17°C , Mostly cloudy | Kigali-Rwanda
Prof. Jeannine Condo, ibumoso na Dr. Gatare Swaibu, basobanura byinshi u Rwanda rugiye kwereka Isi muri serivisi zo gutanga amaraso meza (Foto Samuel M)

U Rwanda rugiye kwereka Isi ikorabanuhanga mu gutanga amaraso

Yanditswe na MUTUNGIREHE SAMUEL

Ku ya 12-06-2019 saa 15:14:05

U Rwanda rugiye kwakira inama mpuzamahanga, ku rwego rw’Isi, y’umunsi mpuzamahanga wo gutanga amaraso uba tariki ya 14 Kamena buri mwaka, rukazagaragariza abaturutse mu bihugu byo ku Isi bitandukanye aho rugeze mu ikoranabuhanga ryo gutanga amaraso no kuyatunganya bituma ruza mu myanya ya mbere.

Ni inama izaba ibaye ku nshuro ya mbere mu Rwanda, ikaba inshuro ya kabiri ibereye ku mugabane w’Afurika nyuma y’imyaka 15 ibereye muri Afurika y’Epfo.

Mu kiganiro n’itangazamakuru ejo hashize tariki ya 11 Kamena 2019, Umuyobozi Mukuru w’Ikigo k’igihugu cy’Ubuzima, Prof. Condo Jeanine n’umuyobozi ukuriye ikigo cyo gutanga amaraso Dr. Gatare Swaibu, bagaragaje ko uyu munsi ngarukamwaka uje usanga hari byinshi u Rwanda rwagezeho muri serivisi zo guha amaraso abarwayi bayakeneye, abaturage bitabira kuyatanga ku buntu kandi ibitaro na byo biyabona ku kigero gishimishije.

Prof. Condo yagize ati: “Ikigero cyo kubona amaraso ahagije ku bitaro byose kiri hejuru ya 90%; ni ukuvuga ngo buri bitaro byose by’akarere bikeneye kubona amaraso biyabona ku gihe, ku rwego rushimishije cyane.”

Yakomeje avuga ko u Rwanda rufite ikigo k’ikitegererezo muri Afurika cyahawe u Rwanda nyuma yo kugaragaza ko rufite ubushobozi bwo gutunganya amaraso ku kigero cyo hejuru kandi rushobora kwigisha ibindi bihugu bijyanye no gutanga amaraso.

Dr. Gatare, yasobanuye ko u Rwanda ruzerekana byinshi bimaze kugerwaho, bituma ruza mu myanya ya mbere ku bintu bitandukanye muri servisi zo gutanga amaraso abandi bakigiraho.

Ati: “Bimwe muri ibyo, hari uburyo bwiza, bukora neza ku buryo n’ibindi bihugu bishobora kutwigiraho, cyane cyane ibihugu by’Afurika n’ibindi biri mu nzira y’Amajyambere. Uburyo dutunganya amaraso, uburyo tuyafata, uburyo tuyabika, uburyo tuyapima kugira ngo turebe ko nta ndwara twanduza umurwayi ugiye kuyahabwa, uburyo tuyakwirakwiza hirya no hino mu bitaro.

Murabizi ko u Rwanda rwayoboye Isi mu gukoresha utudege duto tutagira abapilote (Drones) mu gukwirakwiza amaraso hirya ni hino mu bitaro 64, birimo 25 bigezwaho amaraso hakoreshejwe dorone.”

Yakomeje avuga ko u Rwanda ari kimwe mu bihugu by’Afurika bifite abaturage batanga amaraso nta kiguzi namba.

Ati: “Ibyo byose rero ni byo byatumye Ishami ry’Umuryango Mpuzamahanga ryita ku buzima OMS, rihitamo u Rwanda kwakira uyu munsi mpuzamahanga kuri iyi nshuro.”

Umuryango Mpuzamahanga wita ku byo gutanga amaraso (ISBT) uherutse guha u Rwanda igihembo, tariki 3 Kamena 2018 i Toronto muri Canada, rushimirwa intambwe rumaze gutera mu rwego rwo gutanga amaraso afite ubuziranenge ku barwayi bose bayakeneye. Hari n’undi muryango Nyafurika (AfBT) na wo wabonye ko u Rwanda rwateye intambwe ishimishije, uhitamo gukorana mu gushyiraho ihuriro ry’ahantu habera amahugurwa yawo n’inama zawo zibera mu Rwanda ku kicaro k’Ikigo k’Igihugu gishinzwe Ubuzima RBC i Remera.

U Rwanda ni igihugu kandi cya kabiri muri Afurika, nyuma ya Namibia, rufite ikemezo cy’uko igihugu gifite imikorere myiza mu byerekeye kubika amaraso no kuyihaza ku yakenewe.

Kuri uyu munsi u Rwanda ruzaboneraho umwanya wo gushima byimazeyo abantu b’abakorerabushake batanga amaraso, baba abo mu Rwanda cyangwa abo ku Isi, kuko batuma u Rwanda ruza mu bihugu bike by’Afurika bifite abaturage batanga amaraso 100% ku buntu.

Umunsi mpuzamahanga wo gutanga amaraso uheruka, wabereye mu Bugiriki (Greece) mu gihe umwaka utaha biteganyijwe ko uzabera mu Butaliyani.

Prof. Jeannine Condo, ibumoso na Dr. Gatare Swaibu, basobanura byinshi u Rwanda rugiye kwereka Isi muri serivisi zo gutanga amaraso meza (Foto Samuel M)

TANGA IGITEKEREZO

Leave a Reply

Your email address will not be published. Required fields are marked *