18°C , Mostly cloudy with thunderstorms | Kigali-Rwanda
Perezida Paul Kagame yakiriye ku meza abahagarariye ibihugu byabo mu isangira ry'umwaka mushya

U Rwanda ruzaharanira gushyira hamwe kw’Abanyafurika- Kagame

Yanditswe na TWAGIRA WILSON

Ku ya 17-01-2018 saa 06:57:46

Perezida Paul Kagame yavuze ko u Rwanda nk’igihugu  kitegura guhabwa inshingano zo kuyobora Umuryango w’Afurika Yunze Ubumwe vuba aha, ruzaharanira gushyira imbere ubumwe no kwishyira hamwe kw’Abanyafurika,  aho  ruzarushaho gufatanya n’ibindi bihugu byo hirya no hino ku isi.

Perezida Paul Kagame yakiriye ku meza abahagarariye ibihugu byabo mu isangira ry’umwaka mushya

Ibyo Umukuru w’Igihugu Paul Kagame yabigarutseho ejo hashize tariki ya 16 Mutarama 2018, mu butumwa yagejeje ku bahagarariye ibihugu byabo mu Rwanda ubwo yabakiraga mu isangira ritangiza umwaka.

Perezida Paul Kagame yagize ati “Nk’igihugu kigiye kuyobora Umuryango wa Afurika Yunze Ubumwe, u Rwanda ruzaharanira ukwishyirahamwe kwa Afurika. Twiteguye gufatanya n’abasaza bacu na bashiki bacu hirya no hino ku mugabane tugamije kugera ku ntego twihaye.”

Kagame akaba yaravuze ko Abanyafurika bahoze bashaka kwishyira hamwe, gusurana nta mananiza, guhahirana hagati yabo, no gukorana n’ibindi bice by’Isi mu bwubahane, aho yanavuze ko u Rwanda rwafunguye imipaka  ku baza mu gihugu bagana u Rwanda baturuka mu bice bitandukanye by’isi,   mu bihugu byose ku Isi, aho  bose batangiye guhabwa visa bageze mu gihugu.  Ati “Twiteguye kwakira abashyitsi benshi no kunguka inshuti nyinshi, ku buryo Abanyafurika bazabasha guhahirana no gusurana nta mbogamizi.’’

Ikindi kimwe mu bizava mu mpinduka z’Umuryango w’Afurika Yunze Ubumwe nk’uko Umukuru w’Igihugu yabivuze, ni uko Afurika izagirana umubano ukomeye kandi utanga umusaruro n’indi migabane. Ati “Ndabizeza ko kwigira ku bukungu kw’Afurika Yunze Ubumwe n’inzego zayo biri mu nzira nziza.” Yavuze ko impinduka zirimo gushyirwa mu bikorwa ari ingenzi ku hazaza h’umugabane w’Afurika.

Ku birebana n’Abanyafurika  b’abimukira ubu bari mu bibazo muri Libya aho bari mu buretwa bacuruzwa, Perezida Kagame yavuze ko  ku ikubitiro u Rwanda n’Abanyafurika badashobora gukomeza kwihanganira kurebera Abanyafurika mu bibazo nka biriya, ndetse avuga ko hagiye gukorwa ibishoboka vuba bagahabwa icumbi.

Yagize ati “Ikibazo cy’abimukira bari muri Libiya cyadukoze ku mutima. U Rwanda rwiteguye kwakira ababishaka bose muri bo, ari abashaka kuza hano, ndetse n’abifuza kuhanyura gusa.”

Yakomeje agira ati “Amateka yatwigishije ko nta gihugu gishobora kuba gito ngo kinanirwe kwakira abaturage bacyo bari mu kibazo runaka, dukurikije amasomo dufite aho Abanyarwanda bari barahejejwe hanze y’igihugu cyabo bikozwe n’abayobozi bitwazaga ko igihugu ari gito.”

Ku byakozwe umwaka ushize Perezida Kagame avuga ko umwaka ushize wari mwiza nubwo urugendo rukiri rurerure, asanga hari intambwe imaze guterwa mu nzego zitandukanye. Ati “Dukomeje kwigira ku byo twanyuzemo ndetse no gukura amasomo kuri bagenzi bacu.”

Akaba yarashimiye abahagarariye ibihugu byabo mu Rwanda, barimo n’abashya yakiriye ku munsi w’ejo hashize.

TANGA IGITEKEREZO

Leave a Reply

Be the First to Comment!

avatar