21°C , Partly sunny | Kigali-Rwanda

Twirinde Coronavirus, indirimbo nshya ya Senderi na Tuyisenge

Yanditswe na Ndamyirokoye François

Ku ya 26-03-2020 saa 11:39:14

Abahanzi  Eric Senderi  na Intore  Tuyisenge  bahuriye mu ndirimbo “Twirinde Coronavirus” bakangurira abantu gukaraba neza intoki mu kwirinda Coronavirus banakebura abacuruzi bazamuye ibiciro kubera iki cyorezo cya COVID-19.

Aba bahanzi basohoye iyi ndirimbo mu gihe iki cyorezo cya COVID-19 giterwa n’agakoko ka Corona gikomeje gufata intera mu bihugu bitandukanye byo ku Isi.

Senderi Hit  yatangaje ko we na Tuyisenge bagiye bahurira mu ndirimbo zitandukanye zubakiye ku bukangurambaga ari nayo mpamvu bifuje gutanga umusanzu wabo nk’abahanzi kugira ngo bakumire ikwirakwira rya Coronavirus.

Yagize ati “U Rwanda rwaciye mu bikomeye kandi hari amasomo akomeye twakuyemo ku buryo iyo Coronavirus itatuma tugaragaza ko hari ibyacitse, ahubwo ni umwanya mwiza wo guhangana nayo dukumira ikwirakwira ryayo.”

Yunzemo agira ati  “Ni indirimbo rero irimo amagambo y’ihumure aho dusaba Abanyarwanda gukaraba neza intoki  nk’uko twabishishikarijwe kandi  inzego z’umutekano zidusaba kuguma mu ngo.”

Uyu muhanzi avuga ko hari abacuruzi buririye ku bibazo u Rwanda rurimo bazamura ibiciro, ibintu avuga ko bidakwiye ku munyarwanda ufite indangagaciro.

Ati “Twiyamye barusahurira mu nduru bari gufatanya na Coronavirus bakazamura ibiciro. Ntabwo ari umuco nyarwanda.”

Minisiteri y’inganda n’ubucuruzi (Minicom) iherutse gutangaza ko hari abacuruzi baciwe amande bitewe n’uko bazamuye ibiciro ku biribwa.

Senderi Hit na Tuyisenge Intore baherukaga gukorana indirimbo baririmbye mu rurimi rw’ikirashi’.

Ubukangurambaga aba bahanzi baririmbye bwiswe “#SafeHands Challenge” bushishikariza abantu gukaraba neza intoki, bumaze iminsi butangijwe n’Ishami ry’Umuryango w’Abibumbye ryita ku buzima (OMS/ WHO).

Iri shami rivuga ko ari bumwe mu buryo bwizewe bwo kwirinda iki cyorezo cya Coronavirus.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.