22°C , Mostly cloudy | Kigali-Rwanda
Ambasaderi Miyashita Takayuki iburyo ashyikiriza Frere Hakizimana Gerard inkunga yo kubaka amacumbi y'abanyeshuri 400 (Foto James R)

U Buyapani bwatanze miliyoni 79 zo kubaka amacumbi y’abanyeshuri 400

Yanditswe na admin

Ku ya 23-01-2018 saa 07:25:02

Ambasaderi w’u Buyapani mu Rwanda, Takayuki Miyashita yashyikirije inkunga y’amadolari y’Amerika 81 857 agera kuri miliyoni 79 z’amafaranga y’u Rwanda ishuri ry’imyuga rya “Saint Joseph Nzuki Vocational Center” yo kubaka amacumbi y’amanyeshuri 400, riherereye mu murenge wa Kabagali mu karere ka Ruhango.

Ambasaderi Miyashita Takayuki iburyo ashyikiriza Frere Hakizimana Gerard inkunga yo kubaka amacumbi y’abanyeshuri 400 (Foto James R)

Ubwo yakiraga iyo nkunga, tariki ya 22 Mutarama 2018, Umuyobozi w’Ishuri ryashyikirijwe iyo nkunga, Furere Hakizimana Gerard, yavuze ko ije gukemura ikibazo cyari kibakomereye kandi igiye gutuma abana bagera ku 100 bajya ku ishuri, abigaga bataha baruhuke urugendo rwa buri munsi.

Yasobanuye ko iyo nkunga ije gushyira mu bikorwa umushinga yari yasabiwe, wo kubaka icumbi ry’abanyeshuri baburaga aho baba bigatuma bakora urugendo rurerure bajya ku ishuri, bikanatuma bamwe babura uko biga imyuga kuko batuye kure.

Ati “Uyu mushinga muteye inkunga uzazamura imibereho myiza ku kigero cya 80% ku banyeshuri 400, uzongera umubare w’abanyeshuri mu kigo cyacu ku kigero cya 25%, icya nyuma uzatuma ibyavaga mu baturiye ibigo biyongera kuko abanyeshuri bazaboneraho guhanga imirimo”.

Furere Hakizimana yabwiye abanyamakuru ko icyo kigo cyari gisanzwe gifite abanyeshuri babarirwa muri 300 baba mu macumbi ashaje; bigaga imyuga itandukanye irimo kubaza, kubaka, gukanika ibinyabiziga, no kudoda.

Ambasaderi Takayuki yavuze ko bumvise neza ingorane z’abanyeshuri bagenda ibilometero biri muri 7 kugeza ku 10 n’amaguru buri munsi bagiye kwiga.

Ati “Twumva neza ko abanyeshuri benshi bari mu bihe bitaboroheye, bamwe muri bo ni imfubyi kandi bari mu buzima butaboroheye, ariko ku bufasha bwanyu (ikigo) bano bana bashobora kugira ejo hazaza heza.”

Yashimye uko u Rwanda rwihuta mu iterambere ariko rishyira imbere uburezi kuri bose, yibutsa ko Ambasade y’u Buyapani imaze gutera inkunga imishinga 90 yo mu rwego rw’uburezi, amazi n’isukura, kimwe no mu iterambere ry’ubuhinzi.

Usibye kuba ishuri rya Saint Joseph Nzuki VTC rifite umwihariko wo gufasha abana b’imfumbi kwiga, rivuga ko rifasha abaturage mu buryo butandukanye burimo no gutanga umusanzu wo kubaka amacumbi y’abatishoboye n’ibindi bijyanye n’imyuga bigisha.

 

TANGA IGITEKEREZO

Leave a Reply

Be the First to Comment!

avatar