17°C , Partly cloudy | Kigali-Rwanda
Minisitiri w'Ikoranabuhanga no guhanga udushya Ingabire Paula areba icyogajuru, ari kumwe na Eng. Takayoshi Fukuyo

U Rwanda rwamurikiwe icyogajuru cyakozwe n’Abanyarwanda

Yanditswe na Mutungirehe Samuel

Ku ya 16-05-2019 saa 19:11:09

Itsinda rw’Abanyarwanda n’Abayapani ryamuritse icyogajuru cya mbere kitwa RWASAT Cyakozwe n’Abanyarwanda bafashijwe n’Abayapani, kigiye gufasha igihugu guteza imbere ubuhinzi, hasesengurwa amakuru atanzwe na cyo.

Ni icyogajuru gito, cyo mu bwoko bwa CubeSats, gifite santimetero (cm) 30 z’ubugari na cm 10 z’uburebure, gipima ibiro biri munsi ya bine, kimaze amezi 14 gikorwa kugeza ubu n’itsinda ry’Abanyarwanda 15 bamwe bari mu Rwanda, abandi batatu mu Buyapani n’abandi bari mu Leta Zunze Ubumwe z’Amerika bafashijwe n’Abanyeshuri b’Abayapani bo muri kaminuza ya Tokyo.

Minisitiri w’Ikoranabuhanga, Itumanaho na Innovation (guhanga udushya), Ingabire Paula, wamurikiwe icyo cyogajuru mu nama ya Transform Africa, tariki ya 16 Gicurasi 2019, yashimiye ubufatanye bwabaye ku mpande zombi mu kubaka icyo cyogajuru, avuga ko kubaka ubushobozi bw’Abanyarwanda ari intangiriro ya byinshi biri imbere.

Ati: “Ibi ni ubuhamya bw’ibyagiye bikorwa mu kubaka ubushobozi no mu gufasha abenjeniyeri b’Abanyarwanda kubaka iki cyogajuru.

Turashimira ubu bufatanye, kandi iri ni itangiriro rya gahunda y’u Rwanda ku bumenyi bw’isanzure kandi twiteze kuzagitaha mu mezi abiri ari imbere.”

Umwe mu banyarwanda bubatse icyo cyogajuru cyakorewe mu Buyapani, Twagirayezu Gaspard, ukora mu nama Nkuru y’ubumenyi n’ikoranabuhanga mu Rwanda, yavuze ko icya mbere cyari kigambiriwe ari ukubaka ubushobozi bw’Abanyarwanda.

Ati: “Iki ni icyogajuru kitwa RWASAT 1, bivuze ko hazaza n’ikindi n’ibindi; ibyogajuru nk’ibi bikaba bikoreshwa cyane cyane mu kubaka ubushobozi, kuko ni icyogajuru gito ariko kirimo ibintu n’ubundi bikorwa no mu cyogajuru kinini. Iki cyacu gifite kamera idasanzwe (ifata amashusho n’amafoto), ikoreshwa cyane cyane mu buhinzi kugira ngo barebe uko ibihingwa bikura. Ikaba ishobora gukoreshwa mu mashyamba, cyangwa se no kureba uko ibindi bihingwa bikura”.

Yakomeje avuga ko iyo kamera yacyo izaba ifite ubushobozi butandukanye bijyanye n’ubuhinzi no gusuzuma ibimera uko bikura.

Akomeza agira ati: “Ibi rero biduha ikizere ko uko iminsi igenda iza Abanyarwanda bo ubwabo bashobora nanone kuzicara bagahera kuri zeru bagakora icyogajuru cyabo”.

Eng. Twagirayezu yasobanuye ko ibice by’icyo cyogajuru bishobora gukorerwa mu Rwanda, gusa hari ubushobozi bumwe muri cyo butari mu Rwanda, cyane nk’ibijyanye no kugisuzuma aho bisaba inganda na laboratwari kabuhariwe zitari mu Rwanda.

Ati: “Ni nacyo turi kurebaho, mu minsi iri imbere dukora ubundi bwOko bw’ibi byogajuru, tuzareba ko ibice binini byakorerwa hano mu Rwanda.”

Umwe mu Bayapani bafashije Abanyarwanda gukora icyo cyogajuru, Takayoshi Fukuyo, yavuze ko basanze Abanyarwanda bafiye ubumenyi kandi buri hejuru muri tekenike kandi ko icyo cyogajuru gishobora no gukorwa n’abanyeshuri bo mu mashuri makuru y’Ubumenyingiro mu bya tekenike, akaba ari na yo mpamvu basinye amasezerano n’ishuri rikuru ry’ubumenyingiro rya Tumba Technical College.

Takayoshi yavuze ko icyo cyogajuru bikomeye kugena agaciro kacyo, ariko kibarirwa mu bihumbi amagana by’Amadolari y’Amerika.

Iki cyogajuru kizashyirwa mu birometero 400 uvuye ku Isi, kugira ngo kibashe gukora akazi cyakorewe ku Rwanda.

Minisitiri w’Ikoranabuhanga no guhanga udushya Ingabire Paula areba icyogajuru, ari kumwe na Eng. Takayoshi Fukuyo

TANGA IGITEKEREZO

Leave a Reply

Your email address will not be published. Required fields are marked *