19°C , Partly sunny | Kigali-Rwanda
Minisitiri w'Imari n'Igenamigambi Amb. Claver Gatete (Foto James R)

U Rwanda rufite ubushobozi bwo kwishyura inguzanyo zituruka hanze-Amb Gatete

Yanditswe na MUTUNGIREHE SAMUEL

Ku ya 01-02-2018 saa 08:33:53

Minisitiri w’Imari n’Igenamigambi, Amb. Claver Gatete yasobanuye ko nubwo u Rwanda rwaka inguzanyo zituruka hanze, ikigero cyazo kiri hasi ku buryo nta kibazo zishobora kugira ku bukungu bw’igihugu mu bushobozi bwo kwishyura izo nguzanyo.

Minisitiri w’Imari n’Igenamigambi Amb. Claver Gatete (Foto James R)

Mu kiganiro n’itangazamakuru, Amb. Gatete yavuze ko mu byiciro Ikigega Mpuzamahanga k’imari, IMF, gishyiramo ibihugu ku bushobozi bwo kwishyura inguzanyo zituruka hanze, u Rwanda rukiri hasi kuri 36% mu gihe bisabwa ko igihugu kitajya hejuru ya 50% by’umusaruro mbumbe w’ubukungu bw’igihugu (GDP).

Mu byiciro bine ikigega IMF gishyiramo ibihugu, hari ibihugu biba bifite ibibazo bikomeye mu bukungu bwo kwishyura inguzanyo zo hanze (In-Distress), hakaba ikigero cyo hejuru ‘High-Rate Distress’, ikigero cyo hagati ‘Moderate’ n’ibihugu bidafite ikibazo cyo kuzishyura inguzanyo byatse (low-credit countries) cyangwa (low-rate Distress) ari nabyo u Rwanda rurimo.

Amb. Gatete ati “Twe turi muri cya kiciro cya ‘Low-Rate Distress’; akaba ari nayo mpamvu dukora ibyo dukora nta n’inkomyi, nta n’ikibazo kubera ko turi muri  icyo kiciro cyo hasi cyane. Ni ukuvuga ngo ntituragera no kuri ‘Moderate’.

Ubundi bavuga ko amafaranga ukura hanze kuko aza mu madovize akenshi iyo uyishyura mu madovize, ubwo ugomba kugira aho ukura ayo madovize. Ariko ugiye kureba, nk’uko twabivuze ko amafaranga atakabaye arenga 50% twe turacyari kuri 36%.”

Mu kugena igipimo igihugu gihagazeho ku nguzanyo ziva hanze, IMF ntireba gusa ku buryo bw’umusaruro mbumbe w’imbere mu gihugu, ireba no ku bushobozi igihugu gifite bwo kwishyura izo nguzanyo mu madovize uko bumeze.

Amb. Gatete ati “Amafaranga turayafata ariko kandi natwe turabyitondera nk’igihugu; nta bwo dushaka ko tujya mu madeni arenga ubushobozi bwacu kuko byatugiraho izindi ngaruka.

Iyo bigenze gutyo bizana ikibazo kijyanye no guta agaciro k’ifaranga n’imikorere yose; ni yo mpamvu iyi myaka yose kugeza ubu tuguza ariko tunareba n’ibindi byose bijyanye nabyo kugira ngo ntitugire ikibazo.”

Mu bindi bireberwaho mu gupima ubushobozi bw’igihugu ku nguzanyo zo hanze, harebwa no ku madeni igihugu gifite hagereranyijwe n’ibyo cyohereza hanze nka bimwe mu bintu bitandukanye bituma igihugu gishobora kwigengesera cyangwa kwihutira guhangana n’ikibazo cy’ubukungu cyahura nabyo.

Inguzanyo zituruka hanze n’izituruka imbere mu gihugu ni bumwe mu buryo igihugu kifashisha mu gutera inkunga ingengo y’imari y’igihugu kwihutisha imishinga minini y’iterambere igira uruhare mu kuzamura igihugu igaha n’abaturage imirimo.

 

TANGA IGITEKEREZO

Leave a Reply

Be the First to Comment!

avatar