22°C , Partly sunny | Kigali-Rwanda

U Rwanda rugiye kwakira inama nyafurika yimakaza ubuyobozi bushingiye kuri Bibiliya

Yanditswe na Ntawitonda Jean Claude

Ku ya 10-10-2019 saa 07:50:04
Inama izabera muri Convention Centre

Ku nshuro ya mbere u Rwanda rugiye kwakira inama mpuzamahanga ihuza urubyiruko n’abayobozi barenga 1.000 baturutse mu bihugu birenga 25 biga ku buyobozi bushingiye kuri Bibiliya.

Iyo nama nyafurika yiswe ‘African Biblical Leadership Forum/ABLI’ igiye kuba ku nshuro ya 9, ikaba yaratangiriye bwa mbere i Addis Ababa muri Ethiopia mu mwaka wa 2010.

Tariki 23 Ukwakira 2019 ni bwo iyo nama y’iminsi itatu izatangizwa ku mugaragaro i Kigali, ikazabanzirizwa n’inama y’urubyiruko rwo mu Rwanda rurenga 1.000 (ABLI YOUTH) iteganyijwe tariki 19 Ukwakira.

Mu Rwanda yateguwe n’Umuryango wa Bibiliya mu Rwanda (BSR) ikaba yitezweho guhuza abayobozi b’ibihugu by’Afurika bakaganira ku buryo bakwifashisha ukuri n’indangagaciro ziboneka muri Bibiliya mu guhangana n’ibibazo bitandukanye Afurika ifite birimo ubukene, ruswa, akarengane, amakimbirane, intambara n’ibindi.

Nyuma y’inama izahuza urubyiruko by’umwihariko, inama nyir’izina izitabirwa n’abarenga 1.000 barimo 200 bahagarariye Amashami y’Umuryango wa Bibiliya ku Isi.

Abazitabira kandi bazaba barimo abahagarariye za Guverinoma, Sosiyete Sivile, abikorera, amashuri makuru na kaminuza, amadini n’indi miryango y’iyobokamana, impuguke, n’abavuga rikijyana bo muri Afurika ndetse no ku yindi migabane.

Musenyeri Kambanda Antoine, Umuyobozi w’Umuryango wa Bibiliya mu Rwanda wateguye iyo nama, yatangarije Imvaho Nshya ko iyi nama ari umugisha ku Rwanda na Afurika muri rusange kuko ishishikariza abayobozi gukurikiza indangagaciro zimakaza ubudakemwa mu mico no mu myifatire ku bayobozi n’abaturage.

Yagize ati: “Inama igiye kubera mu Rwanda izarangwa no gushishikariza abayobozi kugira intego zo guharanira ahazaza harangwa n’ibyiza n’impinduka nziza zigaragara mu nzego zitandukanye ku mugabane w’Afurika.”

Musenyeri Kambanda Antoine

Ubuyobozi bw’Umuryango wa Bibiliya mu Rwanda bugaragaza ko mu myaka 9 iyi nama imaze ikorwa, yabaye urubuga abayobozi b’Afurika bahuriraho bakaganira ku ruhare rw’indangagaciro zishingiye kuri Bibiliya mu kurwanya ruswa n’ubukene, kwimakaza ubunyangamugayo, kwirinda amakimbirane no guharanira ubutabera mu miryango.

Musenyeri Kambanda Antoine yakomeje agira ati: “Kuva ABLI yatangira ntiyunguye abayobozi gusa ahubwo yafashije n’abaturage benshi kubona ikizere cyo kwigobotora ibibazo byugarije Afurika.”

Mu banyacyubahiro bazitabira iyo nama harimo uwahoze ari Minisitiri w’Itangazamakuru n’Isakazabumenyi muri Nigeria Prof. Jerry Gana, Dr. Umujyanama wa Perezida wa  Kenya Rev. Sam Kobia, Rt. Lord Paul Boateng wabaye Ambasaderi w’u Bwongereza muri Afurika y’Epfo, Umuvugabutumwa mpuzamahanga Pasiteri Richard Duane Warren (Rick Warren), ba rwiyemezamirimo b’abagore bakomeye muri Afurika Ndidi Okonkwo Nwuneli na Caren Wakoli, n’abandi.

Bishop John Rucyahana ari mu bazafata ijambo muri iyo nama

Minisitiri w’Ubutegetsi bw’Igihugu Prof. Shyaka Anastase na we ari mu bayobozi bazatanga ikiganiro muri iyi nama

Iyi nama Mpuzamahanga izitabirwa n’Umuvugabutumwa Rick Warren, na we azatanga ikiganiro muri iyi nama

Umwanditsi:

Ntawitonda Jean Claude

2 Comments on “U Rwanda rugiye kwakira inama nyafurika yimakaza ubuyobozi bushingiye kuri Bibiliya”

  1. Imana ishimwe kubwiyi nama ishyingiye kuri Biblia, Imana ibashyigikire abayiteguye.
    Ibyiza nuko abapastori benshi b’Urwanda bazayikurikira, niboshoboka izabe live ku rimwe ma maradio.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.