U Rwanda rwabonye miriyari 203 yo kubaka urugomero rwa Nyabarongo II

Yanditswe na MUTUNGIREHE SAMUEL

Ku ya 08-02-2020 saa 13:33:36
Minisitiri w'Imari n'Igenamigambi Dr. Uzziel Ndagijimana (iburyo), na Amb. Rao Hongwei, basinya inguzanyo y'amafaranga yo kubaka urugomero rw'amashanyarazi rwa Nyabarongo II (Foto Minecofin)

Leta y’u Rwanda n’iy’u Bushinwa bashyize umukono ku masezerano y’inguzanyo yatanzwe n’u Bushinwa y’amadorari y’Amerika angana na miriyoni 214, ni ukuvuga asanga miriyari 203 z’amafaranga y’u Rwanda agenewe kubaka urugomero rw’amashanyarazi rwa Nyabarongo rwa kabiri (II), ruzatanga Megawati 43.5 z’umuriro w’amashanyarazi.

Mu muhango wo gushyira umukono kuri iyo nguzanyo, i Kigali ejo hashize tariki ya 7 Gashyantare 2020, Minisitiri w’Imari n’Igenamigambi ku ruhande rw’u Rwanda, Dr. Ndagijimana Uzziel, yavuze ko uwo mushinga urimo ibice bitatu bizakorwa, kubaka urwo rugomero ruzubakwa hagati y’Akarere ka Muhanga na Gakenke, kubaka umuyoboro utwara ayo mashanyarazi wa kirometero 19.2 uyageza mu karere ka Rulindo, hakabaho n’izindi mashini zifasha mu gutwara amashanyarazi za KV 110.

Ati “Akaba ari umushinga uzadufasha kongera ubushobozi bw’Igihugu bw’amashanyarazi ndetse no gutunganya neza imiyoboro kugira ngo amashanyarazi agende neza atagiye atakara mu nzira. Ikindi ni uko ari inguzanyo y’imyaka 20, izatangira kwishyurwa nyuma y’imyaka 6 n’igice uhereye ubu tuyishyizeho umukono ku nyungu ya 2%.”

Dr. Ndagijimana yongeyeho ko u Rwanda rwiteze kuzahita rugera ku mashanyarazi agera kuri megawati 513.5 mu gihe urwo rugomero ruzaba rwuzuye avuye kuri 224 ruriho uyu munsi.

Ambasaderi w’u Bushinwa mu Rwanda, Rao Hongwei, yavuze ko umubano hagati y’ibihugu byombi ari bwo uri ku rwego rwo hejuru mu mateka, kandi n’iyo nguzanyo ije kubishimangira.

Ati “Ndizera ko aya masezerano dusinye ari urundi rugero rwo kwerekana urugero umubano wacu uhagazeho kandi mu minsi iri imbere ndaba nujuje imyaka itatu ndi mu Rwanda. Kandi nabonye ko uyu mushinga uzagirira inyungu abaturage b’ibihugu byombi. Ndizera ntashidikanya ko hazabaho imishinga myinshi nk’iyi izashyirwa mu bikorwa mu minsi iri imbere.

Mpora mbwira Abashinwa n’abandi bantu ko u Rwanda ari igihugu kihariye, kiza, kihuta kandi gitanga amahirwe ku hazaza, gifite imiyoborere myiza irangajwe imbere na Perezida Kagame Paul.”

Minisitiri w’Imari n’Igenamigambi, Dr Ndagijimana Uzziel, yasobanuye ko uwo mushinga uzagirira Abanyarwanda akamaro gatandukanye, usibye gutanga amashanyarazi, hari Abanyarwanda barenga 700 bazabona akazi mu mirimo ya mbere na nyuma yo kubaka urwo rugomero, imirimo ikazahabwa abize n’abatarize iby’iyo mirimo. Muri iyi mirimo kandi hakazakenerwa ibikoresho bitandukanye birimo amabuye, imicanga, ibiti, sima n’ibindi bizava mu baturage uretse ibikoresho by’umuriro bizaturuka hanze bizakoreshwamo.

Umushinga wo kubaka urugomero rwa Nyabarongo II uje usanga indi myinshi u Rwanda rufatanyamo n’u Bushinwa iri mu nzego zitandukanye, ubwubatsi bw’ibikorwa remezo, mu burezi n’ibindi.

Impande zombi zishimiye gusinya ayo masezerano, u Bushinwa bukaba butangaza ko bwishimira uko bubanye neza n’u Rwanda (Foto Minecofin)

Umwanditsi:

MUTUNGIREHE SAMUEL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.