U Buhinde bwahaye u Rwanda ibitabo 100.000 bya siyansi

Yanditswe na Mugisha Benigne

Ku ya 08-11-2019 saa 08:42:11
Ambasaderi w'u Buhinde mu Rwanda Oscar Kerketta mu muhango wo gushyikiriza ibitabo Umuyobozi Mukuru wa REB, Dr Ndayambaje Irenee

Ubwo Minisitiri w’Intebe w’u Buhinde Narendra Modi yasuraga u Rwanda muri Nkanga 2018, yarwemereye impano y’ibitabo mu rwego rwo gutera inkunga uburezi.

Iyo nkunga yashyikirijwe Ikigo k’Igihugu cy’Uburezi (REB) binyujijwe muri Ambasade y’u Buhinde mu Rwanda, kuwa 7 Ugushyingo 2019.

Nk’uko byasobanuwe n’Ambasaderi w’u Buhinde mu Rwanda, Oscar Kerketta, ibitabo byatanzwe byiganjemo ibya siyansi kuko igihugu gifite abaturage bafite ubumenyi mu ikoranabuhanga n’ubumenyi ari bo bateza bagiteza imbere, bakaba bahisemo kandi gutanga ibitabo bya siyansi kuko mu ntegenyanyigisho y’amashuri y’u Rwanda hakenewe cyane ibitabo nk’ibi kuko amashami ya siyansi agenda atezwa imbere.

Amb. Kerketta ati “Ibitabo byatanzwe byiganjemo ibya siyansi n’ikoranabuhanga, byakorewe mu Buhinde ariko bizanywe mu Rwanda kugira ngo bifashe Abanyarwanda mu burezi, twizeye ko bizatanga umusaruro mwiza.”

Amb. Kerketta avuga ko u Buhinde n’u Rwanda bifitanye umubano mwiza kandi w’igihe kirekire, bakaba bishimiye n’ubu bufatanye mu rwego rw’uburezi, kandi ko hari n’izindi nzego bafatanyamo mu rwego rw’iterambere.

Ibi ni ibitabo bya siyansi igihugu cy’u Buhinde cyageneye u Rwanda

Umuyobozi Mukuru wa REB, Dr. Ndayambaje Irénée, avuga ko ibitabo byatanzwe n’u Buhinde ari inkunga nziza u Rwanda rubonye mu rwego rw’uburezi kuko bije kunganira ibyari bisanzwe mu mashuri ari na byo byanditswe n’Abanyarwanda.

Avuga ko ikerekezo k’igihugu ari ukugira ubukungu bushingiye ku bumenyi, ashimangira ko siyansi n’ikoranabuhanga ari yo mashami abanyeshuri benshi bifuzwaho kwiga kugira ngo bagire ubumenyi mu mibare na siyansi n’ikoranabuhanga, ibi bitabo bikazafasha kongera amavomo y’ubumenyi mu banyeshuri b’u Rwanda.

Ati “Ubumenyi ntibugira imipaka, ibi bitabo bije kunganira ubumenyi buvomwa mu bindi bitabo dusanganye, twifuza ko abanyeshuri biga imibare na siyansi kandi kugira ngo umunyeshuri yige neza ni uko agira imfashanyigisho. Biragoye ko twashishikariza abanyeshuri kwiga siyinsi badafite ibikoresho nkenerwa kugira ngo bige neza.”

Umuyobozi Mukuru wa REB avuga ko ibi bitabo bigiye kugenerwa cyane cyane amashuri abikeneye kurusha ayandi, nk’amashuri yo muri gahunda y’uburezi bw’imyaka 9 na 12 kugira ngo bige neza.

Ati “Amashuri akeneye ibitabo kurusha ayandi ni aya arimo gahunda y’uburezi bw’imyaka 9 na 12, ni yo azibandwaho mu gutanga ibi bitabo, ariko bizagera n’ahandi bikenewe.”

Avuga ko iyi nkunga idahagije urebye ibitabo bikenewe, ngo haramutse habonetse n’indi nkunga bayakirana yombi.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.