U Rwanda rwahawe igihembo n’Ihuriro mpuzamahanga ry’ibigo by’ubwiteganyirize

Yanditswe na Kayitare Jean Paul

Ku ya 19-10-2019 saa 09:04:40
U Rwanda rwahawe igihembo cyo kuba rwarakoresheje imbaraga mu bijyanye n'ubwishingizi bw'abaturage

Guverinoma y’u Rwanda yahawe igihembo n’Ihuriro mpuzamahanga ry’ibigo by’ubwishingizi ISSA, ikigo cy’ubwishingizi cyahize ibindi mu guteza imbere ubwishingizi nk’uko biri mu ntego za ISSA.

Uyu muhango wabaye kuwa Gatanu tariki 18 Ukwakira 2019, mu nama yabereye mu Bubiligi ikaba yari ihuje abayobozi b’ibigo by’ubwiteganyirize n’impuguke 1300 baturuka ku Isi yose.  Iki gihembo gitangwa inshuro imwe mu myaka 3.

Mu itangazo rigenewe abanyamakuru, Ikigo k’Igihugu  cy’Ubwiteganyirize RSSB cyatangaje ko u Rwanda rwashimiwe n’Ihuriro mpuzamahanga ry’ibigo by’ubwishingizi kubera uko cyagaragaje guteza imbere ubwishingizi bw’abaturage mu nama mpuzamahanga y’ibigo by’ubwishingizi yaberaga mu Bubiligi.

Iri tangazo rigira riti “Iki gihembo cyatanzwe kubera ibyo igihugu cyahize kandi kigashyira mu bikorwa mu bijyanye n’ubwishingizi ariko u Rwanda rukaba rufite umwihariko w’ibyo rwagezeho bishingiye ku bwishingizi buhabwa abaturage bityo bagashobora kugera ku buvuzi ku buryo bworoshye.”

Itangazo rya RSSB rikomeza rigira riti “Ibyo u Rwanda rwagezeho, birimo kuzamura umubare w’abaturage bakoresha ubwishingizi ku kigero kirenga 90% cy’abaturage babukoresha. Ibi byashobotse kubera umurongo Guverinoma y’u Rwanda yihaye harimo kugira umuryango ukoresha ubwishingizi.”

Umunyamabanga Mukuru wa ISSA Marcelo Abi-Ramia Caetano, yagize ati “U Rwanda rwageze ku kintu kihariye mu nzira yo kugeza ubuvuzi kuri bose muri iki gihe, iki gihembo ni ukwerekana ko dushyigikiye umurimo wakozwe n’ubuyobozi bw’u Rwanda mu myaka ishize igeze kuri 20.”

Kandi ati “Tubashimiye ibyo mwagezeho, kandi ISSA izakomeza gushishikariza za Guverinoma ku Isi yose kwigira ku inararibonye ry’igihugu cy’u Rwanda.”

Umuyobozi Mukuru wungirije wa RSSB, Dr. Hakiba Solange, ari na we wakiriye igihembo mu izina rya Guverinoma y’u Rwanda, yagaragaje ko gushora mu bwishingizi kw’Abanyarwanda ari ni kimwe mu byo Guverinoma yashyize imbere.

Ihuriro mpuzamahanga ry’ibigo by’ubwiteganyirize ISSA, ryatangijwe n’Umuryango mpuzamahanga w’Abakozi ILO. ISSA yashinzwe mu mwaka wa 1927, itangirana n’abanyamuryango 330 baturuka mu bihugu 157.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.