19°C , Clear | Kigali-Rwanda

U Rwanda rugiye kwakira inama  y’impuzamashyirahamwe ya Tennis muri Afurika

Yanditswe na NKOMEJE GUILLAUME

Ku ya 26-04-2018 saa 06:59:50

Ubuyobozi bw’ishyirahamwe ry’umukino wa Tennis mu Rwanda Rwanda Tennis Federation/RTF” buratangaza ko buzakira inama y’inteko rusange y’impuzamashyirahamwe y’umukino wa Tennis muri Afurika “CAT” izabera i Kigali kuva tariki 27-28 Mata 2018.

Ntageruka Kassim,Perezida w’ishyirahamwe ry’umukino wa Tennis mu Rwanda

Perezida wa RTF, Ntageruka Kassim yatangarije Imvaho Nshya ko kuba u Rwanda rugiye kwakira iyi nama ku nshuro ya mbere babikesha kuba ubusabe bwabo bwarakiriwe neza kandi no kugirana umubano mwiza n’ibindi bihugu.

Akomeza avuga ko bamwe mu bashyitsi bategerejwe muri iyi nama batangiye kugera i Kigali kuva ku wa kabiri tariki 24 Mata 2018 ndetse abandi baza kuhagera uyu munsi. Ati “Bamwe mu bashyitsi bamaze kuhagera kuva ku wa kabiri, abandi baje ejo hashize ku wa gatatu ndetse abandi barahagera uyu munsi ku wa kane”.

Ntageruka atangaza ko iyi nama yari isanzwe ibera mu bihugu by’Afurika y’Amajyaruguru, ariko kuri ubu kuba bagiye kuyakira bigaragaza ko hari iterambere ry’umukino wa Tennis mu Rwanda.

Yagize ati Iyi nama akenshi ikunze kubera mu bihugu nka Maroc, Algeria, Misiri, Tunisia cyangwa Afurika y’Epfo, kuba igiye kubera i Kigali ni ikimenyetso cy’uko hari aho turimo kwerekeza. U Rwanda ruzwiho kwakira neza inama mpuzamahanga, ibi ntawubishidikanyaho”.

Asobanura iyi nama y’uyu mwaka, izitabirwa n’ibihugu bigera kuri 62 bigize CAT ndetse n’ishyirahamwe mpuzamahanga ry’umukino wa Tennis ku Isi “ITF”.  Mu banyacyubahiro bategerejwe barimo Tarak Cherif, Perezida w’ishyirahamwe ry’umukino wa  Tennis muri Afurika ndetse na Perezida w’ishyirahanwe ry’umukino wa Tennis mu rwego rw’Isi, David Haggerty uzagera mu Rwanda kuri uyu wa Gatandatu tariki 28 Mata 2018.

Iyi nama y’inteko rusange y’impuzamashyirahamwe y’umukino wa Tennis muri Afurika  igiye kubera i Kigali  nyuma y’uko kandi u Rwanda ruherutse no kwakira irushanwa ryo mu Karere ry’abatarengeje imyaka 21, aho rwanabonye itike y’imikino y’Afurika  izabera muri Maroc muri Gicurasi 2018.

Impuzamashyirahamwe y’umukino wa Tennis muri Afurika “CAT” igizwe n’uturere 5 “Zone” ari two; Akarere k’Afurika y’Uburasirazuba (IV ), Amajyepfo (zone V),  ako hagati (Zone III), Uburengerazuba (Zone II) n’Amajyaruguru (Zone I).

 

TANGA IGITEKEREZO

Leave a Reply

Be the First to Comment!

avatar