21°C , Partly cloudy | Kigali-Rwanda
Tuyishime Zacharie ubu ni umukinnyi ngenderwaho muri Police HBC

Tuyishime wakinnye Handball ashaka gusohoka ubu ni umukinnyi ukomeye

Yanditswe na BUGINGO FIDELE

Ku ya 04-11-2018 saa 18:20:47

Tuyishime Zacharie ni umwe mu bakinnyi b’ikipe ya Police HBC wayifashije kwegukana igikombe cya shampiyona y’umukino wa Handball muri uyu mwaka w’imikino wa 2018.

Nk’uko abitangaza, Tuyishime yatangiye gukina Handball akiga mu mashuri abanza ariko ashaka gusohokana n’abandi gusa ngo age mu bindi bice by’Igihugu no hanze yacyo none ubu yabaye umukinnyi ukomeye.

Mu kiganiro yagiranye n’Imvaho Nshya, Tuyishime Zacharie yatangaje byinshi ku buzimana bwe, urugendo rwe muri rusange mu mukino wa Handball kugeza ubu ndetse n’intego afite.

Inshamake ku buzima bwa Tuyishime

Tuyishime yavukiye mu Murenge wa Gisenyi, Akagari k’Amahoro mu Karere ka Rubavu, Intara y’Iburengererazuba mu 1993. Ababyeyi be ni Batinyuke Esron na Kampeta Providence.

Yize amashuri abanza muri EP Stella Maris, amashuri yisumbuye ayiga ESGI, akomereza GS Kanembwe asoreza ESBF mu Ishami ry’Ikoranabuhanga.

Yatangiye gukina Handball ashaka gusohokana n’abandi

Tuyishime Zacharie ubu ni umukinnyi ngenderwaho muri Police HBC

Mu gihe benshi mu bana bavukiye i Rubavu bazwiho kugira impano yo gukina umupira w’amaguru, Tuyishime avuga ko yatangiye gukina Handball ahagana mu mwaka wa 2008 aho yigaga mu mwaka wa 5 w’amashuri abanza muri EP Stella Maris.

Ati: “Hari abanyeshuri baje aho twigaga nisanga turi mu ishuri rimwe, urebye ni bo bagiye badushishikariza gukina Handball kuko twajyaga mu karuhuko tukareba uko bakina, natwe tukajya inyuma y’izamu tukagenda tugatera umupira bigenda biza bityo birangira dukunze uyu mukino”.

Tuyishime atangaza ko bamwe muri bo harimo Ntakirutimana Saidi wari umunyezamu. Yakomeje avuga ko kubera ko hari gahunda yo gusohokera ikigo bababwiraga ko babikunze baza bagakina bakabajyana.

Ati:“Ntabwo nahise numva ko ari impano yange ahubwo nagize umuhate kuko numvaga hari abazasohokera ikigo ngira ishyaka kugira ngo nange nzabashe gusohoka menya n’ahandi mu tundi turere kuko nta ho nari nzi”.

Akomeza agira ati: “Iryo shyaka nagize ryo gushaka gusohoka nkamenya n’ibindi bice by’ihihugu ni ryo ryatumye mvuga nti Handball nshobora kuyikina”.

Urugendo rwa Tuyishime muri Handball

Tuyishime avuga ko akirangiza muri Stella Maris yakomereje muri ESGI mu kiciro rusange akahahurira n’abandi bakinnyi bakinaga Handball bakajya bakinira ikipe y’ikigo no mu marushanwa y’akarere n’ubwo batageraga kure.

Akomeza avuga ko ariko ibigo byabaga byatsinze bikabona itike ku rwego rw’igihugu byabifashishaga bakabikinira.

Tuyishime yiga mu mwaka wa kabiri w’ikiciro rusange muri 2012, ikipe ya College Inyemeramihigo yabonye itike yo kwitabira imikino ihuza amashuri yisumbuye yo mu Muryango w’Ibihugu y’Afurika y’Iburasirazuba « FEASSA » i Burundi icyo gihe ajyana na yo bituma noneho akunda Handball cyane kuko yari imuhaye amahirwe yo kujya hanze y’Igihugu bwa mbere.

Mu mwaka wa gatatu w’ikiciro rusange, Tuyishime yatangiye gukina shampiyona mu ikipe ya Rambura. Ati: “Nayikiniye umwaka umwe nyikinira neza, amakipe y’i Kigali akambona ndetse n’ay’ibigo akanyifuza. Gusa icyo nari nshyize imbere kwari ukwiga nkazakomeza ibindi nyuma, nahisemo kuguma i Rubavu”.

Haje kuvuka ikipe ya Police HBC i Rubavu Tuyishime Zacharie ayijyamo, nyuma muri 2014 yerekeza muri Police HBC y’i Kigali. Ati: “Police HBC yashatse abakinnyi nange ndaza nkora igeragezwa ndaritsinda”.

Ntabwo byahise bimugendekera neza

Tuyishime ukina ku mwanya w’umukinnyi uyobora umukino “Meneur de jeu” avuga ko guhindura ikipe bitahise bimworohera. Ati: “Ntabwo biba byoroshye, kugera mu ikipe ugahita umenyera. Nkihagera nta bwo uwo mwaka wahise umbera mwiza kuko ntahise nkina ku rwego banyifuzagaho, gusa narakoraga cyane mu gihe bampaye nk’iminota 5 yo gukina”.

Muri uyu mwaka kandi ikipe ya Police HBC ntiyabashije kwisubiza igikombe yari yegukanye muri 2013 kuko cyegukanwe n’ikipe ya Gicumbi HBT.

Muri 2015, Tuyishime avuga ko ari bwo yumvise bimeze neza kuko yari amaze guhuza n’abandi bakinnyi . Ati: “Ni bwo natangiye kumva ko nkina muri Police HBC mbikwiye”.

Tuyishime Zacharie kuva yagera muri Police HBC amaze gutwarana na yo ibikombe bitandukanye birimo bitatu bya shampiyona (2015, 2016 na 2018). Yabashije kandi kwegukana igihembo cy’umukinnyi witwaye neza “MVP” inshuro 5 harimo icya shampiyona ya 2017 na 2018, ik’irushanwa ryo kwibuka muri 2017 na 2018 ndetse n’igihembo cy’umukinnyi mwiza mu irushanwa ry’Afurika ry’abatarengeje imyaka 20 ryabereye mu Rwanda muri Kanama 2018.

Mu rugendo rwe rwo gukina Handball, Tuyishime Zacharie azirikana cyane, umwe mu batoza bamutoje bwa mbere Nayirarora Aime Elias.

Yishimira kuba akina muri Police HBC

Tuyishime avuga ko yishimira kuba akina mu ikipe nka Police HBC kuko yahoraga yifuza gukina mu ikipe ikomeye mu Rwanda, akomeza avuga ko ikindi cyazamushimisha ari ukuzaba umukinnyi wabigize umwuga agakina hanze y’u Rwanda.

Yababajwe no kubura igikombe bari bagiye gukura hanze

Muri 2016, Police HBC yatsinzwe na KDF yo muri Kenya ku mukino wa nyuma mu mikino ihuza amakipe yabaye aya mbere iwayo muri Afurika y’Iburasirazuba ndetse no hagati “ECAHF Championship 2016”. Ati: “Kubera ko iyi mikino yari yabereye muri Kenya, iyi kipe yazanye abasifuzi bahakomoka idutsinda itaturusha kuko bayibereye cyane, ibi ni kimwe mu bintu byambaje”.

Tuyishime arishimira iterambere Handball igezeho mu Rwanda

Yagize ati: “Nkurikije uko mbibona, hari impinduka zagiye zibaho, aho gukinira byari ikibazo ubu haragenda haboneka. Dukina hari abakinishaka ibirenge ariko ubu ntibishoboka bafite ibikoresho bihagije”.

Tuyishime yakomeje avuga ko abakinnyi bazamuye urwego, abasifuzi ndetse n’abatoza. Gusa avuga ko hagikenewe ibibuga byiza kugira ngo mu Rwanda hage habera amarushanwa akomeye bitume bagira amahirwe yo kongera ubunararibonye ndetse n’abakizamuka bari hasi babone uko bazamuka bafite intego runaka.

TANGA IGITEKEREZO

Leave a Reply

Your email address will not be published. Required fields are marked *