26°C , Partly sunny | Kigali-Rwanda
Bareba igishushanyo cy'ubwo butaka, uturutse ibumoso ni Clare Akamazi uyobora RDB, Sebunya Kaddu uyobora Africa wildlife Foundation, Minisitiri Munyeshyaka Vincent, hirya ye ni Guverineri Gatabazi J.M.V w'Amajyaruguru

U Rwanda rwahawe hegitari 27.8 zizafasha ku kwita ku ngagi

Yanditswe na NIYONSENGA SCHADRACK

Ku ya 11-01-2018 saa 07:39:09

Leta y’u Rwanda yahawe isambu iri ku butaka bwa hegitari 27.8 buherereye iruhande rwa Pariki y’ibirunga bukazakoreshwa mu gukomeza kubungabunga ibidukikije by’umwihariko ingagi ziri muri iyo pariki. Ni ubutaka bwabarizwaga mu maboko y’ikigo nyafurika kita ku nyamaswa (Africa Wildlife Foundation)

Bareba igishushanyo cy’ubwo butaka, uturutse ibumoso ni Clare Akamazi uyobora RDB, Sebunya Kaddu uyobora Africa wildlife Foundation, Minisitiri Munyeshyaka Vincent, hirya ye ni Guverineri Gatabazi J.M.V w’Amajyaruguru

Uyu muhango wabaye ejo hashize ku wa Gatatu tariki ya 10 Mutarama 2018 mu Ntara y’Amajyaruguru, mu karere ka Musanze, Umurenge wa Kinigi. Iyi Pariki y’Igihugu y’Ibirunga ni cyo cyanya rukumbi gituwemo n’ingagi zinjiriza u Rwanda amadovize.

U Rwanda ruhawe ubu butaka mu gihe umubare w’Ingagi muri Pariki y’Igihugu y’Ibirunga ukomeje kwiyongera (Foto RDB)

Agaruka ku mpamvu nyirizina yatumye u Rwanda rwemera kwakira ubu butaka, umuyobozi Mukuru w’Ikigo k’Igihugu gishinzwe Iterambere (RDB), Clare Akamanzi, yavuze ko aya ari amahirwe u Rwanda rwahawe n’ikigo cya “Africa wildlife Foundation” nk’umwe mu bafatanyabikorwa mu iterambere ry’u Rwanda, ibi bikaba biri mu rwego rwo gukomeza gushakira ingagi aho kuba zisanzuye.

Akamanzi yagize ati “Twarabwemeye (ubutaka) nka Leta kuko tuzi ko umubare w’ingagi ziri muri iyi pariki ugenda wiyongera buri mwaka, kuba rero ingagi zigenda ziyongera nyamara ingano ya pariki ikaba yo itiyongera bivuze ko izo ngagi zigenda zibura aho kwisanzurira, ibyo bikaba bivuze ko tugomba gukomeza  kugenda tureba niba hari ukuntu twakongera ubutaka bwa pariki. Ikigenderewe ni uko ingagi zibona ubutaka bugari kugira ngo zirusheho kwisanzura no kororoka.”

Umuyobozi wa “Africa wildlife Foundation” yatanze ubu butaka, Sebunya Kaddu, yashimangiye ko bahisemo kwihera u Rwanda ubu butaka kugira ngo bukoreshwe mu kwita ku ngagi ziri mu birunga nk’uko akazi kabo n’ubundi ari ukwita ku nyamaswa.

Sebunya yagize ati “Iyi Pariki y’Ibirunga ni ingenzi cyane ku mugabane w’Afurika wose, ni iwabo w’ingagi nyinshi, dusobanukiwe neza icyo ubukerarugendo buvuze ku Rwanda n’Abanyarwanda kuko ari umwe mu mitungo mufite. Kuri twe ik’ingenzi ni ukubona inyamaswa zibayeho neza kandi ibyo u Rwanda rurabishoboye nk’uko bijya bibonekera mu kwita izina abana b’ingagi.”

Minisitiri w’Ubucuruzi n’Inganda, Munyeshyaka Vincent, yibukije abaturanye na Pariki y’ibirunga gukomeza kuyibungabunga nyuma yo kubereka uko ibafitiye uruhare rukomeye mu iterambere.

Yagize ati “Kuva mu 2007 kugeza 2016 abakerarugendo basura iyi pariki y’ibirunga binjirije u Rwanda amafaranga agera kuri miliyoni 115 z’amadolari y’Amerika, mu mwaka wa 2016 gusa twakiriye abakerarugendo hano basaga ibihumbi 32 bazanye amafaranga miliyoni 16 z’Amadolari. Muri gahunda yo gusagurira abaturage baturanye n’iyi pariki, hari imishinga isaga 301 yakozwe muri aka karere, iyo mishinga ikaba ifite agaciro gasaga miliyoni 6 z’Amadolari, iyo ikaba ari imishinga irimo amashuri, amavuriro, amazu y’abaturage n’ibindi”.

Pariki y’Ibirunga yari isanzwe iherereye ku butaka bungana na hegitari ibihumbi 16, hegitari 27.8 zongewe kuri iyi pariki nta kintu kigaragara cyazikorerwagaho mu myaka irenga 50 ishize ubwo zavaga mu maboko ya Leta y’u Rwanda.

Mu myaka irindwi Pariki y’ibirunga yarimo imiryango y’ingangi 7 ariko kuri ubu ibarura riheruka ryaragaragaje ko iyo miryango igeze kuri 20, ikaba yose hamwe irimo ingagi 480 mu gihe u Rwanda ruherereyemo izingana na 65% naho izindi zikaba ziri ku ruhande rw’ibihugu bikora kuri iyo pariki ari byo DRC na Uganda.

TANGA IGITEKEREZO

Leave a Reply

Be the First to Comment!

avatar