28°C , Sunny | Kigali-Rwanda

U  Rwanda rwahawe miriyari 31.5 azafasha guteza imbere siyansi

Yanditswe na KAYITARE JEAN PAUL 

Ku ya 30-06-2019 saa 07:48:37
Minisitiri w'Imari n'Igenamigambi Dr Uzziel Ndagijimana (iburyo) na Ambasaderi wa Suwede mu Rwanda, Jenny Ohlsson, bashyira umukono ku masezerano (Foto Gentil G.)

Guverinoma ya Suwede yahaye Leta y’u Rwanda inkunga ingana n’amafaranga y’u Rwanda miriyari 31.5 azafasha guteza imbere ubumenyi bushingiye kuri siyansi.

Leta y’u Rwanda, Guverinoma ya Suwede na kaminuza y’u Rwanda bakaba barashyize umukono ku masezerano arebana n’iyo nkunga ejo hashize tariki 28 Kamena 2019.

Aya amafaranga akaba azafasha mu kongera ubumenyi bushingiye kuri siyansi izatuma u Rwanda rukomeza gutera imbere no gufasha abatishoboye kuzamura imibereho yabo binyuze mu bushakashatsi buzakorerwa muri Kaminuza.

Minisitiri w’Imari n’Igenamigambi Dr. Uzziel Ndagijimana, avuga gahunda zo gufasha mu byerekeye no gutanga ubumenyi bizafasha gahunda z’iterambere u Rwanda rwihaye.

Yagize ati: “Iyi gahunda ije gufasha u Rwanda mu ntego zarwo zo guteza imbere ibijyanye no guhanga udushya dushingiye ku bumenyi harimo no kongera ibikorwa bizakomeza kugira uruhare mu iterambere ry’igihugu cy’u Rwanda”.

Ambasaderi Jenny Ohlsson uhagarariye igihugu cya Suwede mu Rwanda, avuga ko u Rwanda rurajwe inshinga no gutera imbere hakoreshejwe ubumenyi, akemeza ko nta gushidikanya u Rwanda ruzabigeraho kubera ko ubushakashatsi n’ubumenyi byose bizashingirwaho mu gutera imbere k’u Rwanda.

Ati: “Intego z’u Rwanda zigamije guhindura igihugu hashingiwe ku bumenyi buganisha ku bukungu. Nta gushidikanya ko ubumenyi bugezweho kandi buganisha ku bukungu, busaba ishoramari mu bushakashatsi no kugira ubumenyi buteye imbere kandi bwa kinyamwuga”.

Igihugu cya Suwede kibinyujije mu kigega mpuzamahanga cy’Abanyasuwedi (SIDA: Swidish International Development Cooperation Agency) cyafashije ubushakashatsi n’amahugurwa mu Rwanda guhera mu 2002, ndetse kinabinyuza muri Kaminuza y’u Rwanda kugeza mu 2013.

Abanyeshuri bo mu Rwanda 67 bakuye impamyabumenyi z’ikirenga muri za kaminuza zo muri Suwede. Kuva ubu bufatanye bwatangira, abanyeshuri 50 ni bo bamaze kubona impamyabumenyi z’ikirenga kuva mu 2013 kugeza mu 2019 n’abandi 30 batangiye kwiga 2019-2021.

Biteganyijwe ko hari abandi banyeshuri 80 bazahabwa amasomo azabageza ku mpamyabushobozi z’ikirenga, naho abanyeshuri 110 bazakura impamyabushobozi z’ikirenga muri za kaminuza zo muri Suwede mu 2019-2024.

Muri iki kiciro cya kane, abanyeshuri 38 mu banyeshuri 80 bazigira mu Rwanda ariko banagire amahirwe yo kujya mu gihugu cya Suwede.

Ubusanzwe u Rwanda na Suwede ni ibihugu bifitanye umubano mwiza ushingiye ku bufatanye bugamije iterambere, aho Guverinoma ya Suwede umwaka ushize iherutse kwemeza amasezerano mashya y’imyaka ine y’ubufatanye mu bijyanye no guhanga imirimo ku bagore n’urubyiruko, demokarasi, n’uburenganzira bwa muntu, ndetse no kubaka ubushobozi mu bijyanye n’imihindagurikire y’ibihe.

Minisitiri w’Imari n’Igenamigambi Dr Uzziel Ndagijimana (iburyo) na Ambasaderi wa Suwede mu Rwanda, Jenny Ohlsson, bashyira umukono ku masezerano (Foto Gentil G.)

TANGA IGITEKEREZO

Leave a Reply

Your email address will not be published. Required fields are marked *