17°C , Partly cloudy with thunderstorms | Kigali-Rwanda

U Rwanda rurizihiza umunsi w’uburenganzira bwa Muntu

Yanditswe na admin

Ku ya Dec 8, 2017 saa 11:19

Kuri uyu wa Gatanu tariki 8 Ukuboza 2017, u Rwanda ruzifatanya n’Isi yose kwizihiza Umunsi Mpuzamahanga w’Uburenganzira bwa Muntu.

Komisiyo yifatanya n’inzego zitandukanye mu kwizihiza Umunsi w’Uburenganzira bwa Muntu

Ihame ry’uburenganzira bwa Muntu ni inkingi y’amahoro n’iterambere ku isi. Buri mwaka, ku itariki ya 10 Ukuboza ni bwo u Rwanda rwifatanya n’isi yose kwizihiza Umunsi Mpuzamahanga w’Uburenganzira bwa Muntu, ariko muri uyu mwaka u Rwanda rwahisemo kwizihiza uyu munsi kuri uyu wa Gatanu tariki 8 Ukuboza 2017, mu Karere ka Musanze, Intara y’Amajyaruguru.

Kwizihiza uyu munsi bijyanye no gusoza ibikorwa bigamije kumenyekanisha, gusakaza, kurinda no kurengera Uburenganzira bwa Muntu byakozwe mu cyumweru cy’Uburenganzira bwa Muntu gisozwa kuri uyu wa Gatanu.

Insanganyamatsiko y’Umunsi Mpuzamahanga w’Uburenganzira bwa Muntu ku rwego rw’isi igira iti “Stand up for someone’s right today” bishatse kuvunga, Haranira uburenganzira bwa mugenzi wawe uyu munsi”. U Rwanda rwahisemo insanganyamatsiko igira iti “Turengere Uburenganzira bwa Muntu, turwanya  ibiyobyabwenge mu rubyiruko”.

Kurwanya ibiyobyabwenge ni yo ntero kuko bibangamira uburenganzira bw’uburyiruko ari na rwo Rwanda rw’ejo, ingaruka zabyo zikaba zigera no ku muryango nyarwanda  muri rusange.

Komisiyo y’Igihugu y’Uburenganzira bwa Muntu ihamya ko ikibazo cy’ikoreshwa n’ikwirakwizwa ry’ibiyobyabwenge gikwiye kwitabwaho, kuko cyugarije urubyiruko rwaba ururi mu mashuri n’ururi mu buzima busanzwe kandi urubyiruko ari rwo mizero n’u Rwanda rw’ejo hazaza.

Komisiyo ikangurira urubyiruko uburenganzira bwabo binyuze mu biganiro

Ibyakozwe mu guhashya ibiyobyabwenge mu rubyiruko

Icyumweru cyo kwizihiza Umunsi Mpuzamahanga w’Uburenganzira bwa Muntu cyatangiye tariki ya 1 kugeza tariki ya 8 Ukuboza 2017.

U Rwanda rwashyize imbaraga mu bukangurambaga bugamije kwigisha abantu kurwanya ikoreshwa ry’ibiyobyabwenge no guhangana n’ingaruka zabyo, kuko uko imyaka ishira ibiyobyabwenge bikomeza kugaragara mu bantu barimo ababikora, ababihinga, ababicuruza n’ababikoresha, muri bo hakagaragaramo urubyiruko.

Ku bufatanye na Minisiteri y’Urubyiruko na Polisi y’Igihugu, hatanzwe ikiganiro kuri Televiziyo y’u Rwanda kijyanye n’insanganyamatsiko yo ku rwego rw’igihugu cyakurikiwe n’ubutumwa bwo kumenyekanisha uyu Munsi Mpuzamahanga n’impamvu wabayeho.

Hakozwe ubukangurambaga mu rubyiruko ku bufatanye n’Inama y’Igihugu y’Urubyiruko na Sosiyete sivile, hatangwa ibiganiro bigamije gukangurira urubyiruko kurinda no kurengera uburenganzira bwa Muntu ndetse no kwirinda ibiyobyabwenge. Ibyo biganiro byatanzwe  mu Turere twa  Nyagatare, Kirehe, Burera, Gicumbi, Rubavu, Rusizi, Huye na Nyarugenge.

Ubutumwa butangwa kuri uyu wa Gatanu tariki 8 Ukuboza 2017 bugamije kwamagana ikoreshwa ry’ibiyobyabwenge mu rubyiruko, kuko birwangiza kandi rugize umubare munini w’amaboko yo gukorera igihugu.

Muri ibyo biyobyabwenge harimo urumogi rugenda rufatirwa hirya no hino mu gihugu, inzoga z’inkorano z’ubwoko butandukanye n’ibindi.

Imibare itangwa na raporo y’Ikigo cy’Igihugu cy’Ibarurishamibare ku byaha byerekeranye n’ikoreshwa ry’ibiyobyabwenge mu mwaka w’2015, igaragaza ko mu bashinjwa ibyaha byo gukoresha urumogi nk’uko byagaragajwe na Polisi y’Igihugu harimo abantu 2,489 barimo urubyiruko bagaragayeho ikoreshwa ry’urumogi.

Muri abo bagaragayeho gukoresha ibiyobyabwenge  abagore ni 306 na ho abagabo ni 2,183. Muri bo abari munsi y’imyaka 18 bari 34; abari hagati y’imyaka 18 na 35 bari 2,029, naho abari hejuru y’imyaka 35 bari 426.

Abantu 2,322 barimo urubyiruko bagaragayeho ikoreshwa rya kanyanga. Ab’igitsina gore ni 466, ab’igitsina gabo ni 1,856.

Muri bo abari munsi y’imyaka 18 bari 18; abari hagati y’imyaka 18 na 35 bari 1,665; naho abari hejuru y’imyaka 35 bari 639.

Iyo mibare igaragaza ko ikiyobyabwenge cy’urumogi cyiganje cyane mu rubyiruko ruri munsi y’imyaka 35 ku kigero cya  83%.

Ikiyobyabwenge cya kanyanga na cyo cyiganje mu rubyiruko ruri munsi y’imyaka 35, kuko ku bantu 2,322 bagaragaweho no kuyinywa harimo  urubyiruko 1,683 rungana na 73%.

Kuri uyu wa Gatanu tariki ya 8 Ukuboza 2017 hanateganyijwe umukino w’isiganwa ry’amagare mu Karere ka Musanze, mu rwego rwo gukomeza gutanga ubutumwa bujyanye n’uwo Munsi Mpuzamahanga w’Uburenganzira bwa Muntu bwo kwirinda ibiyobyabwenge mu rubyiruko, bityo abarushije abandi bakazahembwa mu birori. Hateganyijwe kandi ubutumwa bukangurira abantu uburenganzira bwabo binyuze mu ndirimbo z’abahanzi.