20°C , Mostly cloudy | Kigali-Rwanda

Twafashe umurongo uboneye wo gukora politiki yubaka – Depite Mukamana

Yanditswe na KAYITARE JEAN PAUL

Ku ya 17-04-2018 saa 08:07:45

Umuvugizi w’Ihuriro ry’Igihugu nyunguranabitekerezo ry’Imitwe ya Politiki, Depite Mukamana Elisabeth, avuga ko abanyapolitiki bahisemo gukora politiki yubaka, igashyira imbere ubumwe bw’Abanyarwanda. Depite Mukamana yabigarutseho ubwo hasozwaga icyumweru k’icyunamo hibukwa abanyapolitiki bazize Jenoside yakorewe Abatutsi mu 1994.

Ati “Imitwe ya politiki n’abanyepolitiki muri iki gihe twafashe umurongo uboneye wo gukora politiki yubaka, twiyemeje gukora politiki ishyira imbere ubumwe bw’Abanyarwanda, tukajya inama kenshi tugaharanira ubumwe bw’igihugu n’ineza y’Abanyarwanda bose”.

Depite Mukamana Elizabeth (iburyo) ashyira indabo ahashyinguwe imibiri y’abanyapolitiki bazize Jenoside yakorewe Abatutsi (James R)

Abanyapolitiki biyemeje kubaka imiyoborere myiza iharanira imibereho myiza n’iterambere ry’Abanyarwanda bose, akaba ari yo mpamvu mu mitwe ya politiki yabo bafashe ikemezo cyo kwitoza bo ubwabo nk’abakuru no gutoza urubyiruko politiki yubaka. Ibyo bigakorwa barutegurira amahugurwa n’amasomo ajyanye n’ubumenyi bwa politiki n’imiyoborere myiza.

Depite  Mukamana atangaza ko abanyapolitiki bibutswe ku nshuro ya 24 bazize ubutwari bwabo bwo kwanga ikibi bagahitamo kwiyemeza kurwanya ingoma y’igitugu baharanira gukora igihugu kirangwa n’imiyoborere iboneye, imiyoborere ibanisha Abanyarwanda bose nta vangura.

Ati “Ntibyaboroheye kuko ubutegetsi bwariho bwari bufite ibyangombwa byose byabufashije gushyira mu bikorwa umugambi wabo wa Jenoside yakorewe Abatutsi.”

Avuga ko ngo uko bizwi politiki ari ubuhanga bwo kuyobora no gucunga umuryango w’abantu kugira ngo bagire imibereho myiza n’iterambere rirambye. Ubutegetsi bwa Habyarimana n’abandi bafatanyije gutegura Jenoside yakorewe Abatutsi, avuga ko butubahirije ayo mahame y’imiyoborere myiza nko kuvangura abenegihugu ukabacamo ibice, gukora irondakoko n’irondakarere, kwimakaza urwango mu banyagihugu, kwica abantu ubaziza uko Imana yabaremye abandi bakazizwa ibitekerezo byabo bya politiki, kurenga ku mahame y’uburenganzira bwa muntu, kwirukana abantu mu gihugu cyabo ukabaheza ishyanga, aho yavuze ko ari ubugome bwaranze ubutegetsi bwateguye bukanashyira mu bikorwa umugambi wa Jenoside yakorewe Abatutsi.

Ati “Ni akaga gakomeye u Rwanda rwagize  rwo kugira abanyapolitiki nk’abo”.

Depite Mukamana ahamya ko Jenoside yakorewe Abatutsi mu 1994 yahagaritswe n’abana b’u Rwanda b’intwari bafashe ikemezo cyo guhaguruka bakarwanya ingoma yateguye ikanashyira mu bikorwa umugambi wa Jenoside yakorewe Abatutsi.

Ati “Uru rugamba ntirwari rwoshye ariko kubera kurwanira ukuri rwarashobotse.” Akomeza avuga ko imitwe ya politiki n’Abanyarwanda bagize uruhare rukomeye muri uru rugamba rwo kurwanya ingoma y’igitugu no guhagarika Jenoside yakorewe Abatutsi.

Avuga kandi ko imitwe ya politiki mu Rwanda ifite urubuga bahuriramo bakaganira, bakajya inama, bakanatanga umusanzu w’ibitekerezo ku bibazo biremereye igihugu, ngo basanga ari uburyo bwiza bwo gukomeza guteza imbere demokarasi ibereye Abanyarwanda.

Depite Mukamana asaba imitwe ya politiki n’abayoboke bayo guhora iteka birinda icyabasubiza inyuma, bakirinda amacakubiri ayo ari yo yose, bakarwanya uwo ari we wese watekereza kugarura politiki isenya, bakirinda kandi ingengabitekerezo ya Jenoside, bakarwanya uwo ari wese washaka gusenya ibyo u Rwanda rumaze kugeraho rubikesha imiyoborere myiza.

TANGA IGITEKEREZO

Leave a Reply

Be the First to Comment!

avatar