17°C , Partly sunny | Kigali-Rwanda
Minisitiri w'Urubyiruko Rosemary Mbabazi (Foto Twagira W.)

U Rwanda ruzakira urubyiruko 3000 mu ihuriro ry’urubyiruko- Mbabazi

Yanditswe na TWAGIRA WILSON

Ku ya 14-09-2018 saa 08:08:26

Minisitiri w’Urubyiruko Rosemary Mbabazi avuga ko inama nkuru y’Ihuriro ry’urubyiruko (Youth Connect) izabera mu Rwanda mu kwezi gutaha guhera ku ya 8 kugeza ku ya 10 Ukwakira 2018, ari ihuriro rikuru rigiye guhuriza i Kigali abagize urubyiruko rwo mu Rwanda, Afurika no mu karere,   bose bagera ku bihumbi bitatu, aho bazahererekanya ubumenyi ku cyateza imbere Afurika, kuganira no gushakira hamwe umuti w’ibibazo ibihugu by’Afurika bifite.

Minisitiri w’Urubyiruko Rosemary Mbabazi (Foto Twagira W.)

Mu kiganiro n’abanyamakuru cyabaye ejo hashize ku wa Kane tariki ya 13 Nzeri 2018, ubwo yari amaze gutangiza inama yateguwe n’umuryango “Master Card Foundation” ufasha urubyiruko, ikaba yahuje urubyiruko ruturutse mu bihugu 7 by’Afurika, Minisitiri Mbabazi yibukije urwo rubyiruko ko kwitabira iyo nama nkuru ya “Youth Connect” izabera mu Rwanda ari amahirwe kuri bo, kuko ari ho bazaboneraho kungurana ibitekerezo n’abayobozi bakuru, ndetse n’abagize urubyiruko bagenzi babo baturutse mu bihugu bitandukanye byo kuri uyu mugabane.

Minisitiri Mbabazi yagize ati “Ni urubyiruko rugera ku 3000 barimo abo mu Rwanda no mu rwego rw’Afurika mu nama nkuru y’Ihuriro ry’urubyiruko. Aho abo mu bihugu 7 bazasangiza bagenzi babo iby’ubushakashatsi bamaze gukora, ku buryo n’abandi babwigiraho bikabagirira akamaro mu bihugu byabo.”

Yakomeje agira ati “Muri iyo nama nkuru ya Youth Connect u Rwanda rugiye kwakira  izibanda cyane ku rubyiruko, aho urubyiruko rwo mu bihugu bitandukanye by’Afurika bizabona umwanya wo kuganira n’abakoresha,  ukazaba numwanya wo kugaragaza udushya, ndetse n’ubushakashatsi bwabo  bamaze gukora, ku buryo bagenzi babo babwigiraho, maze bakabushyira mu bikorwa ndetse bukaba bwasubiza bimwe mu bibazo Afurika ifite.”

Uruhare  rw’urubyiruko ni ingenzi muri Afurika

Minisitiri w’Urubyiruko asanga bimwe mu bibazo bikibangamiye urubyiruko nkuko byagaragajwe n’umuhuzabikorwa w’umuryango ‘Master Card Foundation’ Alemayehu Konde Koira, bahuriza ku kibazo cy’ubushomeri mu rubyiruko kandi ko ari kimwe mu bihangayikishije Afurika, dore ko ari bimwe mu bituma  umubare munini w’urubyiruko ukomeje kwemera gutakaza ubuzima bambuka amazi bajya gushaka akazi  mu bihugu byo ku yindi migabane.

Ati Nta bwo twakwishimira ko urubyuruko rw’Afurika rukomeza gutakaza ubuzima bajya gushaka akazi mu bihugu byo ku mugabanze w’u Burayi. Urubyiruko ni mwe mugomba guhaguruka mugafatanya n’ubuyobozi kwishakamo ibisubizo by’ibibazo bitureba nk’Abanyafuririka, aho gutegereza ko abandi bazaza kubidukemurira.”

 

 

 

TANGA IGITEKEREZO

Leave a Reply

Your email address will not be published. Required fields are marked *