20°C , Partly cloudy | Kigali-Rwanda

U Bufaransa bwatangaje ko bwishe ikihebe al Maghrebi muri Mali

Yanditswe na Kayira Etienne

Ku ya 07-11-2019 saa 07:07:05
Izi ni ingabo z'u Bufaransa zikorera muri Mali zakoraga irondo mu Karere ka Tombouctou (Foto Fourt)

Minisitiri w’Ingabo za Leta y’u Bufaransa Florence Parly, yatangaje ko abasirikare babo bakorera muri Mali ngo bishe ikihebe Abou Abderahman al Maghrebi, bakunze kwita Ali Maychou.

Abderahman ukomoka mu gihugu cya Maroc, yari umuyobozi wungirije w’umutwe w’iterabwoba GSIM (Groupe de Soutien à l’Islam et aux Musulmans), ugendera ku mahame akaze y’idini ya kisilamu ushamikiye kuri Al-Qaïda.

Radio Mpuzamahnga y’u Bufaransa RFI, imenyesha ko Minisitiri Florence Parly yatangaje iyi nkuru y’urupfu rw’ikihebe Abou Abderahman al Maghrebi ari mu ndege avuye mu ruzinduko yari amazemo iminsi mu bihugu byo mu karere ka Sahel.

RFI iti «Minisitiri Parly yabitangaje ejo hashize ku wa Gatatu tariki 06 Ugushyingo mu kiganiro yagiranye na AFP, Ibiro ntamakuru by’Abafaransa, bari mu ndege agarutse avuye mu ruzinduko yarimo muri Sahel.»

Minisitiri Florence Parly yamenyesheje AFP ko alias Ali Maychou wari umuyobozi wungirije w’umutwe wa GSIM ushamikiye kuri Al-Qaïda ngo yahitanwe n’Ingabo z’u Bufaransa zikorera muri Mali mu ntangiriro z’ukwezi k’Ukwakira.

Ati «Ali Maychou yishwe mu ijoro ryo ku itariki 08 bucya ari ku ya 09 Ukwakira muri uyu mwaka 2019. Yishwe ku bufatanye bw’ingabo za Leta ya Mali ndetse n’iz’u Bufaransa.» Iki kihebe Abderahman Maghrebi, ngo yari umwicanyi ruharwa wakoranye n’imitwe y’iterabwoba nka Al-Qaïd ikorera mu karere ka Maghreb izwi ku izina rya Aqmi guhera mu 2012.

RFI yemeza ko mbere y’uko Abou Abderahman al Maghrebi ajya muri GSIM mu mwaka wa 2017, ngo yahoze ari umuyobozi w’imyizerere y’idini ya kiyisilamu muri Aqmi.

Iti «Yakoranaga bya hafi na Iyad ag Ghali, wari umuyobozi mukuru wa Maghreb islamique naho Ali Maychou akamwungiriza. Aba bombi bahoze ku rutonde rwa mbere rw’ibyihebe bishakishwa na Leta Zunze Ubumwe z’Amerika, kugira ngo batabwe muri yombi cyangwa bicwe kubera ibikorwa by’urugomo byakomeje kubaranga hirya no hino mu karere ka Sahel.»

Umutwe GSIM al Maghrebi yabarizwagamo, RFI itangaza ko ngo ari wo wigambye ibitero by’ubwiyahuzi byagabwe ahitwa Boulkessi na Mondoro, ibitero byishe abasirikare 40 bo mu ngabo za Mali mu mpera za Nzeri no mu ntangiriro z’Ukwakira muri uyu mwaka wa 2019. Muri Werurwe 2018 nanone, GSIM yigambye kandi igitero cyaguyemo abantu 8 i Ouagadougou muri Burkina Faso.

Muri icyo kiganiro na AFP, Minisitiri Parly ati «Ndabamenyesha ko hapfuye umukozi w’umutwe w’iterabwoba wari igihangange mu bikorwa bibi. Ndibutsa ko uyu Ali Maychou ari umuyobozi wa kabiri wa GSIM wishwe muri uyu mwaka umwe, nyuma y’Umunyalijeri Djamel Okacha, alias Yahya Abou El Hamame wishwe muri Gashyantare.»

Mu rwego rwo gusenya ibirindiro by’imitwe y’iterabwoba ikorera mu bihugu bya Mali na Burkina Faso, Madamu Parly yatangaje ko yishimira ubufatanye bw’ingabo z’u Bufaransa zizwi ku izina rya Barkhane n’iz’ibihugu byo mu karere ka Sahel mu rugamba rwo kugerageza guhashya burundu ibyihebe byayogoje umutekano w’abagatuye.

Nyamara impuguke mu karere ka Sahel, Mathieu Pellerin, akaba n’umushakashatsi mu kigo ‘International Crisis Group’, we asanga ingabo z’u Bufaransa zonyine ngo zidashobora na busa kurwanya imitwe y’iterabwoba yamaze gushinga ibirindiro mu bihugu bya Mali, Mauritanie, Burkina Faso, Tchad ndetse na Niger.

Avuga ko kugira ngo abarwanyi b’iriya mitwe y’ibyihebe batsindwe ngo hakenewe izindi ngabo mpuzamahanga nyinshi zakunganira iz’u Bufaransa n’iza biriya bihugu bivuzwe haruguru. Urugamba rwatangiye hashize imyaka hafi icumi ariko no kugeza magingo aya ibyihebe bikomeje kwiyongera mu karere ka Sahel.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.