U Bushinwa: Inyama z’inkoko zakuwe muri Brezil zasanzwemo COVID-19

Yanditswe na Imvaho Nshya

Ku ya 13-08-2020 saa 18:58:24

Inyama z’amababa y’inkoko zikonjesheje zoherejwe mu Bushinwa zivanywe mu Gihugu cya Brazil zapimwe basanga zanduye icyorezo cya COVID-19 nk’uko byemejwe n’ubuyobozi bw’u Bushinwa kuri uyu wa Kane tariki ya 13 Kanama 2020.

Igipimo cyafashwe ku gahu k’inyuma y’inyama z’amababa y’inkoko, zikaba zibaye ikindi kiribwa cyasanzwemo COVID-19 nk’uko byatangajwe n’Ibiro Ntaramakuru by’Abongereza (Reuters).

Uretse izo nyama zoherejwe mugace ka Shenzhen, haherutse gupimwa n’amapaki (emballages) apfunyitswemo ubwoko bw’amafi yo muri Equador asanganwa COVID-19.

Kuba COVID-19 ishobora gusigara ahantu ikahamara igihe kinini, ni kimwe mu bikekwa ko ari yo ntandaro y’uko hapimwa ibiribwa cyangwa ibikoresho bitandukanye bigasanganwa ubwandu bwa COVID-19.

Nubwo Ikigo gishinzwe kurwanya no gukumira indwara (CDC) kivuga ko nta gihamya ifatika iragaragaza ko guhererekanya ibiribwa bishobora kubyanduza COVID-19, u Bushinwa bwakajije ingamba zo gupima ibiribwa byose bitumizwa mu mahanga.

Ubuyobozi bwa CDC buvuga ko Koronavirusi ikwirakwizwa mu bantu gusa binyuze mu matembabuzi, ariko bukongeraho ko bishoboka ko umuntu yayandura akoze ahantu cyangwa ku kintu cyakozweho n’uwanduye, aho ni ho hazamo ibiribwa n’icyo bipfunyitswemo, ku buryo ubikozeho agakora ku munwa cyangwa mu maso ahita aha urwaho agakoko.

Bivugwa ko ingorane zo kwandurira COVID-19 mu biribwa ari nkeya cyane kuko virusi iyitera idashobora gukurira ku biribwa.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.