21°C , Partly sunny | Kigali-Rwanda
Umunyamabanga nshingwabikorwa wa RECSA, Lt Elamin Abdelgadir (Foto Twagira W.)

U Rwanda ku isonga mu kurwanya intwaro nto mu karere

Yanditswe na TWAGIRA WILSON

Ku ya 10-10-2018 saa 07:39:12

Umuryango wo mu rwego rw’Akarere ufite inshigano zo kurwanya ikwirakwizwa ry’intwaro nto (RECSA) washimye uko u Rwanda rurwanya ikwirakwizwa ry’intwaro nto.

Abahagarariye ibihugu 15 bihuriye muri uyu muryango bateraniye i Kigali mu nama yiga icyakorwa mu gufasha ibihugu gushyira umukono ku masezerano yo gukumira intwaro nto.

Umunyabanga Nshingwabikorwa wa RESCA, Lt. Gen. Baldreldin Elamin Abdelgadir,  yizeza ko RECSA izakomeza gushyigikira ibihugu bikagera ku nshingano byiyemeje.

Lt. Gen. Baldreldin Abdelgadir yizeza ko RECSA izakomeza gushyigikira u Rwanda muri urwo rwego, ku buryo n’ibindi bihugu byo mu karere bizakurikiza intambwe rugezeho.

Umunyamabanga nshingwabikorwa wa RECSA, Lt Elamin Abdelgadir (Foto Twagira W.)

Ati “Mu bihugu byose bigize uyu muryango turashima intambwe u Rwanda rumaze kugeraho mu kurwanya ikibazo gikomeye kirebana n’ikwirakwizwa ry’intwaro nto mu karere, ikindi ubu rukaba ruri mu bihugu bitekanye.”

Mu myaka 2 ishize, u Rwanda ku bufatanye n’Umuryango RECSA, rwasenye toni 55 zigizwe n’intwaro zari zishaje zarengeje igihe.

Icyo gikorwa cyabereye mu kigo cya Gisirikare cya Gabiro ku ya 26 Nyakanga 2016, gisoza ku ya 31 Nyakanga 2016.

Minisitiri w’Ubutabera w’u Rwanda yavuze ko ikwirakwizwa ry’intwaro nto ari ikibazo kikibangamiye amahoro y’akarere, ay’ibihugu ndetse n’Isi muri rusange.

Jonston Busingye yibukije abahagarariye ibihugu byo mu karere ko amahoro n’ituze abantu bakeneye bidashobora kugerwaho hatabayeho ubufatanye.

Akomeza ati “Ikwirakwizwa ry’intwaro nto ni ikibazo kibangamiye ibihugu byo mu karere binyuze muri ba rushimusi baba abantu, n’inyamaswa, ubucukuzi bw’amabuye, imvururu z’urudaca mu karere, imitwe yitwaje intwaro.

Busingye yashimangiye ko “abakora ibyo hafi 100% bose bakoresha intwaro nto baba barabonye mu buryo bunyuranyije n’amategeko.”

Yakomeje agira ati “Ibihugu birasabwa gufatanya kurwanya izo ntwaro ziha icyuho ibikorwa by’ubugizi bwa nabi birimo iby’iterabwoba n’ibindi kuko bidindiza iterambere rirambye.”

TANGA IGITEKEREZO

Leave a Reply

Your email address will not be published. Required fields are marked *