22°C , Partly cloudy | Kigali-Rwanda
Iyi ni imwe mu nyubako zigezweho i Kigali zakira inama izwi ku izina rya 'Kigali Convention Center'

U Rwanda ku mwanya wa 3 muri Afurika mu kwakira inama mpuzamahanga

Yanditswe na MUGISHA BENIGNE

Ku ya 10-05-2018 saa 07:02:22

Ishyirahamwe mpuzamahanga ritegura inama zikomeye ku Isi (ICCA) ryashyize  u Rwanda, by’umwihariko Umujyi wa Kigali  ku mwanya wa gatatu muri Afurika mu hantu hakunzwe kwakirirwa  Inama mpuzamahanga. Ni nyuma  y’Umujyi wa  Cap Town uri ku mwanya wa mbere  na Johannesbourg ku wa kabiri,  imigi yombi ibarizwa  muri Afurika y’Epfo.

Iyi ni imwe mu nyubako zigezweho i Kigali zakira inama izwi ku izina rya ‘Kigali Convention Center’

Iyi raporo yashyizwe ahagaragara ku wa Mbere tariki ya 07 Gicurasi 2018 na ICCA (International Congress and Convention Association) yashingiye ku nama mpuzamahanga zakiriye abantu basaga 50 zabereye mu Rwanda inshuro imwe cyangwa 2, zirimo  Inama nyafurika mu bushakashakatsi n’amahugurwa ku ndwara ya Kanseri (AORTIC), Inama y’Ikigega Global Fund (BMGF), Inama y’ishyirahamwe nyafurika ryita ku bukerarugendo (ATA), Inama rusange y’ishyirahamwe rya Sosiyete zitwara abantu mu ndege muri Afurika (AFRAA) n’izindi.

U Rwanda kandi rwakiriye inama ku ikoranabuhanga muri Afurika (Transform Africa Summit) yitabiriwe n’abantu barenga 1500.

Umuyobozi Mukuru w’Ikigo gishinzwe kumenyekanisha ubukerarugendo bushingiye ku nama (Rwanda Convention Bureau), Denise B. Omany, yagize ati “Umwanya u Rwanda rwabonye mu bijyanye no kwakira inama wadushimishije cyane, ni uburyo bw’inyongera mu kwinjiriza igihugu. Mu Rwanda habarurwa abantu 28 308 bitabiriye inama mu mwaka wa 2017 n’abandi 23 804 mu mwaka wa 2016.”

Omany yavuze kandi ko ubukerarugendo bushingiye ku nama bwinjiriza igihugu amadovize, bukaba bugifite umumaro munini mu iterambere kuko bwinjiza 15% by’aturuka mu bukerarugendo muri rusange.

Ubukerarugendo bushingiye ku nama nk’uko bisobanurwa na Omany bwinjirije u Rwanda miliyoni 42 z’Amadorali y’Amerika mu mwaka wa 2017 kandi harateganywa ko muri uyu mwaka buzinjiza agera kuri miliyoni 74 z’Amadorali.

Yongeyeho ati “Twishimiye umwanya u Rwanda rwabonye kandi twihaye intego yo kongera imbaraga mu byo dukora tukazabona umwanya w’imbere ubutaha mu bijyanye no gutegura inama”.

RDB itangaza ko kugira ngo ibi bigerweho, ari uko u Rwanda rwashyizeho uburyo bwo koroshya imitangire ya Visa ku bihugu byinshi byo ku Isi kuko itangirwa imbere mu gihugu kandi rukaba rwaranashyizeho uburyo bw’ingendo zo mu kirere zihuza Kigali n’Afurika zikorwa na  RwandAir.

 

 

TANGA IGITEKEREZO

Leave a Reply

Be the First to Comment!

avatar