22°C , Partly sunny | Kigali-Rwanda

U Rwanda rugiye guca agahigo ko kurandura Hepatite C

Yanditswe na Ntawitonda Jean Claude

Ku ya 30-09-2019 saa 17:51:01
Minisitiri w'Ubuzima Dr. Gashumba Diane (iburyo) ari kumwe n'umuganga basuzuma abaturage uko bahagaze ku ndwara ya Hepatite C

U Rwanda rubaye Igihugu cya mbere cyo muri Afurika yo Munsi y’Ubutayu bwa Sahara kiyemeje kurandura indwara y’umwijima yo mu bwoko bwa C (Hepatite C) nk’uko bitangazwa na Minisiteri y’Ubuzima.

Ubukangurambaga bwiswe “Rwanda Cares” bugamije kurandura virusi ya Hepatite C (HCV) bitarenze mu mwaka wa 2024, bwatangiye mu mpera z’umwaka wa 2018.

Leta y’u Rwanda yihaye intego yo kurandura Hepatite C bitarenze mu 2024

Leta y’u Rwanda yiyemeje kubahiriza ubusabe bw’Ishami ry’Umuryango w’Abibumbye ryita ku buzima (WHO/OMS) bwo kurandura iyi ndwara ku Isi bitarenze mu mwaka wa 2030, mu gihe habarurwa abarenga miriyoni 71 banduye virusi ya Hepatite C.

Bamwe mu banyarwanda batangiye kuvurwa indwara ya Hepatite C baravuga imyato Leta y’u Rwanda yaborohereje kubona ubuvuzi ku biciro biciriritse.

Habimana Roger Gerard wo mu Kagari k’Agateko, Umurenge wa Jari, Akarere ka Gasabo, avuga ko basanze afite virusi ya Hepatite C mu mwaka wa 2014 abaganga bamwitaho itaramuzahaza, biza kurangira akize.

Ati: “Nge amahirwe nagize ni uko nagiye kwivuza barapima basanga mfite virusi itaranzahaza. Iyo ugize amahirwe bakayibona kare utararemba, iyo bakuvuye uhita ukira.”

Yakomeje avuga ku biciro byagabanyutse, ati: “Ubu igiciro cyaragabanyutse cyane ibyo na byo twabishimira Minisiteri y’Ubuzima. Ibiciro kuba byaragabanyutse ni byiza cyane kuko hari ubwo bavugaga ngo imiti iba muri Amerika cyangwa mu Burayi, bakubwira ibiciro ugasanga ni muri za miriyoni utabasha kwigondera.”

Mukadereva Esther utuye mu Kagari ka Kabyiniro, Umurenge wa Cyanika, Akarere ka Burera, na we yishimira ko ubu yakize Hepatite C yamenye ko arwaye mu mwaka wa 2017.

Yagize ati: “Nasanze mfite Hepatite C, barakurikirana basanga igeze ku kigero cyo gufata imiti. Twafataga imiti tukayinywa amezi atatu. Nyuma yo kuyifata, n’ibindi bambujije kurya, nasubiye kwipimisha barambwira ngo yarakize.”

Akomeza ashimira Minisiteri y’Ubuzima yabafashije kubona ubuvuzi buhendutse mu gihe bajyaga bumva ko kuvurwa iyo ndwara udafite ubushobozi buhagije bidashoboka.

Minisiteri y’Ubuzima itangaza ko nyuma y’ubuvugizi bwakozwe na Perezida wa Repubulika Paul Kagame, igiciro k’imiti ya Hepatite cyavuye ku madorari y’Amerika 86,000 (akabakaba miriyoni 80 z’amafaranga y’u Rwanda) akagera ku madorari 90 (amafaranga 81,000).

Umuyobozi Mukuru w’Ikigo k’Igihugu cy’Ubuzima (RBC) Dr. Nsanzimana Sabin, avuga ko Abanyarwanda bamaze kuvurwa Hepatite C barenga 17,000, iki gikorwa kikaba gikomeje gihereye mu Ntara y’Iburasirazuba ahamaze gusuzumwa abagera kuri miriyoni imwe n’igice.

Yakomeje agira ati: “Iyo umuntu amaze kuvurwa hari ibindi bizamini akorerwa byo kureba virusi iri mu mubiri, hanyuma twasanga akeneye ubuvuzi tukamushyira ku miti. Turashaka ko muri iyi gahunda yose tuzapima abantu bagera kuri miriyoni 4.”

Imibare itangwa na RBC igaragaza ko 4% by’Abanyarwanda barwaye Hepatice C, bikaba akarusho ku barengeje imyaka 60 y’amavuko kuko muri bo abayirwaye bagera kuri 25%.

Biteganyijwe ko mu gihe Abanyarwanda bose bazasuzumwa abasanganywe virusi ya Hepatite C bakavurwa, ikigero k’iyo ndwara kizava kuri 4% kigere munsi ya 1%.

Madamu Jeannette Kagame (uwa 6 uhereye ibumoso) mu muhango wo gutangiza ubukangurambaga Rwanda Cares

Hepatite C ibyara kanseri y’umwijima

Dr. Nsazimana ashimangira ko u Rwanda rwashyize ingufu nyinshi mu kurandura Hepatite C kubera ko ivurwa igakira, mu gihe iyo itinze kuvurwa cyangwa ntivurwe ibyara kanseri y’umwijima.

Yagize ati: “Iyo Hepatite C itavuwe ihinduka kanseri y’umwijima. Kanseri y’umwijima iri muri kanseri eshatu za mbere zitwara ubuzima bw’Abanyarwanda benshi uyu munsi.”

Leta y’u Rwanda yiyemeje gukora ubukangurambaga bujyana no gukusanya inkunga mu bigo bitandukanye birimo ibya Leta, Urugaga Nyarwanda rw’Abikorera, amadini n’imiryango y’iyobokamana ndetse n’imiryango itegamiye kuri Leta ikorera mu Rwanda.

Buri Munyarwanda wese arasabwa kugira uruhare muri ubu bukangurambaga

Ubwo abakozi b’Ikigo k’Igihugu k’Imisoro n’Amahoro (RRA) bashyikirizaga RBC inkunga ya miriyoni zigera ku 125 z’amafaranga y’u Rwanda yo kuvuza abantu 1300, Dr. Nsanzimana yavuze ko uruhare rwa buri wese rukenewe ngo hakumirwe iyi ndwara mbere y’uko bamwe mu bayanduye ibaviramo kanseri y’umwijima.

Yagize ati: “Nge ukora mu rwego rw’ubuzima nakwifuje ko abaganga ari bo bakabaye barafashe iya mbere; bazi uburemere bw’iyi ndwara kuko abarwayi babanyura imbere, cyangwa ubumenyi baba bafite n’ibindi. Ni isomo RRA ihaye n’izindi nzego ngo zidufashe muri uru rugamba rwo guhashya burundu Hepatite C.”

Ubuvuzi bwibanda ku byiciro byibasiwe kurusha ibindi

Minisiteri y’Ubuzima yamaze gutunganya ibikorwa remezo byose bikenewe mu guhashya indwara ya Hepatite C, no guhugura abaganga barenga 350 bakorera mu mavuriro atandukanye mu Gihugu.

Kuri ubu, ubukangurambaga bujyana no gupima Abanyarwanda hagamijwe kubona abarwayi bashya hakibandwa ku byiciro byibasiwe kurusha ibindi.

Muri ibyo byiciro byibasiwe harimo abafite virusi itera SIDA (HIV), imfungwa, abagororwa n’Abanyarwanda bose bari hejuru y’imyaka 45 y’amavuko.

Dr. Nsanzimana avuga ko mu byiciro bifite ibyago byo kwandura iyi ndwara harimo n’abaganga, abakora muri Laboratwari ndetse n’abakora amasuku mu bigo nderabuzima n’ibitaro aho baba bashobora guhura n’ibikoresho byabakomeretsa bikabanduza.

Asobanura ko Hepatite C yandurira mu maraso iyo amaraso y’uwanduye ahuye n’ay’utanduye, ati: “Ni na yo mpamvu abafite Hepatite C cyane ari abantu bakuru, bashobora kuba barayanduye mu buvuzi bwa kera bwari butaravugururwa, mu nkingo abantu baterwaga, ubuvuzi bwa gakondo burimo no gucibwa indasago na ba magendu bari benshi.”

Agaruka no ku kindi kiciro kibasiwe u Rwanda rwihariye cy’Abarokotse Jenoside yakorewe Abatutsi bakomerekejwe n’imihoro cyangwa ibindi bikoresho byakoreshwaga mu bwicanyi, kuko byashoboraga guhuza amaraso y’abafite virusi ya Hepatite C, itera SIDA n’izindi ndwara.

Ubukangurambaga burimo gukorwa buzibanda ku gutangariza Abanyarwanda ububi bw’indwara ya Hepatite C no kubasuzuma ku bigo nderabuzima buri wa Gatandatu no ku Cyumweru mu gihe cy’amezi atandatu.

Minisiteri y’Ubuzima irateganya ko umwaka wa 2020 uzasiga igikorwa cyo gupima Hepatite C ku Banyarwanda bose kirangiye n’ubuvuzi bugakorwa ku bo iyo ndwara izagaragaraho.

Minisitiri w’Ubuzima Dr. Diane Gashumba, atangiza gahunda yo gusuzuma Hepatite C mu Karere ka Gatsibo, Umurenge wa Kiramuruzi

Umuyobozi Mukuru wa RBC Dr. Nsanzimana Sabin (iburyo) ashimira Komiseri Mukuru wa RRA Ruganintwali Pascal ubwitange bagaragaje mu kuvuza Abanyarwanda

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.