22°C , Mostly sunny | Kigali-Rwanda
Abakuru b'Ibihugu byombi bakurikira isinywa ry'amasezerano hagati y'u Rwanda na Siera Leonne

U Rwanda na Sierra Leone basinye amasezerano y’ubufatanye

Yanditswe na Mutungirehe Samuel

Ku ya 05-07-2019 saa 16:04:46

Perezida Paul Kagame na mugenzi we wa Sierra Leone Julius Maada Bio bakurikiranye umuhango wo gusinya amasezerano y’ubufatanye no korohereza urujya n’uruza hagati y’ibihugu byombi.

Ni umuhango wabaye kuri uyu wa Gatanu tariki 5 Nyakanga 2019, mbere yo gusoza uruzinduko Perezida Julius Maada Bio yagiriye mu Rwanda, ubwo yari yaje kwifatanya n’Abanyarwanda kwizihiza umunsi wo kwibohora ku nshuro ya 25 tariki ya 4 Nyakanga 2019.

Abakuru b’Ibihugu byombi bakurikira isinywa ry’amasezerano hagati y’u Rwanda na Siera Leonne

Perezida Paul Kagame yabanje gushimira mugenzi we wa Sierra Leone Julius Maada, witabiriye kwifatanya n’Abanyarwanda mu munsi mukuru kwibohora ku nshuro ya 25.

Yavuze ko u Rwanda na Sierra Leone byagize byinshi bahuriyeho, birimo amateka mabi ashingiye ku mvururu ariko bihuriye no ku ntumbero yo gushaka ahazaza heza h’abaturage b’ibihugu byombi.

Perezida Kagame yagize ati: “Uruzinduko rwawe hano, Nyakubahwa Perezida, ni ingenzi kuko rudufasha kongera ingufu mu mubano wacu dusanganywe. Turifuza gushingira kuri uwo mubano w’ubuvandimwe n’ubufatanye mu gusangira ubunararibonye mu bintu by’ingenzi.”

Perezida Kagame yavuze ko amasezerano ibihugu byombi byashyizeho umukono ashimangira ubushake bwo gushimangira umubano uri hagati y’ibihugu byombi, gukorera hamwe mu rwego rwo kongera amahirwe hagati y’abaturage b’ibihugu byombi.

Yakomeje avuga ko u Rwanda na Sierra Leone ari ibihugu by’umuryango w’Afurika Yunze Ubumwe, kandi hamwe n’ibindi bihugu bigize uwo muryango bazakomeza gukorera hamwe mu kugera kuri gahunda z’uyu muryango.

Ati “By’umwihariko, dushyize imbere gushyira mu bikorwa amasezerano ashyiraho isoko rusange rya Afurika (AfCFTA); u Rwanda na Sierra Leone bemeje burundu, nk’uko byitezwe kugarukwaho mu nama y’abakuru b’ibihugu iteganyijwe kubera muri Niger.”

Yasoje ijambo rye yizeza mugenzi we ko ibihugu byombi bizamokeza guharanira kugera ku ntego binyuze mu biganiro bitandukanye bizagenda biba hagati y’abayobozi bakuru b’ibihugu byombi.

Amasezerano yashyizweho umukono ni ay’ubufatanye muri rusange, amasezerano y’ubufatanye mu biganiro mu rwego rwa politiki, amasezerano ku gukuriranaho viza ku bafite pasiporo z’abadipolomate n’abafite iz’abayobozi.

TANGA IGITEKEREZO

Leave a Reply

Your email address will not be published. Required fields are marked *