18°C , Partly cloudy | Kigali-Rwanda
Munyazikwiye Faustin, Umuyobozi Mukuru Wungirije wa REMA aganira n'itangazamakuru (Foto Twagira W.)

U Rwanda rwakusanyije toni hafi ibihumbi 10 z’imyanda ku ikoranabuhanga-REMA

Yanditswe na TWAGIRA WILSON

Ku ya 15-05-2018 saa 07:06:49

Umuyobozi  Mukuru wungirije w’Ikigo  k’Igihugu gishinzwe kwita  no kurengera ibidukikije  (REMA) Munyazikwiye Faustin, asanga ikibazo k’imyanda ikomoka ku bisigazwa by’ikoranabuhanga E-Waste gikomeje kwiyongera cyane, ibyo abishingira ku bushakashatsi  REMA iheruka gukora mu mwaka wa 2014, aho yasanze toni zibarirwa hafi  ibihumbi 10  z’ibisigazwa  by’imyanda ikomoka ku ikoranabuhanga ari byo byakusanyijwe  mu Rwanda.

Munyazikwiye Faustin, Umuyobozi Mukuru Wungirije wa REMA aganira n’itangazamakuru (Foto Twagira W.)

Umuyobozi  Mukuru wungirije muri REMA yabivugiye i Kigali mu nama y’umunsi umwe yahuje abahanga mu micungire n’imitunganyirize y’imyanda baturuse mu bihugu 6 bigize Akarere k’Afurika y’Iburasirazuba, baganira uburyo ibisigazwa by’imyanda ikomoka ku bikoresho by’ikoranabuhanga byacungwa neza,  aho kugira ngo biteze ibibazo ahubwo bikaba ibisubizo.

Munyazikwiye asaba ko ubufatanye bw’ibihugu by’Akarere mu birebana n’ubukangurambaga bwashyirwamo ingufu hagamijwe kurengera ubuzima bw’abatuye Ibihugu byo mu Muryango w’Afurika y’Iburasirazuba (EAC), cyane ko iyo myanda ishobora kuba intandaro y’ibibazo by’indwara zitandukanye harimo kanseri n’izindi.

Munyazikwiye yabwiye itangazamakuru ko mu byo baganira n’izo mpuguke ziturutse mu karere, ari ugushishikariza ibihugu gushyira imbaraga mu bukangurambaga, ku buryo za Leta ku bufatanye n’abikorera bashishikarira  “kunagura’’ (recycle) iyo myanda ikomoka ku bikoresho by’ikoranabuhanga, ku buryo byabyazwamo ibindi bikoresho byagira akamaro, aho kugira ngo byandagare hirya no hino kuko bishobora kuba intandaro y’ibibazo by’indwara ku baturage.

Ati “Mu ngamba ni ugushishikariza abantu gushyiraho uburyo bwo kongera gukoresha ibyo bisigazwa, aho kugira ngo bibe umuzigo, ahubwo bibe ibisubizo,   kuko nk’ubu mu Rwanda hamaze gukusanywa hafi toni ibihumbi 10 z’iyo myanda dushingiye ku bushakashatsi bwo mu 2014, izo ni zo ngamba zatuma abantu birinda ibibazo nka kanseri y’uruhu n’iy’ingingo, bityo iyo myanda ibe igisubizo aho kuba umuzigo’’.

Dr Ally Yahaya Samba uyobora umuryango  EACO wateguye iyi nama ufatanyije na Rura, yabwiye itangazamakuru ko ari byo koko hakiri ikibazo k’imyanda ikomoka ku bikoresho by’ikoranabuhanga, dore ko na bo  mu rwego rw’Akarere, basanze haboneka hafi  toni miliyoni 14  z’iyo myanda  buri mwaka, ikiri ikibazo  kikugarije. Naho Umuyobozi Mukuru wa RURA Lt. Col. Nyirishema Patrick, avuga ko nubwo ikibazo gihari, u Rwanda hari ingamba rwafashe mu buryo bufatika kandi burambye.

Akomeza agira ati “Yego ni ikibazo gihari ariko kugeza ubu u Rwanda rumaze gushyiraho uburyo buhamye bwo gukumira ibikoresho byarengeje igihe mu gihugu. Ikindi, hashyizweho uruganda ‘Enviro Serve Rwanda Green Park’, ruri mu karere ka Bugesera, rwatangiye gushyira mu bikorwa kongera  kubyaza umusaruro imyanda, aho kugeza ubu rumaze gutunganya imyanda isaga toni 5 mu gihe gito rumaze rutangiye.” Ibi byanashimangiwe n’umuyobozi w’urwo ruganda, Olivier Mbera mu kiganiro yahaye itangazamakuru.

 

TANGA IGITEKEREZO

Leave a Reply

Your email address will not be published. Required fields are marked *