21°C , Intermittent clouds | Kigali-Rwanda

U Rwanda ruratekereza kwifashisha radari mu gushakisha imibiri y’abazize Jenoside

Yanditswe na Sezibera Anselme

Ku ya 08-11-2019 saa 08:55:24
Kimwe mu byobo byajugunywemo imibiri y'Abatutsi biciwe i Murambi kuwa 21 Mata 1994, muri Jenoside yakorewe Abatutsi. Ifoto/Janvier Popote

Mu bitekerezo byatangiwe mu nama nyunguranabitekerezo ku kibazo k’imibiri y’abishwe muri Jenoside yakorewe Abatutsi itaraboneka ngo ishyingurwe mu cyubahiro, havuzwe ko hatekerezwa kwifashisha radari mu kubona iyo mibiri.

Komisiyo y’Igihugu yo Kurwanya Jenoside, CNLG,  n’imiryango iharanira inyungu z’abacitse ku icumu rya Jenoside yakorewe Abatutsi bagaragaza ko n’ubwo mu myaka 25 ishize Jenoside yakorewe Abatutsi ibaye hari intambwe yatewe mu rugendo rw’ubumwe n’ubwiyunge, hakiri ikibazo gihangayikishije k’imibiri ikigaragara hirya no hino mu gihugu itarashyingurwa mu cyubahiro, nyuma ibitekerezo byatanzwe bitanga n’inama zo kuba hakwifashishwa ikoranabuhanga rya radari mu gushakisha ahaba hakiri imibiri.

Ni igitekerezo cyazamuwe na Dr. Mugesera Antoine wo mu rubuga ngishwanama rw’Inararibonye z’u Rwanda, aho yavuze ko hari imashini zibikora bikihuta aho gukomeza gusaba amakuru abadashaka kuyatanga cyangwa bayobya uburari bikavuna abashakisha iyo mibiri.

Senateri Havugimana Emmanuel na we yavuze ko igitekerezo k’izo mashini cyashyigikirwa kuko zakoroshya imirimo. Ati Ziriya mashini zavuzwe koko ni ngombwa kuko zakemura ikibazo tumaranye imyaka myinshi. Izo mashini z’ikoranabuhanga zirahari, nabonye n’ibiciro byazo, imwe igura amadorari y’Amerika ibihumbi 100 (hafi miriyoni 100 z’Amafaranga y’u Rwanda).

Narebye kuri Internet mbona uko ikora, Leta rero yashaka uko hagurwa nk’eshanu zikazenguruka mu gihugu, cyane cyane aho bakeka ko hari imibiri.”

Havugimana asobanura ko bizatuma iyo mibiri yihuta kuboneka kandi nta kwibeshya ngo hagire ibikorwa bisenywa bitari ngombwa, zishobora no kuzerekana n’aho abantu batakekaga.

Agira ati “Mu Rwanda habonetse nk’imashini eshanu cyangwa esheshatu byafasha. N’iyo yaba imwe yajya ikoreshwa aha n’aha, bakahava bakajya ahandi bakeka… ahubwo muzatungurwa nizigurwa hari n’ahandi muzayisanga abantu batakekaga. Cyaba n’ikifuzo ko Leta idufasha amafaranga yo kugura izo mashini nubwo zaba nke.”

Umunyamabanga Nshingwabikorwa wa Komisiyo y’Igihugu yo kurwanya Jenoside, Dr. Bizimana J. Damascène, avuga ko Guverinoma iri mu myiteguro yo gutangira kwifashisha ubwo buryo bw’ikoranabuhanga [Radar de Pénétration du Sol] mu gushakisha mu butaka no mu mazi ahakiri imibiri y’abazize Jenoside yakorewe Abatutsi mu 1994 itarabashije gushyingurwa mu cyubahiro.

Dr. Bizimana avuga ko Guverinoma yatangiye gutegura uburyo bwo kwifashisha iri koranabuhanga harimo gutegura uburyo bizateganyirizwa ingengo y’imari y’ihariye umwaka utaha.

Avuga ko kwifashisha ikoranabuhanga CNLG yabitekerejeho, ibiganiraho hashakishwa  uburyo ryagerwaho.  Ati: Mu ngengo y’imari tuzasaba umwaka utaha turateganya kubishyiramo kugira ngo nibura tugire imwe [Radar] cyangwa ebyiri zitangira kuba zakora icyo gikorwa.”

Ashimangira ko umwaka utaha nibimara kugenerwa ingengo y’imari hazakurikiraho gutanga amasoko yo kuzigura ubundi bigatangira gukorwa. Icyakora ntihatangajwe igihe izo mashini zazagurirwa, gusa abari bitabiriye ibyo biganiro bose bahurije ku gitekerezo cy’uko zagurwa ndetse kinashyirwa mu myanzuro yafashwe.

Kuba hakiri imibiri y’abazize Jenoside, ni ikibazo cyagarajwe nka kimwe mu bikomereye urugendo rw’ubumwe n’ubwiyunge gikwiye gufatirwa ingamba zishoboka, benshi bashimangira ko Leta ikwiye gushaka uburyo bw’ikoranabuhanga aho gukomeza kwinginga abinangiye gutangiza amakuru n’abatanga ay’ibinyoma.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.