22°C , Mostly sunny | Kigali-Rwanda
Perezida Paul Kagame (iburyo) na Perezida wa Botswana Mokgweetsi Eric Keabetswe Masisi (ibumoso) bishimira amasezerano y'ubufatanye yari amaze gusinywa

U Rwanda na Botswana bisangiye guteza imbere abaturage-Kagame

Yanditswe na MUGABO LAMBERT

Ku ya 28-06-2019 saa 08:57:32

Umukuru w’Igihugu Paul Kagame, ejo hashize yatangiye uruzinduko rw’iminsi ibiri mu gihugu cya Botswana, ari kumwe na Madamu Jeannette Kagame. Perezida Kagame akaba yaragaragaje ko ibihugu byombi bihuriye ku ntego yo guteza imbere imibereho myiza y’ababituye.

Perezida Paul Kagame yabitangaje ku mugoroba w’ejo hashize, ubwo ari kumwe na Madamu Jeannette Kagame bakirwaga ku meza na Perezida wa Botswana Dr. Mokgweetsi Masisi na Madamu Neo Masisi.  Kagame yagize ati “U Rwanda na Botswana bisangiye intego y’imibereho myiza n’uburumbuke bw’abaturage bacu, kandi twishimiye kuba hano, mu rwego rwo gushimangira ubucuti bwacu n’ubufatanye bwacu”

Kagame yakomeje avuga ku mikoranire y’ibihugu byombi, ati “U Rwanda na Botswana ni ibihugu bihurira mu mu Muryango w’Ubumwe bw’Afurika, kandi dukomeje gukorera hamwe n’ibindi bihugu by’ibinyamuryango mu kwihuza no guteza imbere umugabane wacu.”

Kagame kandi yagarutse ku bufatanye bw’ibihugu byombi, aho yavuze ko inzego z’ibi bihugu zakunze gukorana mu rwego rwo guha imbaraga ubufatanye mu nzego zihutirwa zizatuma hahinduka ubuzima bw’abaturage b’ibihugu byombi. Akaba yarashimangiye ko adashidikanya ko ibi bizagerwaho kubera ko ibihugu byombi byiyemeje gukorera mu mucyo, no kugeza abaturage ku iterambere bagizemo uruhare.

Muri uru ruzinduko, nyuma y’ibiganiro byahuje Perezida Paul Kagame na mugenzi we wa Botswana Mokgweetsi Masisi, habayeho umuhango wo gushyira umukono ku masezerano y’ubufatanye hagati y’ibihugu byombi.

Aya masezerano arimo ayo guteza imbere ubucuruzi n’ishoramari, ubuhinzi, ubuzima, ubukerarugendo, umutekano, ibikorwe remezo, itumanaho, umuco n’uburezi, n’ibindi.

Ku munsi w’ejo hashize kandi, Perezida Kagame na Madamu Jeannette Kagame basuye ikigo gikora ibijyanye n’ubworozi butanga inyama cya ‘FeedMaster Botswana’, berekwa imikorere yacyo n’uburyo bwo kwita ku matungo mbere yo kuyatunganyamo inyama zoherezwa mu mahanga.

Kagame yavuze ko ari ubwa mbere asuye Botswana, kandi ko yabyishimiye. Uru ruzinduko rurasozwa n’ikiganiro n’abanyamakuru.

Perezida Paul Kagame (iburyo) na Perezida wa Botswana Mokgweetsi Eric Keabetswe Masisi (ibumoso) bishimira amasezerano y’ubufatanye yari amaze gusinywa

Amafoto  y’umunsi wa mbere w’uruzinduko rwa Perezida w’u Rwanda Paul Kagame muri  Botswana

TANGA IGITEKEREZO

Leave a Reply

Your email address will not be published. Required fields are marked *