18°C , Mostly cloudy | Kigali-Rwanda

U Rwanda rwahembwe nk’ahantu ha kane ho gusura ku rwego rw’Isi muri 2020

Yanditswe na Imvaho Nshya

Ku ya 07-11-2019 saa 15:01:21
Ingagi zagaragajwe nka kimwe mu by'ibanze bikurura abakerarugendo basura u Rwanda

U Rwanda rwatowe nka hamwe mu hantu heza ho gusura mu mwaka wa 2020, aho rwaje ku mwanya wa 4 mu bihugu 30 bya mbere byatoranyijwe ku rwego rw’Isi,  rukaba urwa mbere ku rwego rw’Afurika.

Ahantu nyaburanga ho gusura, hatangazwa mu bihembo bitangwa buri mwaka binyuze ku rubuga rwa interineti rwa TravelLemming.com rumenyekanisha ahantu heza mu rwego rwo guteza imbere ubukerarugendo.

Ahantu hatsinze hahiswemo biciye mu matora y’aba ‘bloggers’ 30 bakomeye bandika ku bijyanye n’ubukerarugendo, bafite abantu babakurikira miliyoni 12 ku mbuga nkoranyambaga.

Gutoranywa kw’u Rwanda nk’ahantu heza, byashimishije Belize Kariza, uyu akaba ari Umuyobozi Mukuru ushinzwe Ubukerarugendo mu Rwego rw’Igihugu rw’Iterambere (RDB).

Yagize ati, “Twishimiye iki gihembo ndetse no kuba u Rwanda rwatoranyijwe nka hamwe mu hantu ha mbere ho gusura mu mwaka wa 2020 ku rwego rw’Isi.”

Yakomeje avuga ko iki gihembo ari ikintu gikomeye nyuma y’ubukangurambaga bukomeza bwa Visit Rwanda bumenyekanisha u Rwanda nk’ahantu hakwiye gusurwa n’abanyamahanga.

Ahamya ko iki gihembo kinashimishije ku bakora ibijyanye no kubungabunga urusobe rw’ibinyabuzima, abakora mu rwego rw’ubukerarugendo n’abanyamahoteli badahwema kugaragaza u Rwanda nk’ahantu heza ho gusura.

Yunzemo ati, “Niba utarasura u Rwanda, turakurarikira gusura ubwiza karemano bw’u Rwanda, umuco n’ubuzima bw’inyamaswa.”

Belise Kariza ashyikirizwa igihembo mu izina rya Visit Rwanda

Mu gutoranya u Rwanda muri ibi bihembo, hashingiwe ku bintu birimo kuba inama mpuzamahanga yiga ku bukungu izwi nka World Economic Forum yaratangaje u Rwanda nk’igihugu gitekanye kurusha ibindi muri Afurika, ndetse no kuba sosiyete nyarwanda y’indege ya RwandAir igiye gutangira ingendo ziva JFK zijya i Kigali.

U Rwanda kandi rwashimwe nk’igihugu kirimo guhindura uburyo Abanyamahanga basura Akarere k’Afurika y’Iburasirazuba.

Umwe mu bagize akanama nkemurampaka kahembye u Rwanda, Amarachi Ekekwe, yagize ati, “Bizaba ari iby’agaciro gakomeye gusura u Rwanda no kwirebera ukuntu rurimo gutera imbere, turebe uko urusobe rw’ibinyabuzima rubungabungwa ndetse n’amapariki y’igihugu.

Mu guhitamo abantu heza ho gusura, abatanga ibi bihembo bizwi nka Travel Lemming Emerging Destination Award, basaba amaleta n’ibigo bishinzwe ubukerarugendo kugaragaza ahantu heza bifite ho gusura, noneho aho hantu hakaza gushyikirizwa akanama nkemurampaka kagizwe n’abanditsi b’inkuru z’ubutembere bukorwa mu rwego rw’ubukerarugendo (tourism bloggers) bakomeye cyane ku Isi, bagahitamo aheza kurusha ahandi.

Guhemba ahantu heza ho gusura, biri mu murongo wo guteza imbere ubukerarugendo ku rwego rw’Isi, hagaragazwa ahantu abantu bashobora kuba batazi cyangwa batahaha agaciro gakwiye.

Ni igitekerezo cyaje gishingiye kuri Travel Lemming, uru rukaba ari urubuga (blog) rwashinzwe na Nate Hake, Umunyamerika ukora ubukerarugendo buhoraho kuva mu mwaka wa 2016. Intego nyamukuru y’iyo blog ni ukumenyekanisha ahantu heza cyane hatazwi n’abakabaye bahasura.

Mu gihe u Rwanda rwaje ku mwanya wa kane nk’ahantu heza ho gusura mu mwaka wa 2020 ku rwego rw’Isi, ku mwanya wa mbere hari igihugu cya Georgia cyo ku mugabane w’u Burayi, ku mwanya wa kabiri hakaza ahitwa Nova Scotia, iyi ikaba ari imwe mu ntara za Canada ku mugabane w’America, ku mwanya wa gatatu hakaza The Cook Islands, ibi bikaba ari ibirwa biherereye mu gihugu cya Maldives muri Aziya y’Amajyepfo.

Ku mwanya wa Gatanu hari Kyrgyzstan, igihugu cyo muri Aziya yo Hagati, ikurikiwe na Equador ku mugabane w’Amerika, na Gothenburg muri Sweden ku Mugabane w’u Burayi, Churchill mu Ntara ya Manitoba muri Canada, Dominica ku mugabane w’America, na Uzbekistan yo ku mugabane w’Aziya.

Igihugu cyo muri Afurika kiza ku mwanya wa kabiri nyuma y’u Rwanda ni Namibia iri ku mwanya wa 13 ku rwego rw’Isi, na Ethiopia iri ku mwanya wa 30 ari na yo isoza uru rutonde.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.