19°C , Showers | Kigali-Rwanda
Minisitiri w’Ububanyi n’Amahanga akaba n’Umuvugizi wa Guverinoma y’u Rwanda, Dr. Sezibera Richard yandika ubutumwa bw'ishimwe ku mwami w'abami mushya w'u Buyapani

U Buyapani n’u Rwanda bizakomeza gutsura umubano

Yanditswe na BUGINGO FIDELE

Ku ya 04-05-2019 saa 16:52:18

Ku wa  Kane tariki 02 Gicurasi 2019, Ambasaderi w’u Buyapani mu Rwanda, Mr Takayuki Mishayita yakiriye mu rugo iwe abayobozi batandukanye ndetse n’abahagarariye ibihugu byabo mu Rwanda  mu  birori byo kwishimira kujyaho k’umwami w’abami mushya w’u Buyapani, Naruhito.

Uyu mwami w’abami yagiyeho tariki 01 Gicurasi 2019 asimbuye umubyeyi we Akihito akaba aba abaye uwa 126 mu mateka y’iki gihugu, ikindi akaba ari ubwa mbere hagiyeho umwami w’abami mushya undi akiriho.

Umwami w’abami mushya w’u Buyapani, Naruhito

Ambasaderi w’u Buyapani mu Rwanda, Mr Takayuki Mishayita yatangaje ko ari ibyishimo ku Bayapani bose. Akomeza avuga ko anishimira uburyo umubano w’u Rwanda n’u Buyapani ukomeje  kuzamuka aho anashimangira ko mu myaka  ibiri ishize kampani zo mu Buyapani zikora ishoramari mu Rwanda ziyongereye zikava  kuri 7 zikaba zigeze kuri 27.

Mr Takayuki yanavuze ko mu minsi ya vuba icyogajuru gito cyateranyijwe n’Abanyarwanda bafatanyije na Kaminuza  ya Tokyo kizaba cyarangiye.

Minisitiri w’Ububanyi n’Amahanga akaba n’Umuvugizi wa Guverinoma y’u Rwanda, Dr. Sezibera Richard wari n’umushyitsi mukuru muri ibi birori  yatangaje ko mu izina rya Leta y’u Rwanda n’irye muri rusange  bishimiye uku kujyaho k’umwami  w’abami  mushya w’igihugu cy’u Buyapani.

Yakomeje avuga ko u Rwanda n’u Buyapani bibanye neza kandi bifuza ko umubano wakomeza anashimira byinshi iki gihugu kimaze gufasha u Rwanda mu byiciro bitandukanye birimo ikoranabuhanga, uburezi n’ibindi.

Mu gusoza ibi birori, ababyitabiriye banditse mu gitabo ubutumwa bw’ishimwe ku mwami w’abami mushya  kikazohezwa mu Buyapani.

Minisitiri w’Ububanyi n’Amahanga akaba n’Umuvugizi wa Guverinoma y’u Rwanda, Dr. Sezibera Richard yandika ubutumwa bw’ishimwe ku mwami w’abami mushya w’u Buyapani

Muri Mutarama 2019, Perezida w’u Rwanda Paul Kagame na Madamu Jeannette Kagame basuye u Buyapani banabonana n’umwami w’abami ucyuye igihe, Akihito.

Muri uru ruzinduko kandi Perezida Kagame ari kumwe n’abayobozi batandukanye b’u Rwanda bagiranye ibiganiro na Minisitiri w’Intebe w’u Buyapani Shinzo Abe, bijyanye n’umubano w’ibihugu byombi nyuma banitabira ihuriro ry’ishoramari muri ibi bihugu byombi “Japan Rwanda Business Forum”.

TANGA IGITEKEREZO

Leave a Reply

Your email address will not be published. Required fields are marked *