21°C , Partly sunny | Kigali-Rwanda
Perezida Paul Kagame na Jean-Claude Juncker, Perezida wa Komisiyo y'Umuryango w'Ubumwe bw'u Burayi

U Bubiligi: Kagame yagiranye ibiganiro n’abayobozi batandukanye

Yanditswe na TWAGIRA WILSON

Ku ya 05-06-2018 saa 07:28:39

Perezida Paul Kagame yageze mu Bubiligi ejo hashize tariki ya 4 Kamena 2018 ahateganyijwe inama ngarukamwaka ya 12 ya Komisiyo y’Ibihugu by’Ubumwe bw’u Burayi yiga ku iterambere (European Development Days: EDD 2018), aho yahuye akanagirana ibiganiro n’abayobozi batandukanye.

Perezida Paul Kagame na Jean-Claude Juncker, Perezida wa Komisiyo y’Umuryango w’Ubumwe bw’u Burayi

Muri iyo nama y’iminsi ibiri itangira uyu munsi tariki 5 Kamena ikazasozwa ejo tariki 6 Kamena 2018, iribanda ku kamaro k’abari n’abategarugori mu kugera ku ntego z’iterambere rirambye, cyane cyane bahabwa amahirwe angana n’ay’abandi mu nzego zifata ibyemezo.

Perezida Paul Kagame yahuye kandi anagirana ibiganiro n’abayobozi batandukanye barimo Perezida w’Inama nyobozi y’uyu Muryango, Donald Tusk; Komiseri ushinzwe umubano mpuzamahanga n’iterambere muri uyu Muryango, Neven Mimica; Uhagarariye Ihuriro ku Bubanyi n’Amahanga n’Umutekano akaba yungirije Umukuru w’uyu Muryango, Federica Mogherini na Perezida wa Komisiyo y’uyu Muryango, Jean-Claude Juncker.

Perezida Kagame akaba yaranahuye akanagirana ibiganiro na Kristalina Georgieva Umuyobozi mukuru wa Banki y’Isi.

Muri uru ruzinduko kandi biteganyijwe ko Perezida Paul Kagame azahura n’Umwami Philippe w’u Bubiligi, anagirane ibiganiro na Minisitiri w’Intebe w’iki gihugu Charles Michel.

Binateganyijwe ko Umukuru w’Igihugu ageza ubutumwa ku bitabira umuhango wo gutangiza ku mugaragaro inama ngarukamwaka ya 12 ya Komisiyo  y’Ibihugu by’Ubumwe bw’u Burayi yiga ku iterambere.

Uyu muhango uritabirwa n’abayobozi batandukanye n’abakuru b’ibihugu barimo: Umwamikazi Mathilde w’u Bubiligi, Umwamikazi Letizia wa Espagne, Perezida Marie Louise Colero Preca wa Malta, Perezida Roch Marc Christian Kabore wa Burkina Faso, Perezida George Manneh Weah wa Liberia, Minisitiri w’Intebe wa Norvege Solberg, Umunyamabanga Wungirije wa Loni Amina Mohammed na Perezida w’Inteko Ishinga Amategeko y’u Burayi, Antonio Tajani.

U Rwanda rusanga iyi nama ari umwanya mwiza wo kuganira ku mubano n’ibindi bihugu, ku birebana n’Akarere ruherereyemo ndetse n’Isi muri rusange.

 

TANGA IGITEKEREZO

Leave a Reply

Be the First to Comment!

avatar