U Rwanda rwamuritse imodoka zikoresha amashanyarazi

Yanditswe na Rutayisire Emile

Ku ya 29-10-2019 saa 16:32:39
Minisitiri w'Intebe Dr. Ngirente Edouard uwa gatatu uvuye iburyo mu muhango wo gutangiza imwe mu modoka zikoresha amashanyarazi

U Rwanda rubaye Igihugu cya mbere muri Afurika mu gukoresha imodoka zikoresha amashanyarazi.

Minisitiri w’Intebe Dr. Edouard Ngirente avuga ko ibi bigaragaza ibyo u Rwanda rumaze kugeraho mu kurinda ibidukikije.

Kuri uyu wa  Kabiri, tariki 29 Ukwakira 2019, Dr. Ngirente ni we wafunguye ku mugaragaro izi modoka z’uruganda rwa Volkswagen zikoresha amashanyarazi. Ni uruganda rusanzwe rukorera imodoka mu Rwanda.

Minisitiri w’Intebe yagize ati: “Abanyarwanda bose bamaze kumenya ko kurinda ibidukikije ari inshingano yabo ya mbere. Ndizera ko gukora ingendo mu binyabiziga bitangiza ibidukikije bizagabanya ukwangirika kw’ibidukikije.”

Minisitiri w’Intebe yashimiye Volkswagen na Siemens ku mushinga w’indashyikirwa bakoze, agaruka ku gikorwa Perezida Kagame yakoze mu minsi ishize cyo gufungura uruganda rwa Mara Phones rukora terefoni za Smartphones mu Rwanda, avuga ko biragaragaza ko Igihugu gikomeje gutera imbere mu ikoranabuhanga.

Ati “Turifuza ko ubufatanye bwa Volkswagen na Siemens bwadukorera sitasiyo iha umuriro w’amashanyarazi imodoka.”

Abitabiriye uwo muhango bamurikiwe imodoka 4 zikoresha amashanyarazi zatangiye gukoreshwa mu Rwanda ziswe e-Golf, zakozwe ku bufatanye bwa Volkswagen n’ikigo cyo mu Budage, Siemens, kizajya gitanga uburyo bwo kongera umuriro w’amashanyarazi muri izo modoka.

Umuyobozi wa Volkswagen mu Rwanda, Rugwizangoga Michaella, yavuze ko e-Golf zitaratangira kugurishwa mu gihugu kubera ko bisaba ko habanza hakanozwa uburyo bwo kuzikanikira mu gihe zagize ikibazo, kubona abatekinisiye bahagije n’ibindi. Icyakora ngo bishobora gutangira vuba.

U Rwanda rubaye Igihugu cya mbere muri Afurika Volkswagen igeragerejemo imodoka zayo zikoresha amashanyarazi. Gushyira umuriro muri iyo modoka bimara iminota 45, umuriro iyo wuzuyemo neza ishobora kugenda ibirometero 230 ariko bitewe n’ubutumburuke bw’aho igenda n’ibindi.

Kugeza ubu ahantu ho gushyirira umuriro muri izi modoka ni ku ruganda rwa Volkswagen ruri i Masoro mu gice cyahariwe inganda, ariko hari gahunda yo gushyiraho ahandi hantu hagera kuri 15 mu gihugu abafite izo modoka bazajya babasha gushyiriramo umuriro.

Ikindi ni uko izi modoka zifite uburyo bwo kuba wakwishyiriramo umuriro uri iwawe mu rugo ukoresheje igikoresho kimeze nka sharijeri (Charger) ariko kugira ngo umuriro wuzure muri batiri y’imodoka neza bigasaba hagati y’amasaha 7 na 10 nk’uko byatangajwe na Serge Irakoze, umwe mu bahuguwe ku isonga mu gutwara izo modoka akaba ari mu bahugura abashya ndetse akaba abakuriye.

Ikintu kidasanzwe kuri izo modoka zikoreshwa n’amashanyarazi, ni uko iyo uyakije itavuga nk’izisanzwe zikoreshwa na lisansi cyangwa se mazutu, ahubwo ikwereka ko yatse muri taburo (Tableau) ndetse yahaguruka nta bwo wumva ivuga.

Ku kibazo cy’amatsiko niba abantu batazajya bikanga bayigiriye mu nzira ikaba yabagonga kuko batayumvise, Irakoze yagize ati “Nta kibazo kiriho rwose kuko utwaye aba areba aho agana, areba ibimukikije, imodoka ifite ihoni rikura abantu mu nzira ndetse n’amatara nayo ushobora kwaka uri mu muhanda akayibona ku buryo nta mpungenge y’impanuka iyo modoka yateza.”

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.