24°C , Mostly cloudy | Kigali-Rwanda

U Buyapani bwashimye uko u Rwanda rufasha abahoze mu mitwe yitwaje intwaro

Yanditswe na Mukagahizi Rose

Ku ya 19-02-2020 saa 16:33:00
Ambasaderi w’u Buyapani mu Rwanda Masahiro IMAI

Ambasaderi w’u Buyapani mu Rwanda Masahiro IMAI, yasuye ibikorwa bya Komisiyo y’Igihugu yo Gusezerera no Gusubiza mu Buzima Busanzwe abari Abasirikare (RDRC) ashima gahunda ya Leta y’u Rwanda yo kwakira no gusubiza mu buzima busanzwe abahoze mu mitwe yitwaje intwaro.

Amb. Masahiro yabitangaje ubwo yagiriraga uruzinduko mu kigo cya Mutobo rugamije kureba uko ibikorwa u Buyapani butera inkunga u Rwanda bimeze n’ibindi bafatanya narwo.

Ibyo bikorwa birimo guha amasomo y’ubumenyingiro abahoze mu gisirikare basubijwe mu buzima busanzwe bafite ubumuga hagati ya 2005 na 2008, ndetse no kwigisha abahoze ari abarwanyi n’abandi bafite ubumuga hagati ya 2011 na 2014 binyuze mu mishanga itandukanye yatewe inkunga n’Ikigega cy’Abayapani k’Iterambere Mpuzamahanga ‘JICA’.

Amb. Masahiro yashimye gahunda ya Leta y’u Rwanda mu kwakira no gusubiza mu buzima busanzwe abahoze ari abarwanyi mu mitwe yitwaje intwaro ibarizwa mu mashyamba yo muri Repubulika Iharanira Demokarasi ya Congo.

Avuga ko ibikorwa byo gufasha abarwanyi bavuye mu mashyamba ya Congo u Rwanda rwakoze ari ntagereranywa kuko ari nta handi wakibona ku Isi.

Ambasaderi Masahiro yagize ati: “Mu rwego rwo gushyikigira isubizwa mu buzima busanzwe abahoze mu mitwe yitwaje intwaro n’abandi bantu bafite ubumuga, JICA yatanze inkunga mu byiciro bibiri ingana na miriyoni 3,3 z’amadorari ya Amerika”.

Avuga ko abasubizwa mu buzima busanzwe ari amaboko igihugu kiba cyungutse mu mirimo igiteza imbere kuko ku Isi hose ibihugu bikenera abakozi bahuguwe bafite ubushobozi.

Kubera iyo mpamvu, avuga ko amahugurwa mu by’imyuga ari ingenzi cyane mu kubafasha gusubizwa mu buzima busanzwe no kwihangira imirimo ibyara inyungu.

Mu bindi, ngo yizera ko ibikorwa bya Komisiyo bizagera kuri benshi kandi bikabafasha guhindura imibereho yabo.

Umuyapanikazi, Katayama Satsuki, wiga muri Kaminuza arimo kwimenyereza umwuga muri Komisiyo y’Igihugu ishinzwe gusubiza mu buzima busanzwe Ingabo zavuye ku rugerero, akaba yibanda ku bikorwa byayo, Ambasaderi Masahiro yavuze ko ibi ari ikimenyetso ko Abayapani baha agaciro ibikorwa bya Komisiyo.

Komisiyo y’Igihugu yo gusezerera no gusubiza mu buzima busanzwe abahoze ari abasirikare (RDRC) yahawe igihembo cy’ubudashyikirwa cya Perezida w’Ikigo mpuzamahanga cy’Ubutwererane cy’Abayapani (JICA) kubera uruhare yagize mu kubaka amahoro, ubumwe n’ubwiyunge ndetse no guharanira imibereho myiza y’abahoze ari abasirikare baturutse mu mitwe itandukanye.

Mu bindi, Amb. Masahiro yavuze ko igihugu ke kizakomeza gutera inkunga u Rwanda muri iyi gahunda haba mu bitekerezo n’amafaranga mu gukomeza gusubiza mu buzima busanzwe abo bantu ari nako bakomeza ibikorwa by’ishoramari kugira ngo ishoramari rishinge imizi hagati y’ibihugu byombi.

Abahawe amasomo y’imyuga i Mutobo bafite ikizere k’ejo heza

Umwe mu bari guhabwa amasomo wavuye mu mashyamba ya Kongo akaza afite ubumuga witwa Habiyaremye Patrick, ubu yahisemo kwiga umwuga w’ubuhinzi, yavuze ko guhingira mu gihugu cy’abandi nta kintu bimaze kuko ngo nta n’inyungu bifite.

Yagize ati: “Narakoze bihagije mu gihugu cya Kongo, mbona amafaranga ariko ntayo nazanye. Ngeze hano nsanga umuntu arakora ajya aho ashaka, ibyiwe abicunga uko ashaka bitandukanye n’ubuzima twabagaho muri Kongo.”

Nyirahabimana Leoncie, umwe mu bavuye mu mashyamba ya Kongo, ubu ari kwiga ubudozi, yavuze ko ubu atuje kandi ibyo yize byo kudoda bizamufasha mu buzima busanzwe agiye kwinjiramo mu minsi iri imbere.

Komiseri muri  Komisiyo y’Igihugu Ishinzwe Gusezerera no Gusubiza mu Buzima Busanzwe Abahoze ari Abasirikare, Nyamurangwa Fred, yashimye ibikorwa baterwamo inkunga n’u Buyapani, avuga ko ari abafatanyabikorwa beza mu iterambere.

Avuga ko kugeza ubu ubumenyi bahaye abanyuze mu kigo cya Mutobo bwabagiriye akamaro kuko ari bwo bakoresha mu gutunga imiryango yabo.

Imyaka 26 irashize bamwe mu Banyarwanda bakiri mu mashyamba ya Kongo. Komiseri Nyamurangwa yibutsa abakiriyo ko atari iwabo kandi ko  hanze y’iwabo hahora ari hanze, bityo ko imiryango y’Igihugu cyabo  ifunguye, akabasaba gutaha bagafatanya n’abandi Banyarwanda kubaka Igihugu cyabo.

Ikigo cya Mutobo cyashinzwe mu mwaka wa 2002, kikaba kimaze kunyurwamo n’abasaga ibihumbi 11.

Amahugurwa mu by’imyuga ari ingenzi cyane mu kubafasha gusubizwa mu buzima busanzwe no kwihangira imirimo ibyara inyungu

Amahugurwa mu by’imyuga ari ingenzi cyane mu kubafasha gusubizwa mu buzima busanzwe no kwihangira imirimo ibyara inyungu

Ambasaderi w’u Buyapani mu Rwanda Masahiro IMAI i Buryo ari kumwe na Komiseri muri RDRC Nyamurangwa Fred

Umwanditsi:

Mukagahizi Rose

Tanga Igitekerezo

Email yanyu ntigaragazwa ku rubuga. Amazina na Email ni ngombwa.