17°C , Thunderstorms | Kigali-Rwanda

U Buyapani bwashimwe ko bwahinduye abahinzi gakondo ab’umwuga

Yanditswe na Ntawitonda Jean Claude

Ku ya 20-09-2019 saa 17:28:52
Umunyamabanga Uhoraho muri MINAGRI Musabyimana Jean Claude amurikirwa ibyakozwe mu mushinga SMAP na Amb. Takayuki Miyashita

Leta y’u Rwanda yashimiye iy’u Buyapani ku ruhare ikomeje igira mu iterambere ry’abahinzi bato mu Rwanda binyuze mu mushinga w’ubuhinzi buhingira isoko (SMAP/Smallholder Market-oriented Agriculture Project).

Uwo mushinga umaze imyaka 5 ukorera mu turere 12 tw’u Rwanda, wafashije abahinzi b’imboga n’imbuto ndetse n’ab’umuceri gukora ubuhinzi bw’umwuga bujyana n’isoko ry’umusaruro uzaboneka.

Muri utwo turere wakoreyemo, abahinzi bigishijwe uko bashobora guhingira isoko aho gutegereza kuzaribona nyuma yo kubona umusaruro, kandi bagahinga kijyambere kugira ngo umusaruro wabo ube wujuje ubuziranenge bukenewe.

Uyu mushinga wakoranye n’abahinzi b’imboga n’imbuto barenga 22,000 bibumbiye mu makoperative 232, n’ab’umuceri barenga 8900 bibumbiye muri koperative 22.

Abahinzi bahawe amahugurwa banafashwa guhinga kinyamwuga, bafashwa gushaka amasoko y’umusaruro bongera n’ubwiza bwawo.

Abahinzi bitabiriye umuhango wo kwishimira ibimaze kugerwano n’uwo mushinga no kubishyikiriza Leta y’u Rwanda wabaye ku wa Kane tariki 19 Nzeri 2019, bashimangiye ko bamenye amahirwe ari mu guhinga kijyambere bakaba baratangiye kubitoza n’abandi.

Mbonyumugaragu Ananias waturutse mu Karere ka Nyamasheke, Umurenge wa Macuba mu Kagari ka Nyakabingo, yagize ati: “Duhinga karoti, beterave, intoryi, amashu n’ibindi, kandi byose tubikora neza kinyamwuga. Mbere twakoraga ubuhinzi bwa gakondo, ariko aho Abayapani baziye batwigishije guhinga dushaka isoko, bituma tumenyana n’abantu benshi batugurira umusaruro.”

Umunyamabanga Uhoraho muri Minisiteri y’Ubuhinzi n’Ubworozi (MINAGRI) Musabyimana Jean Claude, yashimiye u Buyapani ku ruhare rukomeye rugira mu iterambere ry’ubuhinzi n’ubworozi mu Rwanda, anagaruka kuri uyu mushinga wazaniye abahinzi umwihariko bari batamenyereye.

Ati: “Nanyuzwe n’uburyo bakoresheje mu gushyira mu bikorwa uyu mushinga bahereye ku kubanza kwiga isoko. Uyu mushinga SMAP waje nk’igisubizo ku byo twaburaga kuko hari ubwo abahinzi bibandaga ku gushaka umusaruro bakirengagiza uko isoko ryawo rihagaze.”

Yakomeje ashima uburyo Leta y’u Buyapani, ibinyujije mu Kigo mpuzamahanga cy’Ubutwererane cy’Abayapani (JICA), yafashije abahinzi kugira uruhare rukomeye mu ishyirwa mu bikorwa ry’uyu mushinga.

Ambasaderi w’u Buyapani mu Rwanda Takayuki Miyashita, yatangaje ko Leta y’u Buyapani itazatezuka gukorana na Leta y’u Rwanda mu mishinga itandukanye, yiganjemo iy’ubuhinzi kuko bufatiye runini umubare munini w’Abanyarwanda.

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.