26°C , Partly sunny | Kigali-Rwanda
Ibumoso ni Tony Blair arimo kuvuga ku iterambere ry'u Rwanda, ari kumwe na Minisitiri w'Imari n'Igenamigambi, Amb. Claver Gatete (Foto James R)

U Rwanda rugeze kure mu rwego rw’ubukungu-Tonny Blair

Yanditswe na TWAGIRA WILSON

Ku ya 15-02-2018 saa 05:43:54

Tonny Blair wahoze ari Minisitiri w’Intebe w’u Bwongereza avuga ko nyuma y’imyaka igera kuri 24 Jenoside yakorewe Abatutsi ihagaritswe ibikorwa u Rwanda rumaze kwigezaho bigaragaza intambwe idasanzwe rumaze gutera, ubwabyo bitanga ikizere cy’uko ikerekezo 2050 kiganisha Abanyarwanda ku iterambere kizagerwaho nta kabuza.

Ibumoso ni Tony Blair arimo kuvuga ku iterambere ry’u Rwanda, ari kumwe na Minisitiri w’Imari n’Igenamigambi, Amb. Claver Gatete (Foto James R)

Tony Blair ubu uyobora ikigo mpuzamahanga ku iterambere   “Institute of Global Change’’ akaba ari mu Rwanda,   yabivuze mu kiganiro yatangiye i Kigali ejo hashize ku wa Gatatu tariki ya 14 Gashyantare 2018.

Tonny Blair, agereranyije u Rwanda n’ibindi bihugu byateye imbere nyuma y’igihe kinini,   avuga ko u Rwanda rugeze kure mu nzego z’ubukungu, asanga byose bishingira kuba ubuyobozi kuva na mbere bwaragaragaje ubushake bwo guteza imbere abaturage  no mu bihe bigoranye, icyakora atanga inama avuga ko guteza imbere urwego rw’uburezi binyuze mu ikoreshwa ry’ikoranabuhanga cyaba kimwe mu bisubizo byageza u Rwanda ku kerekezo  rwifuza.

Akomeza agira atiGahunda zo guteza imbere urwego rw’uburezi n’ubuyobozi bugendera ku mategeko, gukorera hamwe, ni bimwe mu byagira uruhare mu kureshya abantu benshi kuza mu gihugu kuko bagifitiye ikizere.

Nk’ubu kuba u Rwanda ruza ku isonga mu bihugu by’Akarere, ni uko bashyize imbere ikoranabuhanga ryafashije kubahuza n’amahanga n’isi yose muri rusange, ku buryo no mu rwego rwa politiki, amavugurura mu rwego rw’Afurika Yunze Ubumwe yagenze neza, bityo bizageza umugabane w’Afurika ku rundi rwego rushimishije.’’

Minisitiri w’Imari n’Igenamigambi Amb. Gatete Claver yavuze ko nyuma ya 1994 kugeza ubu u Rwanda rugeze kure kandi hashimishije, abishingiye aho igihugu cyavuye,   atanga ingero zirimo kuba mu    1994 ikigero cy’ubukene bukabije cyari kuri 78%, nta nzego zihari zikora, nta bikorwaremezo, nta rwego rw’abikorera, nta mutekano wari uhari, ariko ubu  ikigero cy’ubukene bukabije kikaba  cyaramanutse  cyane kigeze kuri 16.3%, mu gihe Igihugu giharanira kugana mu bihugu bifite ubukungu buciriritse (Middle income country).

Clare Akamanzi uyobora ikigo k’Igihugu k’iterambere, RDB, yibukije ko u Rwanda rufite amahirwe menshi  ashobora kubyazwa umusaruro maze hakaboneka akazi ku bantu benshi barimo n’urubyiruko, agaragaza uburyo ishoramari mu gihugu ryakomeje kwiyongera,  mu  2017  rikaba rigeze kuri  miliyari  imwe na miliyoni magana atandatu y’amadolari bikubiye mu ishoramari ry’ibikorwa by’ingufu, ubukerarugendo n’ibindi.

Iki kiganiro cyari gifite insanyanyamatsiko igira iti “Inzira n’ikerekezo  u Rwanda ruganamo mu myaka 30 iri imbere”   aho abakitabiriye bose bashima intambwe mu iterambere u Rwanda rugezeho mu rwego rwo kwigira.

Abandi bakitabiriye ni intumwa za Banki y’isi, urwego rw’abikorera, abashakashatsi n’abarimu muri za kaminuza mpuzamahanga nk’iya OXFORD.

TANGA IGITEKEREZO

Leave a Reply

Be the First to Comment!

avatar