26°C , Partly sunny | Kigali-Rwanda

Twibohore twimakaza ibikorerwa mu Rwanda- sina Gérard/ESE URWIBUTSO

Yanditswe na Amani Claude

Ku ya Jul 11, 2018 saa 5:32

Mu gihe u Rwanda rwizihiza isabukuru y’imyaka 24 yo Kwibohora, rwiyemezamirimo w’Umunyarwanda SINA Gérard, arashishikariza Abanyarwanda kwishimira ibimaze kugerwaho barushaho kwimakaza ibikorerwa mu Rwanda (Made in Rwanda).

Sina Gérard asobanurira abayobozi n’abaturage imigabo n’imigambi afite gukorera ku musozi wa Tare harimo no gushinga kaminuza mu minsi iri imbere

Uyu rwiyemezamirimo umaze kumenyekana mu Rwanda ndetse no mu mahanga kubera ibikorwa by’ubuhinzi n’ubworozi no kongerera agaciro umusaruro ubi ukomokaho, arashimira ubuyobozi bw’igihugu budahwema gushyigikira ibikorwa by’Abanyarwanda mu gihugu no hanze yacyo.

SINA Gérard yatangiye ibikorwa by’ubucuruzi mu mwaka wa 1983, ubu akaba afite ikigo “SINA GERARD/ENTREPRISE URWIBUTSO” gikorera ahitwa kuri Nyirangarama mu karere ka Rulindo mu Majyaruguru y’u Rwanda.

Abanyeshuri bo kuri COLLEGE FONDATION SINA GéRARD baganira na Isaac Munyakazi Umunyamabanga wa Leta muri MINEDUC

Mu kiganiro n’Imvaho Nshya, yakomoje ku mutekano igihugu gifite watumye Abanyarwanda bakorera mu mudendezo, bityo bikihutisha iterambere.

Yongeyeho ko ubwisanzure no gukorera mu mudendezo byatumye ubucuruzi bwe bwaguka, bukaba buri kurenga imbibi z’u Rwanda, aho kugeza ubu SINA GERARD/ Entreprise URWIBUTSO ifite ishami mu gihugu cya Uganda, yohereza ibicuruzwa byayo mu bihugu binyuranye ku isi.

“College Fondation SINA Gérard (C.F.S.G)”, yabereye benshi umugisha

SINA Gérard, yashinze ishuri ry’ubuhinzi n’ubworozi “College Fondation SINA Gérard” kugira ngo ibyo akorera Abanyarwanda bitazavaho byibagirana mu myaka iri imbere kandi bifite uruhare mu iterambere.

Yagize ati  “Nashinze ishuri ngamije kuzamura ubuhinzi n’ubworozi no guha u Rwanda abagoronome n’abaveterineri beza mu myaka iri imbere.”

Izi modoka ni izifashishwa mu gucyura no kugarura abanyeshuri mu mpera no mu itangira ry’amashuri

Ishuri “College Fondation SINA Gérard” rimaze kugira abanyeshuri barenga 1100, rikaba rifasha imiryango itandukanye guha uburezi bufite ireme abana babo ndetse abenshi biga banimenyereza umwuga mu ishami rijyanye n’ubuhinzi, ubuvuzi bw’amatungo no gutunganya ibiribwa.

SINA Gérard avuga ko kuba abanyeshuri baba bari ahantu hakorerwa ubuhinzi bunyuranye bw’inkeri, Pomme, imizabibu, Macadamia n’ibindi ari amahirwe kuri bo. Hari n’ubworozi bw’inka, ihene, inkoko, ingurube, inkwavu  n’ibindi ku buryo usanga ari imfashanyigisho ku banyeshuri.

Yemeza ko abana bazahakura ubumenyi bufatika kuko bazajya bamenyerezwa n’abakozi babyigiye bagenzura ubuhinzi n’ubworozi bwe kandi bafasha imiryango akorana na yo.

SINA Gérard akomeje gufasha benshi kwiteza imbere

Kugeza ubu “SINA GERARD/ENTREPRISE URWIBUTSO” imaze guha imirimo Abanyarwanda barenga 4,000; barimo abagera kuri 300 bahoraho, ba nyakabyizi 700 n’imiryango bakorana mu bijyanye n’ubuhinzi n’ubworozi igera ku 3,000.

SINA Gérard arasaba Abanyarwanda kwitabira kugura no gukoresha ibikorerwa mu Rwanda kuko ari bwo buryo igihugu kizakomeza kubaka ubukungu butajegajega kidatagaguje amaboko mu guhaha ibiva mu mahanga usanga rimwe na rimwe hari ibyo mu Rwanda bibirusha ubuziranenge.

SINA Gérard ahamya ko Nyakubahwa Perezida Paul Kagame ashyigikiye cyane Abanyarwanda bakura amaboko mu mufuka bakabyaza umusaruro imbaraga zabo nta mbogamizi n’imwe.

Yagize ati: “Ibyiza igihugu cyagezeho ntibyari gushoboka hatari umutekano; mboneyeho no gushima Umukuru w’Igihugu wabigizemo uruhare rukomeye.”

Mu gihe u Rwanda rwizihiza isabukuru y’imyaka 24 ishize rwibohoye, SINA Gérard yatanze ubutumwa yemeza ko ibyo yagezeho byose abikesha ubuyobozi bwiza.