U Bushinwa: Impuguke za OMS zigiye gucukumbura ahakomotse COVID-19
Yanditswe na TUMUKUNDE GEORGINE
Yasuwe:
Yavuzweho:
Impuguke z’Ishami ry’Umuryango w’Abibumbye ryita ku Buzima (OMS), zitegerejwe mu Bushinwa ku wa 14 Mutarama 2021, mu bushakashatsi bugamije kumenya aho Koronavirusi (COVID-19) yakomotse.
Uruzinduko rw’izi mpuguke rwari rwitezwe i Pekin muri kiriya gihugu mu cyumweru gishize ariko rusubikwa ku munota wa nyuma, hamaze kubura ibyangombwa byose bikenewe bibemerera gukora ubu bucukumbuzi.
Nkuko bigaragazwa n’Ibiro Ntaramakuru by’Abafaransa, Minisiteri y’Ubuzima mu Bushinwa, yatangaje ko izo mpuguke zizakorana n’ikipe y’inzobere mu bya siyansi muri kiriya gihugu.
U Bushinwa bwatangaje ko izo ntumwa za OMS zizabanza gushyirwa mu kato zikigera ku butaka bw’iki gihugu.
Perezida w’Amerika Donald Trump ntiyahwemye gushinja u Bushinwa ko ari bwo bwatumye COVID-19 ikwira biturutse kuri Laboratwari ikora ubushakashatsi kuri virusi yo muri Wuhan ari na wo mujyi watahuwemo bwa mbere iki cyorezo mu mpera z’umwaka wa 2019.
Abamaze kwandura icyorezo cya COVID-19 ku Isi barasaga miliyoni 91.1 barimo abasaga miliyoni 65 bakize n’abapfuye barenga miliyoni imwe n’ibihumbi 949.
