21°C , Partly cloudy | Kigali-Rwanda
Minisitiri wa MININFRA Gatete Claver(ibumoso) ashyikiriza impano Ambasaderi wa Brazil mu Rwanda Fernando Estellita Links de Salvo Coimbra, nyuma yo gushyira umukono ku masezerano y'ubufatanye (Foto Regis)

U Rwanda na Brazil basinye amasezerano y’ubufatanye mu by’ingendo zo mu kirere

Yanditswe na Kayira Etienne

Ku ya 15-08-2019 saa 15:42:17

U Rwanda na Brazil basinyanye amasezerano y’ubufatanye mu bijyanye n’ingendo zo mu kirere, yashyizweho umukono na Amb. Claver Gatete, Minisitiri w’Ibikorwa remezo (MININFRA) ku ruhande rw’u Rwanda, na Ambasaderi wa Brazil mu Rwanda Fernando Estellita Lins, ufite ikicaro i Nairobi muri Kenya.

Nyuma yo gusinya aya masezerano, bombi batangaje ko bishimiye icyo gikorwa cy’ubutwererane bagezeho, igikorwa kigiye gutuma ibihugu by’u Rwanda na Brazil birushaho guteza imbere imikoranire mu rwego rw’ubwikorezi bwo mu kirere no kwagura amarembo y’urujya n’uruza rw’abantu ku mpande zombi.

Mu kiganiro n’itangazamakuru, Minisitiri Gatete yagize ati “Aya masezerano y’imikoranire ku by’ingendo zo mu kirere dusinyanye na Leta ya Brazil, aje akurikira andi ibihugu byombi byashyizeho umukono mu 2017 i Sri Lanka mu nama ngarukamwaka y’Umuryango Mpuzamahanga uhuriwemo n’indege za gisivili ICAN-ICAO (International Civil Aviation Organization). Aya masezerano agiye gufasha mu rujya n’uruza rw’abaturage bo ku mpande zombi, kugendererana hakoreshejwe indege zacu n’iz’iwabo”.

Imikoranire hagati y’ibihugu byombi ngo izarushaho guteza imbere ubuhahirane harimo no korohereza ba Mukerarugendo bo mu Majyepfo y’Amerika (Aho Brazil iherereye) gusura u Rwanda.

Minisitiri w’Ibikorwa remezo mu Rwanda, Amb. Claver Gatete, yakomeje atangaza ko basanzwe bafitanye amasezerano y’ubufatanye na Brazil mu rwego rw’ubuhinzi. Ati “Gukorana na Leta ya Brazil harimo inyungu nyinshi kuko ari Igihugu cya mbere ku Isi mu buhinzi bwa Kawa kuva kera. Ni kimwe mu bihugu biteye imbere mu bwikorezi bwo mu kirere kuko gikora izi ndege mubona dukoresha”.

Minisitiri Amb. Gatete Claver(ibumoso) asinyana amasezerano y’ubufatanye na Fernando Estellita Lins de Salvo Coimbra, Ambasaderi wa Brazil mu Rwanda(Foto Regis)

Minisitiri Gatete yatangaje ko hari ibindi byinshi ngo bazakorana na Brazil. Ikigaragara cyo, ni uko indege za “Rwanda Air” zigiye kuzatangira gukorera muri Brazil mu gihe kitarambiranye.

Ambasaderi wa Brazil mu Rwanda Fernando Estellita Lins de Salvo Coimbra, mu ijambo nyuma yo gusinyana ayo masezerano y’ubufatanye na Minisitiri Gatete wa MININFRA, yatangaje ko yishimiye cyane ko bagiye gukorana n’Igihugu cy’u Rwanda kizwiho guteza imbere urwego rw’ingendo n’ubwikorezi bwo mu kirere. Ati “Sinshidikanya ko ibihugu byacu byombi bizungukira muri aya masezerano dushyizeho umukono uyu munsi hano mu Rwanda”.

Amb. Fernando yabwiye itangazamakuru ko Igihugu cyabo ngo gifite ibibuga by’indege byo ku rwego mpuzamahanga birenga 100. Brazil ngo ifite indege za gisivile zirenga 450 n’iz’abikorera zirenga 700.

Kimwe ngo mu bigaragaza ko Igihugu cyabo cyateye imbere mu bwikorezi bwo mu kirere, ni uko ngo mu mwaka ushize wa 2018 bakiriye abagenzi bagera kuri miriyoni umunani n’igice (8 500 000). Yibukije ko kubera ubuhanga igihugu ke kizwiho ku rwego rw’Isi mu by’umupira w’amaguru, ngo nta mpamvu yatuma batagira icyo bakoranaho n’u Rwanda.

Minisitiri wa MININFRA Gatete Claver(ibumoso) ashyikiriza impano Ambasaderi wa Brazil mu Rwanda Fernando Estellita Links de Salvo Coimbra, nyuma yo gushyira umukono ku masezerano y’ubufatanye (Foto Regis)

TANGA IGITEKEREZO

Leave a Reply

Your email address will not be published. Required fields are marked *