20°C , Partly sunny | Kigali-Rwanda

U Rwanda rwahawe kwakira imikino yo gushaka itike ya CAN U-17 

Yanditswe na BUGINGO FIDELE

Ku ya 15-10-2020 saa 21:39:48

Ishyirahamwe ry’umupira w’amaguru mu karere k’Afurika y’Uburasirazuba “CECAFA”, kuri uyu wa Kane tariki 15 Ukwakira 2020 ni bwo batangaje ko u Rwanda rwahawe kwakira imikino yo muri aka karere  mu batarengeje imyaka 17 mu rwego rwo gushaka itike yo kuzitabira imikino y’Afurika  muri iki kiciro “CAN U-17” muri 2021.

Ibi ni bimwe mu byemerejwe mu nama ya  Komite nyobozi ya CECAFA yabereye muri Tanzania  tariki 10 Ukwakira 2020. Iri rushanwa  rizaba tariki 13 kugeza 28 Ukuboza 2020 bikaba biteganyijwe ko rizitabirwa n’amakipe 10 ari yo u Rwanda ruzakira, u Burundi, Tanzania, Uganda, Sudani y’Amajyepfo, Sudani, Eritrea, Djibouti, Ethiopia na Kenya.

Aya makipe azashyirwa mu matsinda abiri  nyuma  y’imikino y’amajonjora  amakipe abiri muri buri tsinda azamuke ahurire muri ½ ayitwaye neza  akine umukino wa nyuma  ari nayo azabona itike  yo kuzahagarira akarere  k’Afurika y’Iburasirazuba mu mikino ya nyuma   ya CAN U-17 izabera muri Maroc  umwaka utaha wa 2021 izitabirwa n’amakipe 12 aho kuba 8 nk’uko byari bisanzwe.

Imikino y’Afurika y’abatarengeje imyaka 17  iheruka   muri 2019 yabereye muri Tanzania aho nabwo aka Karere kari kahagarariwe n’amakipe abiri (Tanzania na Uganda).

Imikino yo gushaka itike ya CAN-20  izabera muri Tanzania

Igihugu cya Tanzania  ni cyo cyahawe kwakira imikino yo gushaka itike y’imikino ya nyuma y’Afurika mu batarengeje imyaka 20 “CAN U-20” izaba  tariki 22 Ugushyingo kugeza 06 Ukuboza 2020.

Biteganyijwe ko  naho  hazitabira amakipe 10 ari yo Somalia, u Burundi, Tanzania, Uganda, Sudani y’Amajyepfo, Sudani, Eritrea, Djibouti, Ethiopia na Kenya.  Ikipe y’u Rwanda ikaba itazitabira.

Aya makipe azashyirwa mu matsinda abiri  nyuma y’imikino y’amajonjora amakipe  abiri ya mbere muri buri tsinda azahura muri ½ , ikipe 2 zitwaye neza zikine umukino wa nyuma ariko zinabone itike yo kwitabira CAN-20 izabera muri Mauritania umwaka utaha wa 2021.

Irushanwa riheruka kubera muri Niger muri 2019, ikipe ya Mali ni yo yegukanye igikombe   itsinze Senegal penariti 3-2 nyuma yo kunganya igitego 1-0.  Muri iri rushanwa riheruka, ikipe y’igihugu y’u Burundi ni yo yaserukiye aka karere k’Afurika y’Iburasirazuba.

Mu buyobozi bwa CECAFA batangaza ko igihe cya tombora y’uko amakipe azahura muri ibi byiciro bizatangazwa mu minsi ya vuba.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.