi n’Inganda mu Rwanda (MINICOM) yatangaje ko iri soko rusange rizatuma ibicuruzwa byo muri Afurika bigabanyirizwa imisoro ndetse urujya n’uruza rwabyo rurusheho koroshywa ari na ko abacuruzi bambuka imipaka y’ibihugu byo ku mugabane ntacyo bikanga.

Byitezwe ko kugera mu mwaka wa 2030 ibicuruzwa bihanahanwa mu bihugu by’Afurika bizaba byakuriweho umusoro ku byinjira ku rugero rwa 90%.

Minisitiri w’Ubucuruzi n’Inganda, Soraya Hakuziyaremye, yavuze ko ibicuruzwa bizajya byinjira mu gihugu cyangwa ibijyanwa hanze mu bihugu by’Afurika bigize Isoko Rusange, bizagenda bikurirwaho imisoro kuri za gasutamo ku rugero rwa 10% buri mwaka.

Minisitiri Soraya yagize ati: “Mu bikorerwa mu Rwanda bikomoka ku buhinzi n’ubworozi, ibikoresho by’ubwubatsi ndetse n’imyenda, ni bimwe mu byo tubona ko tuzakomeza kongera twohereza mu mahanga, ari na ko tuvanayo ibikoreshwa by’ibanze”.

Minisitiri Soraya avuga ko bafite amahirwe menshi muri Afurika y’Iburengerazuba, aho u Rwanda ruzajya ruvana ipamba rukayizana kuyitunganyiriza mu gihugu, rugashorayo imyenda rukora izaba yavuye muri iyo pamba.

AfCFTA, nk’isoko rinini ku Isi, yitezweho guhindura umugabane kuko ihuza abantu barenga miliyari 1.2 ndetse umusaruro wayo ukaba ubarirwa mu madolari y’Amerika akabakaba tiliyari 3 mu bihugu 54 bigize Umuryango w’Ubumwe bw’Afurika.

Imibare itangazwa na UNECA ishimangira ko Afurika y’Iburasirazuba yonyine izunguka miliyari 1.8 z’amadolari y’Amerika muri AfCFTA, kandi ishyirwa mu bikorwa rya AfCFTA rizasiga hahanzwe imirimo mishya isaga miriyoni 2 mu Karere.

Eritrea yonyine ni yo itarashyira umukono kuri ayo masezerano y’ubucuruzi, mu gihe ibihugu 54 byamaze gusinya na byo bikaba birimo 34 byashyikirije AU inyandiko zigaragaza uburyo bizashyira ayo masezerano mu bikorwa.

Nk’uko bigaragara mu itangazo ryatangajwe n’Umuyobozi wa Banki Nyafurika Itsura Amajyambere Adesina Akinwumwi, Perezida wa Repubulika y’u Rwanda Paul Kagame ari mu bayobozi 10 bagenewe ibihembo kubera uruhare rudashidikanywaho bagize mu gutuma iri soko riba impamo.

Amasezerano yo gutangiza AfFCTA yasinyiwe i Kigali tariki ya 21 Werurwe 2018, icyo gihe Perezida Kagame ni we wari Umuyobozi w’Umuryango w’Ubumwe bw’Afurika.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.