19°C , Intermittent clouds | Kigali-Rwanda

U Bubiligi bwemeye gushyikiriza ubutabera abakekwaho Jenoside babayo

Yanditswe na Twagira Wilson

Ku ya 07-03-2019 saa 13:55:58
Umushinjacyaha Wungirije w'u Bubiligi, Philippe Meire uwa 2 uhereye ibumoso abanjirijwe n'Umushinjacyaha Mukuru w'u Rwanda Mutangana Jan Bosco n'abandi bakozi b'ubushinjacyaha nyuma y'ibiganiro (Foto Twagira W.)

Umushinjacyaha wungirije w’u Bubiligi, Philippe Meire, aravuga ko igihugu cye cyiteguye gufatanya n’u Rwanda, kugira ngo abakekwaho uruhare muri Jenoside yakorewe Abatutsi mu 1994 bakiri ku butaka bw’u Bubiligi bashyikirizwe ubutabera.

Yabivugiye mu biganiro yagiranye n’Umushinjacyaha Mukuru w’u Rwanda Mutangana Jean Bosco, mu gihe u Rwanda rwitegura kwibuka ku nshuro ya 25 Jenoside yakorewe Abatutsi mu 1994.

Philippe Meire n’itsinda ayoboye banagarutse kuri zimwe mu nzitizi zigituma abahungiye mu Bubiligi badashyikirizwa ubutabera mu myaka 25 ishize, zirimo kubaburanishiriza mu nkiko zaho, nubwo u Rwanda rubona ko bamaze kuburanishirizwa mu nkiko zaho atari umubare ushimishije kuko bageze ku 8 gusa.

Philippe Meire agaruka ku mbogamizi, yavuze ko hari abakekwa bahungiye mu Bubiligi biyita impunzi za politiki bageze ku rwego rwo guhabwa ubwenegihugu bw’u Bubiligi n’ibindi. Phillipe yagize ati “Tuzakora ibishoboka mu bufatanye ku buryo bazashyikirizwa ubutabera kuko u Bubiligi atari ubuhungiro bw’abakekwaho ibyaha bya Jenoside”.

Kugeza ubu, u Rwanda rufite inyandiko 39 rwoherereje u Bubiligi zo gufata abakurikiranyweho ibyaha bya Jenoside, ariko kugeza ubu inkiko zaho ngo zaciriye imanza abantu umunani gusa.

Hagati aho Ubushinjacyaha Bukuru bw’u Rwanda buvuga ko u Bubiligi bugaragaje ubushake, haboneka abatangabuhamya n’amakuru yose akenewe ku bakurikiranyweho ibyaha bya Jenoside.

Ubushinjacyaha bw’u Rwanda butangaza ko kugeza ubu bumaze kohereza inyandiko mu bihugu bitandukanye ku Isi bisaga 30, zigamije gufata abakurikiranyweho ibyaha bya Jenoside yakorewe Abatutsi mu 1994, muri izo nyandiko harimo aboherejwe mu Rwanda mu gihe abandi boherejwe mu rukiko mpuzamahanga rwashyiriweho u Rwanda.

Umushinjacyaha Wungirije w’u Bubiligi, Philippe Meire uwa 2 uhereye ibumoso abanjirijwe n’Umushinjacyaha Mukuru w’u Rwanda Mutangana Jan Bosco n’abandi bakozi b’ubushinjacyaha nyuma y’ibiganiro (Foto Twagira W.)

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.