20°C , Partly cloudy | Kigali-Rwanda
Umuhanda wa gari ya moshi niwuzura uzafasha cyane mu bucuruzi kuko u Rwanda ruzaba regera ku cyambu cya Dar es Salaam mu buryo bworoshye

U Rwanda rurasabwa miliyari 2.5 z’amadolari ku muhanda wa gari ya moshi Isaka-Kigali

Yanditswe na MUTUNGIREHE SAMUEL

Ku ya 18-01-2018 saa 07:05:06

Nyuma y’aho tariki 14 Mutarama 2018 Perezida Paul Kagame na mugenzi we wa Tanzania Dr. John Pombe Magufuli bemeranyijwe gutangiza kubaka umuhanda wa Gari ya Moshi uhuza ibihugu byombi, uva Isaka ukagera i Kigali, ku ruhande rw’u Rwanda rurasabwa amadolari agera kuri miliyari 2.5 yo kubaka igice cyarwo.

Umuhanda wa gari ya moshi niwuzura uzafasha cyane mu bucuruzi kuko u Rwanda ruzaba regera ku cyambu cya Dar es Salaam mu buryo bworoshye

Umuyobozi ukuriye Ishami ry’ubushakashatsi n’igenamigambi mu Kigo k’Igihugu gishinzwe guteza imbere ubwikorezi (RTDA), Barisanga Fabrice, yatangarije Abanyarwanda ko ku ruhande rw’u Rwanda hagomba kubakwa umuhanda wa kilometero 150 muri 400,  zigera Isaka muri Tanzania, nk’uko inyigo yakozwe mu 2014 yabigaragaje ubwo higwaga ku muhanda wose uva Dar es-Salaam ukagera i Kigali, ureshya n’ibilometero hafi 1 464.

Ati “Inyigo itwereka ko umushinga wose uzatwara hafi miliyari 2.5 z’amadolari (asaga miliyari 2 140 z’amafaranga y’u Rwanda). Ni umushinga munini ndetse usaba amikoro ahambaye, ariko ku bw’imbaraga z’abayobozi bacu, ngira ngo ni na rwo ruzinduko Perezida wa Repubulika yakoreye muri Tanzania, bakemeranya ko umushinga wakwihuta, natwe ku gice cy’abashinzwe ibya tekiniki turiteguye, kandi umuhigo twahawe n’abakuru b’ibihugu twiteguye kuwesa.

Uyu mushinga uca mu Karere ka Kirehe, ugaca mu Karere ka Ngoma, ugaca mu Karere ka Bugesera, ukazarangirira Kicukiro hano hafi y’Inyange.”

Barisanga yakomeje avuga ko ku kijyanye n’abaturage bashobora kugerwaho n’iyubakwa ry’uwo muhanda, inyigo yagaragaje ko ari abagera ku 2 450 barimo abazimurwa ahari ubutaka bugomba gufatwaho.

Nyuma yo kwemeranywa ku iyubakwa ry’umuhanda wa Gari ya Moshi Isaka-Kigali, abayobozi muri Minisiteri z’Ibikorwa Remezo ku mpande zombi basabwe kwicarana muri ibi byumweru bibiri bakihutira kunoza uko uwo mushinga uzakorwa.

Mu gihe uyu muhanda uzaba umaze kubakwa, byitezwe ko uzahuza icyambu cya Dar es Salaam na Kigali unyuze Isaka no kuzoroshya ingendo z’abantu n’ibicuruzwa biva cyangwa biza mu Rwanda, cyane ko hafi 70% by’ibicuruzwa u Rwanda rutumiza cyangwa ruvana mu mahanga binyuzwa mu gihugu cya Tanzania.

TANGA IGITEKEREZO

Leave a Reply

Be the First to Comment!

avatar